法國頂級朱古力品牌Jean-Paul Hévin Chocolatier重新登陸香港！奪獎無數嘅法國朱古力大師Jean-Paul Hévin，師承名廚Joël Robuchon，喺法國同日本被譽為最佳朱古力師。品牌曾經喺2008年進駐香港，今次大師仲帶多咗四款新口味朱古力返嚟！

品牌最出名係Bonbon系列朱古力，今次就有三款新口味Bonbon朱古力，包括Happy蜂蜜味黑朱古力、塔那黑朱古力同馬達加斯加黑朱古力。

Happy蜂蜜味黑朱古力($27/粒)

選用Hévin大師招牌黑朱古力配蜂蜜夾心製作而成，黑朱古力夾心嘅可可比例唔少於60%，食落帶有少少蜂蜜香味，唔會過甜。

塔那黑朱古力($27/粒)

鍾意酸味的話，呢隻「塔那黑朱古力」就啱你。夾心朱古力以馬達加斯加特級可可豆製成，帶有少少紅桑莓味道，酸味同甘苦味喺口腔完美結合。

馬達加斯加黑朱古力($27/粒)

特別選用馬達加斯加年份可可豆製成，可可比例唔少於68%，帶有甘苦味同少少酸度。

扁桃仁抹茶味朱古力($280 / 120g；$360 / 140g；$520 / 200g)

呢款扁桃仁抹茶味朱古力都係新野，朱古力外層係牛奶朱古力同抹茶，入面係有咬口嘅焦糖杏仁。當然唔少得經典口味黑朱古力同牛奶焦糖鹽味朱古力。

朱古力粉($240/150g)

另外店鋪仲有供應其他人氣產品，朱古力粉沖出嚟嘅朱古力香得嚟唔太甜，Hévin大師話粉同牛奶嘅比例都好重要，約100ml牛奶配16g粉。

經典馬卡龍($29/粒)

馬卡龍就有十款口味，呢三隻秘魯可可黑朱古力杏仁、熱情果牛奶朱古力同開心果黑朱古力就最受歡迎啦。

品牌仲有松露朱古力($29/粒)、朱古力棒棒糖($78/枝)、圓形薄片裝朱古力($185 / 24片裝；$355 / 48片裝)同朱古力磚($118)等，朱古力控一定唔可以錯過！

Jean-Paul Hévin Chocolatier

地址: 香港中環國際金融中心商場一樓1041-1049號舖

文: Yanica

相、片: Tom Li