受疫情影响,巿面上多咗唔少餐厅,甚至酒店级嘅餐厅都提供外卖自取或外送服务,最近,九龙区一间五星级酒店更加推出崭新嘅饮食体验,外送酒店级嘅大厨上门,即场帮你煮埋餸同提供服务!
呢个全新嘅家居体验服务,由酒店内嘅意大利餐厅Tosca di Angelo提供,接到预订後,每次会派出几位大厨同专业侍应亲自去到客人屋企,即场烹煮时令餐单,加钱仲可以做埋wine pairing添!安坐家中,唔使自己郁手,就食到米芝莲级嘅菜式!
餐单有两款选择,客人可以要求变更部分嘅菜式嘅,大厨亦可能会因应客人屋企嘅实际情况同可用厨具而调整餐单,好有弹性。五道菜餐单由前菜到甜品都选材严格,用料丰富。
首先出场嘅系生牛肉配芥末、朝鲜蓟、火箭菜,大厨选用意大利北部嘅生牛柳肉、熟成28个月嘅巴马臣芝士,配搭各种香菜同以海盐、黑椒等自制嘅轻身芥末酱,啖啖芝士香。配埋入过木桶age咗12个月,又toasty又rich嘅Tenuta Regaleali Chardonnay白葡萄酒,相当清新开胃,作为前菜好称职。
第二道系海胆意大利饭。制作一啲都唔简单,大厨特意选用最上乘嘅acquerello三年陈年米,以菜汤煮好饭後,再混入油封蕃茄同新鲜山葵等,食落唔会攻鼻之余又有份清新感,啲risotto仲好烟韧好有咬口。配酒首选西西里岛南部嘅natural wine:Terre Siciliane IGP Rami,呢只酒放过喺古老嘅陶瓷樽内陈年过,又浸过葡萄树乾同葡萄皮,味道复杂,带有蜜糖甜香,同时又有阵阵花香同果香。
手钓海鲈鱼配朝鲜蓟、马铃薯、乌鱼子系一道经典嘅地中海菜式,地中海鲈鱼嘅鱼皮经过慢煎後,份外香脆,而鱼肉则依然保持嫩滑。整道菜咸咸香香,最啱就系配Etna Bianci Puddara白酒,Etna以火山闻名,火山嘅土壤令到啲酒含有丰富嘅矿物,带有咸香,所以两者好夹呢~
Main course系以慢煮处理嘅烤羊鞍及羊架配罗勒、甜椒、马铃薯蓉及黑胡椒汁,羊肉粉色鲜嫩,香口软腍得嚟仲完全冇羶味,自家制嘅黑椒酱汁仲有加到羊肉汁落去㗎,够晒心思。今次终於配红酒喇,同样系嚟自Etna嘅Rosso Aetneus,矿物味重,渗有香料味,更能带出羊肉香。
最後当然要以甜品作结,系餐厅最受欢迎嘅意大利芝士蛋糕配咖啡沙冰,使用75%嘅Amedei意大利朱古力制作,口感丰富软滑,阵阵咖啡香而甜度适中,最紧要系感觉够light呀,仲有甜品酒配搭添。Moscato Della Torre,用Moscato风乾提子乾酿制,口感又rich又sticky。
留意返呢个体验服务只限晚餐时段供应,每次预订最少都要有4个人,同埋要最少3日前预订啦~
Tosca di Angelo
地址:尖沙咀柯士甸道西1号环球贸易广场(ICC)香港丽思卡尔顿酒店102楼
预约电话:2263 2700
文:Kar
相:Tom Li