\r\n\r\n\r\n趟開大門時，撲鼻而來的是濃郁的鹵水芳香味,但十一時半還算是食肆準備的時間, 內裡未有客人,可以講得上是暫時包場吧！打開餐牌, 想點的菜卻太多, 如果以我個人的食量, 當然可以盡情點啦，但想到要遷就老友，無可奈何下,只能上五碟小吃再另加一碟豉油皇撈麵好了! 但最後共食了七碟，何解？下回分解。\r\n\r\n
\r\n\r\n\r\n點了以下食物，並綜合了我們兩個為食男人的小小食後感：—\r\n\r\n《鹵水鵝片拼豬腸鵝腸》 : 豬腸其實係千層腸,但肥而不膩,炆得亦夠火喉,好入味又夠腍, 當然亦都清洗得乾乾淨淨,一點羶味都沒有。但鵝片同鵝腸卻嫌是大路貨色一點, 沒甚驚喜, 如果下次來的, 可以淨叫豬腸一碟已足夠。碟底舖上銀芽一齊食,可以清清口腔過濃的口感, 加上損友是個芽菜癡, 無一芽菜能逃過被送往裹腹了。\r\n\r\n
\r\n《腿茸白蘿蔔》 :用上湯浸泡(根據老闆事後所講,湯底是用早上烚雞鵝時留下的湯水),舖上腿茸(金華火腿),清又無楂,但最可惜係些少帶苦澀味,自己忍唔住同老闆'呻' o左句, 老闆阿鴻哥一試之後, 都認同我所講, 並馬上送上兩碗老火青紅蘿白湯給我們作補數, 誠意可嘉。\r\n\r\n
\r\n\r\n\r\n《菜瀾撈麵》 : 麵可選粗麵或幼麵, 鴻哥話粗麵口感好些, 所以就選了粗麵。這道食物是我最欣賞既食品之一,用京蔥,薑絲,豬油,豉油皇撈埋一齊食,好香口,師傅時間掌握得準,d 麵放左一段時間至食都無話腍晒, 仍然煙韌彈牙, 亦沒有水味。雖然用上豬油好似唔夠健康,但間中放縱一下又何妨?\r\n筆者一見隨碟送上的例湯,我即刻叫阿姐比多碗,因為我竟然見到有金華火腿茸係湯裡面,果然一絲不苟.而湯事實上亦好清甜,正！至於個食物點解用上菜瀾的名字, 原來都有段古, 詳情有機會待阿鴻哥向大家講吧！\r\n\r\n
\r\n \r\n\r\n《醉香珍肝》 :其實係雙併(雞腎同雞肝)伴醃青瓜粒,又係好正既一味小食, 雞腎爽脆, 雞肝肉汁仍然保持鮮美, 加上彈彈口感, 如果睇波送酒就一流,據師傅事後同我講起,要早一日用鹵水料浸好,臨上碟前再灑d 花雕酒先至有咁香。\r\n\r\n
\r\n\r\n\r\n《阿鴻鴨舌》 :雖然唔平, 要20蚊才有六條鴨舌,但我都覺得是值得既, 難道要山長水遠去台灣老天祿買咩!而實在不單入味,仲加入左香辣麻料,但唔搶味,伴碟的青瓜片亦可以去油膩感,唯一可惜係唔可以同一碟裡混雜其他幾款鴨舌一起給我試。\r\n\r\n
\r\n\r\n\r\n《香酥炸墨魚餅》 :好熱氣既小食, 外皮炸得金黃, 裡層的墨魚膠軟綿綿熱辣辣, 要整得外脆內軟, 真係少d功夫都唔得.\r\n\r\n
\r\n\r\n\r\n老闆見同我地好傾,私人“醒”碟還未正式上市的秘製XO醬撈幼麵給我們試, 還叫我們幫手諗諗名字。用料都同菜瀾撈麵相近,但混以秘制XO醬,依然爽口彈牙,但可惜略嫌普通,如果要作為一個招牌麵,仍有不足.\r\n\r\n
\r\n\r\n\r\n埋單二百多蚊, 以食到咁多個款式小食來講, 屬非常合理。臨走的時候, 再在門口一望,竟然發覺還有好多小食未試到, 其中一個是鹵水元蹄, 都是留待下次班齊人再黎試過!\r\n\r\n\r\n後話:\r\n\r\n老闆帶筆者跟朋友往廚房參觀,真係好乾淨,前所未見,而TOILET 雖然細左D,但都好光潔明亮,我個人認為想知一間食肆有無心做D出色既食品,睇它的洗手間已略知一二,畢竟如果連這些小事都一絲不苟的,我在此等食肆吃東西都會吃得安心好多!\r\n\r\n還有提提大家, 這裡的小食大多屬高卡路里及高膽固醇食物, 尤其愛瘦的女士們要有定心理準備, 最緊要之前之後做番多d 運動啦！\r\n\r\n題目的萊路與哈地, 是六十年代一肥一瘦的荷李活影星, 他們的身形, 就像我和朋友一樣。\r\n\r\n\r\n\r\n\r\n\r\n\r\n\r\n****************************************************\r\n文: 美食焚化爐\r\n攝影、編輯: FoodKing \r\n\r\n\r\n