去泰國旅遊，唔少得去街邊檔口食返碗粉麵。呢間嚟自曼谷嘅泰式餐廳最近去到尖沙嘴圓方開香港首間旗艦店，唔單止地方大咗，仲有全球首推嘅即煮泰式麵檔！另有超過十款泰國都未有嘅全新菜式，「泰」識食嘅你要試喇。
Greyhound Cafe香港旗艦店選址尖沙嘴圓方，特設三間獨立貴賓房同全球首推嘅即煮泰式麵檔。由廚師即煮各款新款泰式粉麵。
泰式部隊鍋麵配龍蝦（$268）
最豐富嘅就係呢款泰式部隊鍋麵配龍蝦，單係配料就有波士頓龍蝦、帶子、青口、魷魚、虎蝦等。湯底材料全部採用泰國當地食材，連麵都係泰國媽咪麵，係「升呢」版嘅泰國街頭風味！
冬蔭功豬脾烏冬（$108）
頂級牛肉配牛丸湯米粉（$148）
另一Fusion口味冬蔭功豬脾烏冬，用豬皮彈牙嘅豬脾配搭日式烏冬同冬蔭功湯底，香辣惹味。而頂級牛肉配牛丸湯米粉就有齊半生熟和牛片同牛丸，配以泰式牛肉湯底，牛味香濃，啱哂牛魔王。
黃咖喱蟹肉飯（$198）
旗艦店亦率先推出全新菜式，部分連泰國本店都未有！好似呢碟黃咖喱蟹肉飯就先將蟹肉拆出，用黃咖喱煮過後伴以香飯同清湯，平時懶得拆蟹嘅為食友都食到啖啖蟹肉啦。
海鮮菠蘿炒飯（$148）
用菠蘿、虎蝦、魷魚、火腿炒黃咖喱飯，再加腰果同肉鬆增添香口，最後仲有兩件香甜多汁嘅烤菠蘿，賣相相當吸引。
原隻黃咖喱蟹配泰式薄餅（$498）
原隻粉絲蟹煲（$498）
蟹癡仲有呢兩款原隻蟹菜式揀返呀，原隻黃咖喱蟹配泰式薄餅用黃咖喱粉、洋蔥、辣椒同雞蛋煮原隻海蟹，用泰式薄餅點咖喱汁食一流。而原隻粉絲蟹煲顧名思義將原隻海蟹同粉絲一齊焗，粉絲索哂蟹嘅鮮味特別好食。
更多【新店直擊】： |
（左）芒果芭菲配椰子雪糕（$78），（右）芒果沙冰（$48）
芒果千層蛋糕（$78）
去到最後又點少得甜品？餐廳夏天以Mango Mania做主題，選用泰國直送，樹上熟先採摘嘅水仙芒，香甜而唔膩！特別係芒果千層蛋糕一層層忌廉同芒果醬相間，輕盈而富果香。
泰式海鮮沙律（$158）
泰式炸鱸魚（$228）
冬陰功牛腩鍋（$228）
牛筋腩粗麵（$118）
芒果糯米飯（$68）
泰式奶茶千層蛋糕（$58）
招牌椰子千層蛋糕（$58）
Greyhound Cafe
尖沙咀柯士甸道西1號圓方2樓2001號B舖
文、相：Cathy