On tap 嘅手工啤酒就饮得多,咁on tap嘅cocktail呢?由台湾开过嚟嘅掌门精酿啤酒,最近喺西营盘开多间分店,设咗36个tap头,其中5个就系全港首次出现嘅cocktails on tap啦。呢间分店比尖沙咀嗰间,亦多咗好多嘢食,仲有唔少系以啤酒入馔添~ 以後港岛嘅酒迷就多多个蒲点啦。
掌门常客对佢哋嘅得奖啤酒「Professor X」应该唔会陌生,酒体醇厚,麦芽、朱古力同咖啡味香,今次新餐厅就用咗呢只酒嚟整burger同tiramisu喇。先讲burger,肉扒腌制时加埋professor X 落去,令到块扒喺无论颜色、肉汁定系味道上,都再多多层酒色酒香。建议叫多杯professor X,一啖burger一啖酒,香气萦绕更耐。
至於tiramisu则系开饭仔最推介嘅甜品,用Professor X取代咖啡,但不减咖啡香之余,仲突出到酒嘅醇香。
No.53 pizza系另一道用啤酒去整嘅嘢食。选用小麦啤去搓个pizza饼底,焗出嚟嘅口感更加香脆松化,面层舖上台湾小食如飞鱼子肠、竹笋、甜辣酱等,香香辣辣咁好有台湾风味。
香煎啤酒带子就用咗酸啤「酸酸」去腌制,烹煮嗰阵又再倒多次酒去提鲜,就好似平时落柠檬嘅作用一样,而且仲多咗啲橘香,好清新。
好啦,讲酒鬼最期待嘅酒啦。头先讲过,餐厅有36个tap头,咁大部分当然系做返台湾直送嘅手工啤酒啦,平时你哋饮开嘅double IPA呀、前进都柏林呀嗰啲梗有啦,要特别介绍下嘅系一款叫「高街53」嘅新酒款,一听个名就知系为今次新店而设㗎啦~ 系一款好清新好香嘅IPA嚟,柳橙同柑橘味突出,比一般IPA更易入口。
重点嚟啦,Cocktail on tap!欧美等国已经流行咗一段时间,而香港则系第一次出现。调酒师预先调好cocktail之後,就放入tap头,用氮气或者二氧化碳将酒从桶中推出嚟。暂时on tap嘅有5款,分别都用咗啲台湾常见饮料去调制。
例如「宝岛翡翠」就系用班兰叶、椰子汁,同埋台湾出产嘅高粱酒去调制,未饮已经闻到超强嘅米香味,饮落微甜。
蓝色嗰杯同样有用到高粱,另外仲有爆谷、蓝橙糖浆同梳打水,调制出味道偏甜而酒味唔太重嘅「蓝色天使」;红色嗰杯「铁娘子」就系gin酒加玫瑰、柠檬汁、青柠汁,仲有些少盐。
掌门精酿啤酒
地址:西环西营盘高街53-65号地下富裕大厦地库
文、相:Kar