投奔盛夏 7-8月份下午茶推介
2021-07-08
踏入炎热嘅7、8月,想出街同朋友聚吓又唔想留喺户外,搵个有冷气嘅地方叹返个afternoon tea就最爽!今个暑假,唔少酒店餐厅都相继推出夏日下午茶,无论系冰火主题、卡通系列、花果主题同百食不厌嘅抺茶系列都有,食完真系透心凉~

冰火甜品下午茶 普庆餐厅  

甜魔必试嘅甜品主题下午茶!以冰火甜品配搭作主题,最开心当然系可以同时任食Mövenpick同Häagen-Dazs雪糕啦,另外仲有多款暖笠笠甜品包括棉花糖香蕉布丁、朱古力核桃布朗尼、抹茶心太软、烤香梨批等轮流供应。即造甜品专区亦够晒诚意,有专人即场制作日式梳乎里班戟同香脆窝夫,配埋冰冻雪糕食,一暖一冷,系享受呀~餐厅亦有准备咗几款咸食主菜畀大家拣,咁就无咁易腻喇。

供应时间: 即日起至8月31日(只限星期一至五,公众假期除外),下午3时15分至5时15分价钱: 每位$148起

比得兔夏日奇缘下午茶 Lion Rock 

呢间型格餐厅酒吧同近排上映嘅电影《比得兔2:走佬日记》联乘推出夏日奇缘下午茶,所有咸甜点心都以故事同角色为灵感,好似走咗入电影世界咁,Fans一定唔可以错过。咸点方面有由虾多士变奏而成嘅炸芝麻三文鱼手指伴沙律酱、香脆惹味嘅烩鸭肉酥盒;甜点当然必试香橙甘笋芝士蛋糕伴朱古力比得兔同多款蛋糕。两位或以上仲会送童话曲奇。下午茶有埋外卖同外送服务,就算安坐家中都可以享用到四层架下午茶!

供应时间: 即日起至9月30日,下午2时半至5时价钱: $270一位 / $508两位

白桃海胆蜜语下午茶 PitStop

海胆同白桃嘅配搭你食过未?呢个下午茶以鲜甜日本海胆同清爽白桃为主题,包括日本海胆啫喱海鲜杯、日本海胆龙虾酥盒、日本海胆意大利辣肉肠薄饼等,满满海胆鲜味喺口中爆发!食完浓厚嘅海胆想清吓味蕾,有多款日本白桃甜点选择,白桃士多啤梨慕丝蛋糕融合白桃同士多啤梨嘅自然果味,味道清甜有惊喜,另外仲有鲜白桃佐白酒寒天、白桃芒果挞、白桃云呢拿奶冻同白桃鲜忌廉蛋糕卷,白桃控必试。

供应时间: 即日起至9月30日,下午3时至5时30分价钱: $628两位

幽香抹茶下午茶 星幕 

由於香港地实在太多抹茶控,所以抹茶主题嘅下午茶系永远都咁有人气!今次呢间餐厅就同护肤品牌合作推出幽香抹茶下午茶,所有甜咸点都以京都宇治山政小山园抹茶粉入馔,味醇甘香。有五款甜品同五款咸点,甜品有抹茶英式松饼,香脆松化,牛油同抹茶香气恰到好处,另外仲有抹茶双重芝士蛋糕同抹茶焦糖鸡蛋布甸等。咸点都几有特色,如脆炸大虾配抹茶酱,抹茶酱有助中和炸物油腻感,焗三文鱼配抹茶忌廉汁同抹茶蟹肉酱全麦多士都比想像中夹!凡享用Tea set嘅朋友都可以获赠品牌价值高达HK$2,953之礼遇添~

供应时间: 即日起至9月30日,下午3时至5时
价钱: 星期一至五HK$288(两位用),星期六、日及公众假期HK$308(两位用),另加一服务费

夏日「茉」香「果」园下午茶套餐  湾景厅 


想轻盈啲,食返个以花同鲜果为主题嘅下午茶就啱晒!夏日「茉」香「果」园下午茶套餐嘅点心,以清香淡雅嘅茉莉花同多款鲜果制成,包括三文鱼带子芒果他他、和牛面颊肉配苹果同焦糖洋葱、百花炸蟹钳配茉莉花蛋黄酱等,甜品有茉莉花抹茶慕丝蛋糕、茉莉花西瓜果冻、芒果芝士卷,食完一啲罪恶感都无。

供应时间: 即日起至8月31日,逢星期六、日及公众假期下午2时30分至5时30分供应
价钱: 198一位 / $388两位


文:Yanica


关键字
下午茶
抹茶
甜品
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【2021生日优惠】持续更新!9月寿星叹Omakase送寿司蛋糕+清酒
2021-08-31
【随时更新】零食速报 每周新款零食、酒品点评
7天前
【特约分享】Happy Hour饮番杯Schweppes®期间限定特饮!9间必去铜锣湾餐厅(下)
2021-08-31
Chill住叹Tea!9月份下午茶推介
2021-09-06
8月份好评餐厅十强
2021-09-08