旺角有唔少楼上Cafe，但新开呢间一改固有印象，装修以白色同浅木为主、采光度高，简约风格加上植物装饰，有种日系清新感。饮品同甜品选择都相当多元化，例如手冲咖啡有嚟自日本唔同烘焙度嘅单品豆选择，朱古力都有唔同产地浓度，甜品仲有超过10款任拣！
 

Bestow位於旺角登打士广场，店名有给予、传递嘅意思。店铺另一边系选物店The Tabibito，店主指希望畀一个空间大家嚟买嘢、食嘢同饮嘢，同时Cafe用到嘅部分食器都系嚟自选物店，所以嚟到不妨留啲时间欣赏一下职人作品。
 

血橙椰子慕斯蛋糕（$60）

蛋糕部分以日式食材为主，亦有以当季食材入馔嘅选择，例如呢个血橙椰子慕斯蛋糕就用咗坊间少见、又好啱夏天食嘅血橙，血橙多汁清甜、仲带少少好似西柚咁嘅涩味。唔单止蛋糕上面有血橙果肉同自家制橙乾，白色嘅椰子慕斯里面仲有血橙吉士同原味蛋糕。可惜血橙吉士嘅橙香偏淡，以至味道层次较少。
 

焦糖鸡蛋布丁（$45）

鸡蛋布甸每日新鲜蒸焗而成，质地相当Q弹而不失绵密。自家制作嘅焦糖浆属於苦甜风味，後韵以焦香为主，同布甸嘅鸡蛋香夹得嚟又甜而不腻。加上忌廉同车厘子点缀，以玻璃高脚杯奉上，好有日本吃茶店Feel嘅呢。
 

日本柚子果冻，青瓜蟹肉，酸种面包配沙律菜（$88）

轻食就有贝果同酸种吐司选择，呢款就用日本柚子汁制作果冻，再加柚子皮、柚子果肉，配搭大量蟹肉舖喺酸种面包上面。柚子酸甜略苦嘅清香可以中和蟹肉嘅咸味，再加上青瓜嘅爽脆，同本地制作、外脆内软嘅酸种面包，整体味道清爽。
 

Filter Coffee（$70起）

咖啡分为意式咖啡同手冲咖啡，意式咖啡选用大阪LiLo Coffee Roasters为Cafe调配嘅House Blend豆，有轻微果酸同朱古力风味，味道平衡。手冲会定期更换Roaster，现时有嚟自大阪嘅LiLo Coffee Roasters，同东京嘅Onibus Coffee。比起坊间一般以Nutty同Fruity区分，呢度会偏向以烘焙深浅度嚟划分。
 

拍摄当日试嘅系LiLo嘅埃塞俄比亚浅焙豆，热饮嘅时候会有柠檬嘅酸味，放凉至室温後酸味减少变得似西柚，口感较薄。贴心点系咖啡师磨好咖啡粉後会保留一部分同咖啡一齐上枱，既可以畀客人闻香，如果想自己买咖啡豆嚟冲亦可以参考返磨粉嘅粗幼度！
 

Single Origin Chocolate（$53/冻，$48/热）

唔单止手冲咖啡用单品咖啡豆，朱古力亦系用单一产地嘅朱古力，有带花香、偏酸嘅厄瓜多尔66%，同果香、可可味为主嘅秘鲁72%。建议如果第一次饮单品朱古力，或者怕酸嘅朋友可以同开饭仔一样拣秘鲁72%，可可香浓郁，口感厚到有少少浆口咁，朱古力控必点。
 

选物店The Tabibito，主打各款职人打造生活杂货，包括咖啡店用嘅各款器皿

Bestow
地址：旺角登打士街43H号登打士广场5楼

文、相：Cathy.H