烤鱼关注组5大推介！$70起叹正宗川味热炉烤鱼

冬天除咗打边炉之外，对锺意海鲜嘅朋友嚟讲食烤鱼都系个暖身嘅好选择。开饭仔今次就精选其中五间喺网上烤鱼关注组得到好评嘅烤鱼店，唔少都有推出优惠套餐或者一人餐，最平嘅$70就食到啦！

元朗旺角人龙店烤鱼工房

能够开喺元朗同旺角而Keep住有人龙排队，靠嘅系即叫即烧嘅烤鱼，同喺四川空运到港嘅底料，有食评更指风味同内地名店几似！烤鱼有七款口味选择，最推介招牌毛血旺口味或者香辣豆花口味配无细骨嘅江团鱼。唯一可惜系繁忙时间限时90分钟，食得有啲赶。

香辣豆花烤鱼（图: Kan Lee）

烤鱼餐厅有埋火锅或者鸡煲唔出奇，不过好似呢间餐厅咁卖埋串烧就少啲。懒得谂食咩好嘅话坚尼地城分店有大丰盛套餐，有齐自选烤鱼、香口小食、串烧同饮品。烤鱼有六款口味，当中以招牌重庆豆花烤鱼最受欢迎，配料多而且煮得够入味。

重庆豆花烤鱼、串烧（图: HoichingChan8642）

烤鱼通常都系原条大大份，约唔到朋友就食唔晒？唔怕！呢间喺九龙同新界都有分店，由成都名厨主理嘅四川菜餐厅就推出一人烤鱼火锅！五款足一斤活鱼选择，有辣有唔辣，甚至可以嗌埋配料例如肥牛、鸡肾花、鸭血等，真系一个人原来都可以尽兴。

（左）一人烤鱼火锅（图: KimmyLi666），（右）原条沙巴龙趸烤鱼（图: Katrinaaa_）

呢间主打烤鱼同火锅嘅餐厅喺尖沙咀同荃湾都有分店，尖沙咀店更不时有Live Band演出，三五知己一齐去食更有Feel，而且用OpenRice餐饮券可享精选套餐91折优惠！套餐包括自选前菜、招牌菜、海鲜、肉类、配料，而佢哋嘅原条烤鱼用嘅香料更大部分都嚟自四川。

原条泡椒烤江团鱼（图: urfoodbuddies）

上文介绍嘅大部分都系四川菜餐厅，估唔到牛头角呢间台湾菜餐厅都有得食烤鱼，而且午餐时段麻辣烤鱼更只系$70！虽然唔系原条上，但套餐包埋白饭同饮品，烤鱼亦用热炉奉上，连埋笋丝、芽菜、莲藕片、唐芹、黑木耳等配料，CP值真系唔错。

麻辣烤鱼（图: Ritakitty）

文: Cathy.H