呢間牛肉麵店，本先係開喺大埔嘅，最近就搬咗去西九龍中心同旺角開店，仲因為餐廳門口嘅一塊「五不招待」牌，引嚟網上好多嘅討論。

查實佢哋喺大埔開嗰陣都已經貼咗紙出嚟話有3種人唔招待㗎喇，今次就加多2類人，同埋夾雜咗啲粗口咁囉，5類唔招待嘅食客包括嗰啲嫌貴、嫌慢、嫌少、趕時間同囉囉唆唆嘅人，老闆李先生解釋話定啲啲規矩，其實都係想大家食得開心，唔想啲食得唔開心嘅人入到嚟影響咗其他想食得開心嘅人喎。

講返餐廳嘅嘢食，嚟得呢度最好梗係食牛肉麵啦，特別係「勾魂奪魄麵」，即係牛脷麵呀。唔好睇少呢碗麵呀，製作嘅細節位都唔少。首先一定要用夠滾嘅水去煮，煮之前仲要將啲麵揚散啲，令麵條變得條條分明，煮完之後仲要過冷河同加麻油，老闆話加麻油可以令啲麵唔會黐埋一齊。而厚切嘅牛脷亦會稍微落鑊煎香過，加埋秘製醬汁、白胡椒等等先至上碟，所以食落塊牛脷都好香口，而且厚得嚟又夠腍身。麵條索晒啲湯好入味，都幾爽口，要趁熱食呀。

而自命係牛魔王嘅，就可以嗌返碗牛魔王麵。一碗最少有3種牛嘅部位，至於係邊幾種，就要睇當時邊種新鮮出爐喇，可能係牛肉、牛筋、牛腩、金錢肚等等都唔定。

餐廳另外仲有黯然銷魂肉燥飯同秘醬炒腸粉等等，雖然舖名就叫好難食，但食落又唔係咁差啫。咁點解要叫好難食？老闆話因為喺佢心目中，冇完美嘅麵，只有合唔合格嘅麵，所以叫好難食，係仲有上升嘅空間咁解。

BTW，佢哋對客人有五不招待嘅規矩，對員工一樣有七不出嘅規條，未到火侯或者過咗火侯、湯未夠熱、麵未夠熟或者太熟、配料唔齊同埋食物變壞嘅嘢全部都唔准賣畀客㗎。

大埔好難食牛肉麵
地址：旺角上海街497號地舖

文、相、片：Kar