又又又有間日本過江龍嘅拉麵店喇，今次呢間係嚟自東京嘅，屬於濃郁派系嘅朋友，佢哋最出名嘅係豚骨白湯湯底。
首先要介紹嘅一定係神山沾汁麵。湯頭用咗大量嘅豚骨，混埋上乘豚肉，用上多種日本魚介、秘製醬油去調味，仲用慢火熬製超過12個鐘！
至於沾麵則較粗身，都索湯嘅，而兩件厚燒豚肉嘅外皮都燒到焦焦地，食到甜甜地嘅醬汁味。
另外都有唔少小食，例如神山湯餃子咁，係香港度首創嘅，亦係得香港先有嘅限定菜式。餃子先煎後湯，每日用豚肉新鮮包製，煎香咗之後，再放落韮黃、菠菜同豚骨湯入面，所以食出嚟都有淡淡嘅肉湯味。
燒鱈魚棒拎嚟佐酒幾啱呀，鱈魚棒面頭搽咗多層混合辣汁，日本醬油等等，薄薄地脆脆地。
唐揚豆池魚就用咗些少天婦羅粉、香味粉咁，炸到脆卜卜，幾香口。
神山麺屋
地址：觀塘觀塘道418號創紀之城五期(apm)2樓L21B號舖
文、相：Kar