午後小时光 悠闲锯扒叹海鲜 荃湾海景酒店餐厅
2021-06-08

锯扒、食海鲜,边个话晚餐先得?一个识锡自己,对自己好嘅人,午餐都一样会食得丰富。位於荃湾蓝巴勒海峡侧边嘅酒店,坐拥宽阔海景,几间餐厅都有唔同嘅特色午餐,今日就介绍其中两间畀大家去享受住先。

Café Circles (荃湾) 

楼底高嘅餐厅,通常都可以畀到人一种空间感同治癒感,位於荃湾酒店内嘅呢间西餐厅,正好就系例子之一,加上餐厅时尚嘅设计同开扬嘅景观,绝对系lunchtime放松嘅好地方。餐厅近日推出多款午巿单点美食,有牛肉、亦有海鲜选择。

焗波士顿龙虾(半边)配柠檬牛油汁及黑松露意大利饭

有别於一般嘅龙虾意大利饭,啲意大利饭唔系散开晒,而系整整齐齐合成一条长方形状,卖相特别亦令人留下深刻印象。龙虾烧香至金黄色,肉质依然保持嫩滑弹牙。松露味道本身已经够香够突出,淋上柠檬牛油汁则有中和作用,多咗一份清新,少咗一份腻感。


慢煮红酒牛面颊意大利粉

先以红酒、香草等腌制过嘅牛面颊肉,再经慢煮两个钟处理,保留到大量肉汁,入味之余口感又软腍。师傅仲特意为咗客人可以啖啖都食到牛肉,将之切成粒状。


焗咖哩牛脷饭配煎蛋

咖喱饭上枱时色泽金黄,加多只煎到靓一靓嘅太阳蛋喺面,卖相吸引。大约用咗十款香料调制嘅港式黄咖喱,香而不辣,厚切嘅牛脷相当惹味,笃穿埋只蛋,等啲蛋黄浆慢慢流埋入去,层次再昇华。


烟三文鱼露笋温泉蛋海胆汁意粉

几样食材配搭都咁吸引嘅烟三文鱼露笋温泉蛋海胆汁意粉,加入白酒调味,酒精煮完後虽然已被挥发,但依然有淡淡嘅酒香留低。师傅同样为咗方便客人可以啖啖肉,就将三文鱼切丝处理。而海胆汁亦刻意煮得杰身少少,令到意粉更容易挂汁。


鲍鱼花胶石头锅汤饭

呢个石头锅汤饭认真大制作,又花胶又鲍鱼落足料,舖到满一满。而要个汤熬到变白色,啲鱼肉精华同鲜香出晒嚟,至少都要熬两个钟走唔甩,难怪咁清甜啦。




天空酒廊 (荃湾)  

想要海景餐厅,唔一定要中环或尖东先有。荃湾呢间酒店靠近海边,41楼嘅酒廊设有落地大玻璃窗,一样可以俯瞰开扬嘅海景,黄昏时更可以欣赏到日落。餐厅主力供应午巿铁板餐同下午茶。

美国安格斯肉眼扒 (220g)配薯条、法边豆、甘笋、西兰花及车厘茄

Lunch锯扒一啲都唔过份呀,做得咁辛苦梗系要对自己好啲。只系加咗黑胡椒同盐去调味嘅美国安格斯肉眼扒,近乎原汁原味,可以单纯咁细味到香浓嘅肉味。当然亦加可按喜好淋上师傅特别以和牛肉调制嘅烧汁,增加层次。


香煎挪威三文鱼配柠檬牛油汁 (220g)配法边豆、甘笋、西兰花及车厘茄

三文鱼煎香後,再用慢火烩过,但依然都系保持半生熟嘅状态。师傅解释呢个制法可以令到三文鱼暖身,但又唔会过熟,口感最滑就系呢个moment。不过有时三文鱼食食下好易会有腻感,所以师傅亦特意调制咗柠檬牛油汁,酸酸咪咪又带香味,最紧要可以中和返腻度嘛。


蒜蓉扒大虾 (3件)配薯条、法边豆、甘笋、西兰花及车厘茄

蒜蓉扒大虾系几道铁板菜式中,最受客人欢迎嘅一道。选用越南虎虾,烧至微焦,仲开埋边,一方面令到蒜蓉味更易渗入虾肉,另一方面亦方便客人进食。虾肉口感弹牙,啖啖蒜香。对於细食嘅朋友仔嚟讲,lunch食三只加薯条,份量啱啱好。


下午茶套餐

以法国经典朱古力品牌Valrhona为原材料嘅下午茶,咸、甜点都加入咗朱古力制作。朱古力牛面颊汉堡,用黑朱古力汁煮过,微苦嘅朱古力带出更浓嘅牛肉味;朱古力鹅肝冻批配红酒啫喱,则选用白朱古力,再以红菜头调色将佢变成少女粉红,既吸睛又甜心;烟鸭胸什菜卷亦扫咗层牛奶朱古力喺入面,味道较温和。甜品方面,以系几款唔同口味嘅朱古力慕丝蛋糕,包括有伯爵茶、热情果同芒果等。



心动不如行动!有兴趣就快啲约埋三五知己去叹下美食!快啲bookmark定啦!


*以上图片只供参考,所有食品以实物为准. 食品供应因餐厅而异


关键字
大厨招牌菜
荃湾
牛扒
海鲜
午餐
海景餐厅
下午茶
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
本月热门
【随时更新】零食速报 每周新款零食、酒品点评
1天前
【2021生日优惠】持续更新!7月寿星半价叹和牛烧肉套餐
2021-07-09
【恭喜张家朗、何诗蓓】多间餐厅立即推出限时优惠一览
3天前
投奔盛夏 7-8月份下午茶推介
2021-07-08
6月份好评餐厅十强
2021-07-06