南丰纱厂新餐厅进驻 健康素食店、老字号甜品新Line(有片)
2018-12-27

荃湾南丰纱厂唔单止有得打卡,里面亦有唔少餐厅可以畀大家医肚。上次就介绍咗4间特色Cafe,今次介绍4间餐厅,由健康素食到中式糖水,台式茶饮到本土传统面食,总有一间啱你!
 

Farm to table素食餐厅 Joie Plant-based Bistro


主打天然同健康嘅素食餐点,特别在有租用到南丰纱厂天台嘅耕作园地,希望长远可以做到Farm to table!以突出食材天然原味为原则,未有采用素芝士或素肉。
 


柚子、车厘茄、本地水耕菜沙律(配面包或中东米)($68)

以柚子同餐厅自家制油醋为主调,酸爽开胃。油醋比一般沙律酱嚟得清新,而唔会盖过蔬菜原味。选用本地水耕菜,更新鲜所以口感亦更为爽脆。
 


松露·番茄乾·高野豆腐扁意粉($98)

素食唔等於味道寡,呢碟意粉就用咗松露酱同日晒番茄乾调味,带咸香同少少酸味又不失清新。而高野豆腐类似蜂巢豆腐,好似海绵咁吸收哂酱汁嘅味道,质地绵密有弹性。意粉上面仲有金箔点缀,趁凉之前影多两张相打卡最啱!
 


八丁味噌野菌意大利面($88)

野菌同样香味十足,呢度嘅大厨就将其长时间炒制,再配搭日本八丁味噌,特点系经过长期酿造因而鲜味浓厚。味噌咸鲜味同野菌香平衡,香而不腻。
 

九龙城甜品老字号新面貌 茂一茂


九龙城28年历史中式甜品店地茂馆甜品由第二代接手,进驻南丰纱厂後开设新Line茂一茂,糖水跟返地茂馆嘅食谱,亦新增各款手调饮品、小食同多士。
 


鲜磨蛋白杏仁茶($29)

用玻璃杯奉上嘅系最出名嘅鲜磨蛋白杏仁茶,用南杏生磨後加入蛋白煮热。即叫即煲所以可以闻到好香杏仁味,而唔系奇怪嘅药水味,呈糊状所以口感比较厚身,蛋白亦相当滑。蛋白杏仁茶有润肺止咳嘅功效,而且杏仁可以帮助抗氧化,所以亦有美颜效果呀。
 


桑寄生莲子蛋茶($27)

另一款热卖传统糖水,用桑寄生、莲子、鸡蛋同少少普洱茶叶煲成,虽然闻起嚟有少少药材味,但饮落味道甘甜,无涩味所以唔会难入口。而且桑寄生有多款功效,包括行气活血、宁神安眠!
 


擂沙汤圆($21/5粒)

黑芝麻汤圆亦系店家自己手搓,粒粒都系心思。配以用花生、白芝麻、砂糖打成嘅花生糖碎,香味十足之余亦有口感层次,系大人小朋友都会锺意嘅口味。
 

更多【新店直击】:
1. 粉红少女心 韩国人气甜品店登陆 大热士多啤梨奶油卷
2. 承传婆婆台湾食谱 尖沙咀新开便当小食外卖店
3. 喜茶来了!沙田店现已开业 香港menu率先试

 
手冲茶配星球甜品 木卫二铸茶所


呢间嚟自台北淡水嘅茶饮店主打人手用紫砂茶壶冲嘅台湾高山茶,比铜锣湾店更大,唔单止可以坐低慢慢饮茶,仲供应多款精致甜品!
 


奶霜法芙娜($49)

店家最受欢迎嘅特饮,用Valrhona黑朱古力配搭蓝伯爵茶,所以饮落无想象中咁甜腻,反而黑朱古力嘅香同蓝伯爵茶嘅甘都几突出。而厚滑奶霜上面有Oreo粒粒增加甜度,建议点正常甜度或者少甜就得喇。
 


初芽惊蛰乌龙($47)

手冲现泡茶选用台湾茶叶,而且用紫砂茶壶冲泡,无论热饮定冻饮都可以品尝到最纯粹嘅茶香。初芽惊蛰乌龙意指喺春天惊蛰采摘嘅乌龙茶叶,经过低火烘焙後,茶汤金黄清澈,入口清爽带淡淡回甘。
 


金星($68)

舖头唔单止挂住盏月球灯,连特色甜品都系以星球做主题!Bling Bling金色卖相嘅系金星,敲开朱古力里面系香蕉焦糖朱古力布蕾,上面嘅朱古力相当幼滑,配埋下层嘅香蕉蓉味道香甜,亦有脆脆等增加口感,卖相同味道同样出色。
 


(左)榛子朱古力泡芙($34/3件),(右)马卡龙($38/3件)

Bite Size甜品亦有惊喜,榛子朱古力泡芙外面系朱古力脆皮,里面嘅榛子朱古力馅够香滑,略嫌泡芙皮淋咗啲。而马卡龙有两Set口味选择,分别系云呢拿、朱古力、咖啡各一,同开心果、覆盘子、柠檬各一。
 

驰名巷仔云吞面 新大光灯


由红磡嘅一个街边档开始,五年前入舖改名新大光灯,但一样系卖细蓉,即系港式云吞面。亦有粥、肠粉同小食,系附近唔少上班一族嘅饭堂。
 


鲜虾云吞汤面($33)

招牌细蓉嘅亮点云吞放喺弹牙蛋面下面,大细啱啱好可以一啖一粒,里面有虾肉粒、猪肉同大地鱼粉,以虾肉嘅弹牙为主,带少少猪肉油脂香,的确做到皮薄馅靓。不过调味略咸。而汤底就用大地鱼、猪骨、虾头、虾子、罗汉果等熬制六至七个钟,清澈鲜美。
 


炸两($28)

呢度另一招牌菜系布拉肠粉,而且系即叫即拉,做到雪白透薄。配粥最啱点份炸两,油炸鬼够香脆,再加埋豉油甜酱就已经无得输。
 


Joie Plant-based Bistro
店号:1楼119
 


茂一茂
店号:地下G13
 


木卫二铸茶所
店号:1楼118
 


新大光灯
店号:地下G14
 

南丰纱厂
地址:荃湾白田坝街45号
 

睇埋Cafe介绍!
→ 荃湾新地标南丰纱厂 4间特色Cafe全介绍




文、相、片:Cathy

关键字
荃湾
南丰纱厂
素食
甜品
糖水
云吞面
Joie Plant-based Bistro
茂一茂
木卫二
新大光灯
新店直击
走在最前线,为大家搜罗及报道有关新开餐厅的资讯。
餐厅资料
更多
收起
本月热门
【随时更新】便利店寻宝 每周新品速报
2019-11-29
【2019圣诞】早鸟优惠! 圣诞自助餐推介
2019-11-27
秋风起!5间大闸蟹放题食店集合
2019-11-19
【2019圣诞】年尾叉电 圣诞下午茶集合推介
2019-11-19
【2019圣诞】约会之选 圣诞市集推介
2天前