水果入馔 农家蟹皇配苹果叉烧 深水埗新开健康串烧居酒屋(有片)
2020-03-02

平时讲到养生通常都系中菜多,原来日本菜都可以加入养生元素!呢间新开嘅串烧居酒屋就主打一系列以水果入馔嘅定食同小食,酸酸甜甜够开胃而且可以减少使用砂糖。串烧都好有特色,招牌酿鸡翼先拆骨再酿入鸡髀肉,皮脆肉弹!
 


夜馆位於深水埗,老板请嚟有多年日本餐厅经验嘅大厨坐阵,供应全日定食、小食、串烧等。选择唔算非常多,但大部分都加入创新元素,好似用苹果同橙调味,减少用糖同日本调味料,更健康之余亦可以降低成本,尽量以街坊价吸引大家嚟食!
 


农家蟹皇捞饭配苹果叉烧($98)

厨师介绍嘅系呢份农家蟹皇捞饭配苹果叉烧全日定食,农家蟹皇其实系用农作物,好似甘笋或者南瓜加上薯仔,加上蟹汁等调味再压成泥,蔬菜嘅甜味加上蟹汁嘅咸鲜,捞饭食的确一流。
 


而叉烧就用梅头肉,以餐厅自家调配嘅酱油加新鲜苹果片熬煮,中间一滴水都无加到。叉烧软腍松化,带苹果香所以完全唔腻。而且全日定食包埋味噌汤、前菜、沙律/水果,好似拍摄当日系橙,厨师会剥埋果肉出嚟,好细心。
 


果味鸡扒丼($55)

另一推介系果味鸡扒丼,叫就叫鸡扒丼,其实有两只鸡翼加鸡扒,加自家制苹果酱油煎煮後再加入橙肉。秘诀系加咗少少蔗糖,咁就完全唔使加任何鸡粉或者味精。鸡扒肉嫩多汁,加埋甜甜地嘅酱油又系最啱送饭。
 


十胜豚丼($58)

小店最受欢迎嘅定食之一,选用十胜豚肉煎至金黄色,再加入秘制烧汁:里面有酱油、麦芽糖同水果,食落多咗一分猪肉嘅脂香,配埋烧汁香而唔腻。
 

更多【新店直击】:
1. 卡邦尼口味Pizza!中环新开抵食意大利手工薄饼专门店
2. 20斤鸡熬浓汤+冰岛鳕鱼胶 太子新开花胶鸡米线专门店
3. 九龙湾泰菜推泰式小食及啤酒放题 港篮球员兼老板:香港人都要加油

 

夜馆特色酿鸡翼($38)

居酒屋另一主打系串烧,呢款酿鸡翼就先拆咗鸡翼一边骨,再酿混合咗山药同杞子嘅鸡髀肉!厨师特别加入药膳元素,山药有助补阴生津,杞子就可以养肝明目。烧嘅时候亦系用无防腐剂嘅酱油,食起嚟皮脆肉弹,而且仲有肉汁啊。
 


迷你鸡春卷($38)

同样系混合咗山药同杞子嘅鸡髀肉,今次拍档改为葱同春卷皮,炸成金黄香脆嘅迷你鸡春卷。特别配搭沙律菜同沙律酱畀大家点埋一齐食,少肉多菜,咁就算系炸物都可以食得健康啲啦。
 


盐烧牛舌($38)

盐烧牛舌就唔少居酒屋或者烧肉店都会有,呢度嘅牛舌烧过亦的确相当弹牙富牛香。不过重点其实系加入用搅拌机打碎嘅橙肉嘅酱汁,酸味清新解腻又唔会盖过肉香,值得一试。
 


烧焦糖菠萝($58)

最後讲到串烧同水果,又点少得烧菠萝?菠萝Juicy微酸,加上焦糖嘅甜味,无论做开胃小食,定最後清一清味蕾嘅甜点都咁啱。
 





夜馆
地址:深水埗长沙湾道54号地下4号舖




文、相、片:Cathy

关键字
深水埗
定食
十胜豚丼
串烧
特色酿鸡翼
居酒屋
夜馆
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
5天前
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
油麻地新开小木屋Cafe 叹西日Fusion龙虾汤乌冬配咖啡
2020-09-08