想約朋友食brunch，慢慢嘆個悠閒週末～ 今次揀咗幾間高質有氣氛嘅餐廳，無論想hea住傾偈定係影靚相打卡都好啱。
阿爾巴白松露主題 Sabatini
呢間意大利餐廳，最近推出咗用意大利白松露做主角嘅早午餐，真係好吸引!! 白松露香味好濃郁，加入炒蛋多士、帶子、意大利麵或者牛柳上面都即刻升級。週末嚟呢度嘆返個brunch，再配杯氣泡酒同朋友慢食傾偈，完全係秋冬最完美享受！
地中海風味週年限定早午餐 La Petite Maison
人氣法國菜週年限定早午餐，以經典地中海風味做主題，每道菜都好有法式浪漫。前菜有招牌布拉塔芝士配番茄多士同新鮮吞拿魚塔丁三明治，清新開胃。主菜可以揀鮮甜香煎帶子，或者香濃油封鴨腿，各有特色。甜品就更加不得了，法式多士同榛子朱古力泡芙都甜而不膩。
法日fusion風味 ROUCOU 
將法式嘅細膩同日式嘅精準完美融合，帶大家展開一場充滿驚喜嘅「芝」味旅程。三道式早午餐逢星期六、日供應，前菜拼盤已經誠意滿滿，有阿拉斯加帝王蟹配三文魚籽布里歐、多士、煙燻芝士等；主菜可揀芝士香烤雞胸藍帶卷、清酒煮青口配薯條、日式炸魚薯條配芝士他他醬等。最後可以揀甜品或芝士拼盤作結，芝士控一定滿足。
意式週末早午餐 BACI Trattoria · Bar
圖：孤獨的.美食家
環境寬敞又有格調，坐得舒服～ 食物做到貴精不貴多，雖然選擇唔算多，但每款都好高質。薄餅同意粉都係即叫即整，特別係薄餅餅底係脆卜卜。而海鮮用料好新鮮，燒牛肉亦驚喜地嫩滑。私心推薦埋煮到好腍嘅豬肋骨，輕輕咬落去已經骨肉分離超正。甜品方面，推介大家食keep住高人氣嘅開心果蛋糕。
文：Yanica
編：Kate
