时新汉堡饱重返红磡!二哥:百分百做返以前味道
2018-03-21

烘过嘅芝麻包、手打牛肉汉堡扒、再加秘制沙律酱,你系咪都挂住呢种港式汉堡嘅滋味?经典港式汉堡代表之一时新之前结业嘅时候唔少粉丝同街坊大叹可惜,好消息系二哥决定重出江湖,今日开始试业!价钱系点?有咩嘢食?仲系咪以前嘅味道?即睇开饭仔直击! 
 

「百分百信心可以做返以前嘅味道」


二哥锺奇涛

位於黄埔新天地嘅时新汉堡饱由人称二哥嘅锺奇涛主理,而另一位大厨亦系八十年代就加入时新快餐店嘅康师父。唔少旧舖夥计亦嚟到新店帮手,所以二哥非常自信咁讲佢有百分百嘅信心可以做返以前时新嘅味道。
 


开放式厨房令食客见到制作汉堡过程

问返转头,点解要开新店?二哥回答喺红磡做咗几十年汉堡包,旧店结业後好多粉丝同朋友都希望佢地可以继续营业,而太太同仔都支持佢将港式汉堡继续发扬光大。第一选择都系黄埔区,幸好黄埔新天地呢度有合适嘅铺位,所以就决定重新开业。
 

经典港式汉堡配方


新店餐牌一部分

睇一睇新店餐牌,港式汉堡、饭/意粉、小食等都有保留,大部分价钱比旧店贵$2-3。汉堡可以拣牛肉或者猪肉,配料选择由最基本嘅单层汉堡包,到以前最多後生仔锺意食嘅双层汉堡芝士蛋包都应有尽有。
 


创办人留落嚟嘅理念,後请书法家挥毫,挂喺新店一角

店名背後亦有意义,时新快餐店创办人锺冠球(锺奇涛爸爸)当初开办时新嘅理念系「时尚风采 与时并进 新鲜新意 薪火相传」,既要追上时代嘅步伐,亦要求食材新鲜。因此新店依然采用新鲜牛肉,以手打方式制造汉堡扒。
 


汉堡包依旧选用嘉顿出品


秘制沙律酱


单层汉堡包($20)

还原基本步,时新一开始就系靠呢个简单而抵食嘅汉堡包成名。嘉顿芝麻汉堡包烘过後,夹住即点即煎嘅汉堡扒同秘制沙律酱。汉堡扒厚度适中,咬落依然有肉汁,而且相当松化。秘制沙律酱味道酸甜,里面有一粒粒青瓜等食材。
 


双层汉堡芝士蛋包($30)

<而後来唔少大学生同街坊推介嘅,系呢个材料叠到相当高嘅双层汉堡:汉堡包、芝士片、汉堡扒、秘制沙律酱、煎蛋、再加汉堡扒、秘制沙律酱同包,食落更加Juicy。开饭仔唔系忠实粉丝,答唔到大家系咪真系100%以前嘅味道,不过可以肯定嘅系的确系港式汉堡嘅风味。
 

饭类小食继续有


炸薯条($20)


炸鸡髀($25)

另一个港式快餐Icon就系波浪纹薯条同大大只炸鸡髀!新店当然亦会继续供应,炸到金黄香脆,系明知热气但都会忍唔住食哂嘅Comfort Food。另外仲有炸双肠($15)、炸吉列猪扒($20)、炸吉列鱼扒($20)等选择。
 


汉堡扒双肠饭($55)(送咖啡/奶茶,罐装汽水+$5)

新店亦非常重视粉丝意见,因此新加咗部分老主顾希望再次回味嘅汉堡扒双肠饭!同其他饭或意粉一样,可以选择加黑椒汁、咖喱汁或茄汁。
 

新产品登场


咸柠七($23)

新店亦有几款新嘢食,包括儿童餐($35)、香蒜豉汁排骨饭($50)、秘制红烧肉饭($50)同咸柠七($23)。增加新产品一方面系为咗餐牌选择更多元化,另一方面亦系为咗迎合附近街坊同上班族嘅需要。
 


秘制红烧肉饭($50)

好似两款碟头饭就系希望大家午饭时间多两个饱肚之选,而儿童餐就系方便粉丝或者街坊带埋小朋友嚟食港式汉堡。睇得出二哥同一班夥计都非常乐意听大家意见然後改进,即日起至星期五(3月23日)系试业阶段,预计每日卖200-300个汉堡包,售完即止。大家有任何意见嘅话不妨多啲向佢地反映!
 





 

更多【饮食潮流】:
1. 西湾河太安楼吞拿鱼专门店 抵食拖罗海鲜丼
2. 复古情书主题+花香心形厢座 中环新开浪漫酒吧餐厅
3. 旺角新开!日本浮夸宫崎A4和牛锅



时新汉堡饱
红磡德康街398-402号黄埔新天地家居庭地下G22-G23号舖
*即日起至3月23日 15:00-20:30为试业阶段,汉堡包先到先得售完即止,3月24日8:30正式开张




文、相、片:Cathy

关键字
时新
汉堡包
港式汉堡
红磡
黄埔
炸薯条
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
5天前
悠闲时光 9月份下午茶推介
2020-09-02
【9月生日优惠】最低至半价!生日平食放题.韩式炸鸡
2020-09-02
Stephy新开茶饮店 台湾回流 期间限定 联乘Snoopy推棉花糖朱古力特饮
2020-09-11