开始数唔到几耐冇飞过去韩国喇…...不过唔使飞都可以叹到多款地道嘅韩国美食?!Yesssss!旺角最新开咗间成2700尺嘅韩国食品专门店呀,一站式,由韩国伴菜、冻肉到熟食便当等都齐晒!
呢间专门店,内有3大韩国美食品牌,分别系专卖传统小菜同腌料嘅BANCHAN、香港首创韩国酱腌肉店Chef & Taste,同埋提供多款熟食便当选择嘅O'taste,全店有超过200款食品。
首先梗系唔少得好多人都大爱嘅韩式饭卷啦,又方便又好食。师傅每日新鲜制作嘅饭卷,有多款口味,例如芝士紫菜、辣炒猪肉紫菜饭卷等,实净足料。
望住即场制作嘅猪肉泡菜煎饼,由粉团到兜下兜下变成香喷喷嘅煎饼,系吸引嘅,微辣开胃。另有多款韩式小食,例如薯仔炸球、甜辣炸鸡粒、辣炒年糕等。
正餐又点少得呢?烤牛肉拌饭、烤牛肉一品便当……都系lunch嘅好选择。
自命系韩粉嘅,系咪好似啲Oppa咁锺意餐餐泡菜先?呢度提供嘅伴菜、酱菜、腌制食品等有超过50款,包括泡菜、辣萝卜粒、辣炒鱼仔之类,仲有酱油蟹呢!每日由自家厨房新鲜制作,全部都可以直接食又得,加入火锅或其他菜食中煮又得。
无论打边炉定系韩烧,烤肉都不可缺少。呢度有多种烧烤肉类供应,好似韩国直送冻肉、调味腌肉、烤猪手、LA肋骨、牛里脊肉、猪肉饼、烤五花肉,各种韩式火锅食材同冷冻汤类等等,所有调味同腌制都系由韩籍厨师以正宗韩式酱汁亲手腌制。
新店开业,仲有一系列限定优惠,其中又抵又好玩嘅,就有$99韩国零食幸运福袋,一手拎住个箱,一手任执零食,执满个箱,放到几多就可以拎走几多!
一站式韩国食品专门店
地址:旺角洗衣街85号
文、相、片:Kar