美孚美食新「睇」验
2016-02-19
美孚个名来自美孚新邨,绝对唔好睇小呢个屋苑,因为佢足足有99座!所以虽然位置唔算好大但仍然有唔少餐厅进驻。呢区最近亦经常被唔少食家提起,入到美孚会有咩美食新体验或者新「睇」验?睇开饭仔介绍落去啦!

足料爆浆车轮饼  车轮饼小姐


(Photos by 为食MoJil & chingchinglui)

前排喺IG同Facebook劲洗版嘅车轮饼就系嚟自美孚呢间小店,开业以嚟到而家都仲系经常见到长人龙!点解咁受欢迎?无他嘅,一个字:真材实料。$10一个车轮饼(即系日本嘅大判烧)有多款口味任拣,港人最爱嘅抹茶同香蕉朱古力口味仲玩流心,切开一睇,流心真系有彭拜嘅效果!
一样大热嘅紫薯口味亦有足料紫薯蓉馅,口味自然唔死甜,食多两个都唔怕腻。唯一可惜咗少少嘅系因为人龙太长所以小店唔可以即叫即整,但即场食嘅可以请店员翻热,补返数啦。

香软脆心鸟结糖  多多饼店


(Photos by 蒙奇奇)

试完车轮饼不妨去埋呢间港式饼店买包纽结糖返屋企,咩系纽结糖?其实即系香港人去澳门会买嘅鸟结糖,台湾人就叫佢牛轧糖。
第一次试唔洗贪心,买包什锦装慢慢试就得。里面有黑芝麻脆心、浓情朱古力脆心、咖啡脆心、姜汁杏仁、蓝莓榛子、西梅杏仁、杏仁同原味,头三款加咗脆米口感更丰富,所有口味都黏软唔粘牙,小小鸟结糖多多「趣」!

睇唔到都照食饭?  黑暗中对话体验馆


(Photos by cloverwong)

唔少人都钟意相机食先,如果喺一片黑暗当中睇唔到咪嘥咗?其实换个角度谂,太依赖视觉会唔会令到其他感官变得迟钝?呢间由社企「黑暗中对话」开办嘅体验馆就比个机会你,试下喺伸手不见五指嘅黑暗里面享用由另一间名社企「银杏馆」到会嘅美食。
放心呢度有视障人士做导赏员,确保你可以喺安全嘅环境之下,用触觉、味觉、嗅觉同听觉进食。每月举办一至两次,预约嘅时候可以写明自己系素食者或者对某啲食物有敏感方便安排。

真.上海家乡味汤面  沧浪亭


(Photos by lauyuling & 为食MoJil)

香港有唔少出色嘅上海菜馆,但或多或少都会为了迁就港人口味而修改,而美孚呢间街坊小店,就系其中一间依然坚持唔修改家乡风味嘅例子。
最多食客推介嘅系嫩鸡煨面,奶白色嘅汤底加上大量鸡肉粒同蔬菜粒,入口汤底嘅鲜甜、鸡肉嘅咸香同蔬菜嘅清新互相平衡,幼面就口感软腍,而且分量十足,男士食都会够饱。另外有大大块炸猪排嘅大排面同有入口即溶猪软骨嘅红烧软排菜饭亦系推介。

隐世精致意菜馆  Mia Pasta Trattoria


(Photos by Food and Crits & Yan~*)

屋邨商场嘅西餐水准唔高得去边?凡事总有例外嘅,呢间小店就以精致意大利菜成为区内最受欢迎嘅餐厅之一。无论系Pizza、意粉定意大利饭都有一定水准。
不过讲到最多食家推介嘅其实系呢度嘅意式芝士蕃茄多士,厚多士加咗一层厚厚嘅芝士喺面再烤至金黄色,加黑醋浸蕃茄粒入口香脆而唔油腻,无论系唔系芝士控都会爱上嘅开胃前菜!如果价钱可以再相宜啲啲就Perfect池啦!

烧鸡翼我钟意食  吉吉烧农庄


(Photos by Cur & 小连)

一班人烧鸡翼唔系入新界就系上朋友屋企天台?其实市区都有就脚嘅烧烤场,而且仲系任食。唔知老板系咪同开饭仔一样细细个就听周星驰唱「烧鸡翼我钟意食」,呢度净系鸡翼都有七款!
七款鸡翼包括五款唔同口味嘅鸡中翼同两款鸡全翼,相比起嚟海鲜选择唔多,不过就欢迎自携其他食材入嚟烧。蔬菜推介香口嘅牛油栗米粒同蒜蓉杂菜金菇,唔够饱?有方包或者法包,加佢地自家制嘅蒜蓉牛油酱烧嚟食就得啦。

减肥敌人牛油鸡翼  小越南


(Photos by YoYo1007 & clc408)

认真,想减肥嘅就跳过呢段介绍,因为唔少街坊都话呢度嘅秘制牛油鸡翼真系「味」力没法挡,会食到唔记得咗自己其实减紧肥!
几乎每张枱都会叫一碟嘅招牌菜秘制牛油鸡翼听个名都知邪恶,炸好嘅鸡翼带香浓牛油味同啱啱好嘅蒜蓉味,炸浆唔厚咬落皮脆肉滑,惹味得嚟香、脆、嫩於一身。唔钟意咁邪恶?仲有焦糖姜粒鸡翼,甜、酸、辣一样平衡有致。

回味香浓鲜茄薯仔汤  金利银辉茶餐厅


(Photos by lkkki)

最後Back to basic介绍返香港人见惯见熟嘅茶餐厅,基本嘢当中其实都有小惊喜。呢间茶餐厅平均水平中等,但假日特餐就引嚟唔少熟客特登早起嚟一尝滋味。
其实所谓嘅假日特餐以鲜茄薯仔排骨螺丝粉作卖点,净系星期六及公众假期供应,数量有限通常卖到十点就无!因为佢地嘅汤并唔系普通例汤,汤底浓郁饮得出番茄同排骨嘅鲜味,螺丝粉煮得啱啱好唔过腍,高分之作。

随时接收最新资讯
赞好OpenRice专页!


关键字
美孚
车轮饼
鸟结糖
牛油鸡翼
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
【Pinkoi好设计好生活】10 分钟完成另类料理:炸面包!3 种吃不停口的食法
2017-04-14
邪恶新「食」力!五层芝士包春季新口味
2017-04-10
【国际新食力】红到去韩国?弘大芝士面包同港版激似
2016-07-20
日本人气手工面包店登陆尖东 招牌吐司蛋香味超浓(有片)
2017-03-13
【便利店寻宝】限量版虾子杯面试食报告
2017-05-19
初夏清新之选 酒店芒果主题下午茶
2017-05-19
餐厅资料
更多
收起
本月热门
【随时更新】便利店寻宝 每周新品速报
5天前
给自己一个休息时间 10-11月下午茶推介
2019-10-25
【特约分享】食鱼生转运 三种好意头日本海产介绍
2019-10-14
鼎王来了!味道服务媲美台湾 必食麻辣鸭血锅及员工教路秘制鼎王饭
2019-11-01
粮尾打气!5间湾仔平价饭堂推介
2019-10-24