寿喜烧套餐最平$138!观塘新开抵食日式定食+寿喜烧餐厅
2021-02-25

挂住日本美食、特别系寿喜烧又想锡住荷包嘅话,观塘呢间新店就系个好推介。Lunch Set嘅寿喜烧锅最平$138就食到!如果想试正统关西风味,由专人用铁锅逐片烧,每位都系$258起!另外佢哋嘅日式定食都系定价相宜又好味,特别系烧肉套餐绝对满足到食肉兽呀。
 


喰楽位於观塘区嘅工厦当中,地方唔大,胜在枱同枱之间都有屏风,装修简约清雅,感觉都几舒服。餐厅只有四张四人枱,建议想食嘅话预先订座会比较好。主打日式寿喜烧,而且有齐关东同关西两种唔同风格,加上可以自选牛肉种类,丰俭由人。
 


关西寿喜烧($258/位起)

由最平嘅美国产牛肉($258/位)、澳洲产M9和牛($358/位)到最贵嘅日本产A4和牛($458/位)任君选择。而日本产和牛会按时令挑选唔同产地嘅A4至A5和牛,好似最近供应嘅就系熊本县A5和牛!套餐包括三式前菜、野菜拼盘、特式饭点,同是日甜品。
 



关西寿喜烧会由店员帮大家烧肉,会先以牛油同葱起锅,然後加入牛肉同少少酱汁烧烫至半熟,先试原味。餐厅选用嘅系和牛肉眼,脂肪分布平均,肉质软嫩入口即融!之後就会加入野菜同酱汁,先以野菜解腻,同时将蔬菜嘅甜味融入酱汁当中,再烧牛肉嘅话味道就会更加香甜。特别系同煮至软腍嘅洋葱一齐食,甜味同肉味都更突出!
 

更多【新店直击】:
1. 尖沙咀新开未来感型格酒吧餐厅 推介烟燻油甘鱼薄切配三文鱼籽
2. 日本吉列牛排店京都胜牛进驻铜锣湾 黄金六十秒炸法 推介京都胜牛三味套餐
3. 注册营养师开设!中环新开健康轻食Café 红菜头朱古力、原个牛油果配酸种面包

 

(午市定食)关东寿喜烧锅定食(牛肉$138起,北海道豚肉$108)

想食平啲嘅话就可以下昼嚟食关东寿喜烧锅,同样有美国产牛肉($138)、澳洲产M9和牛($168)同日本产A4和牛($198)选择。关东风格嘅寿喜烧偏Shabu Shabu形式,汤底一样香甜,不过味道会比关西嘅淡啲啲,餐厅会先加野菜同汤底一齐煮至八成熟再上枱。
 


关东寿喜烧锅用嘅和牛系肉味比较浓郁嘅肩胛肉,放入汤底滚十几秒左右就食得,半熟食落特别柔嫩富肉香!记得点埋日本生鸡蛋,蛋浆唔单止令牛肉口感更软滑,亦可以降低温度,即刻食都唔会辣口嘛。套餐附三式前菜、日本珍珠米饭及甜品。
 


(午市定食)日式烧肉定食($148起)

唔食寿喜烧嘅话,餐厅亦有供应定食套餐,好似呢款日式烧肉定食,就有齐烧肉、三式前菜、日本珍珠米饭配紫菜同甜品。主角烧肉就可以拣澳洲产M9和牛100g($148)或者日本产A4和牛100g($198),拍摄呢份用嘅系熊本A5和牛嘅肩胛肉,油脂较少而且带少少筋,食起嚟更有咬口,肉香浓郁。
 


烧肉建议点少少酱汁再配饭食,酱汁系餐厅自家制,用大量苹果、洋葱等加牛肉熬制,味道香甜可以带出肉味。而饭选用日本珍珠米,加上紫菜碎同芝麻增添香气。而烧肉当中其实仲有腌菜,都系爽口嘅木耳、胡萝卜等,味道微酸可以解腻。
 


有无留意到定食同套餐都有附上三式前菜?同样都系餐厅自家制,每日都会更换唔同款式,好似拍摄当日就有木鱼丝鸡肉卷、柚子大根,同樱花虾贝柱沙律,味道清爽又好有日本Feel。
 




喰楽
地址:观塘开源道60-62号骆驼漆大厦3期9楼H号舖




文、相:Cathy

关键字
观塘
寿喜烧
烧肉
日式定食
喰楽
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2021-05-03
【2021生日优惠】持续更新!5月食日本直送海鲜送西班牙红/白酒
4天前
带妈妈味游异国!母亲节Brunch六选
2021-04-20
期间限定$1抹茶菠萝包、$3竹炭菠萝油 佐敦新开 2500 尺新派点心小厨
2021-04-30
荃湾新开 人气名古屋班戟分店 首推冲绳紫薯梳乎厘班戟+班戟汉堡
2021-04-15