日本人有食欲の秋嘅講法，唔單止代表秋天有唔少當造美食，仲代表大家可以趁秋涼食多啲準備過肥年。想放肆大食當然唔少得各種自助餐，最近有唔少酒店餐廳就以當造海鮮做主題，仲大搞Crossover，特別得嚟又有新鮮感，有啱心水嘅記得提早Book枱喇。

即開生蠔 x 生蠔美食　　Three on Canton

既然係自助餐，當然要食「蠔」啲！尖沙咀呢間餐廳呢兩個月以蠔做主題，除咗有3款嚟自澳洲、法國或者南非嘅三款即開生蠔輪流推出之外，仲會有唔同主題美食，例如開胃嘅番茄青檸生蠔調酒，西式嘅白菌蘑菇焗蠔同洋蔥煙肉焗蠔等。

秋日蠔宴自助晚餐
供應日期：即日起至2016年10月31日
供應時間：18:30 – 22:00

阿拉斯加蟹 x 大閘蟹　　LIS Café

蟹全部都係蟹！香港仔呢間餐廳以當造嘅蟹為主，創作出各式各樣嘅菜式，實行嚟個全蟹宴！頭盤先食個阿拉斯加蟹肉果凍或者煙三文魚卷阿拉斯加皇后蟹肉，主菜嚟個黃金焗蟹蓋或者香檳忌廉汁焗泰國青肉蟹，9月下旬仲會有埋時令清蒸大閘蟹㗎。

濃情蟹宴自助晚餐
供應日期：即日起至2016年11月9日
供應時間：18:30 – 21:30

龍蝦海鮮鍋 x 海鮮飯　　御花園咖啡室

天氣開始涼，唔想食太多生冷海鮮？其實熱食一樣咁吸引！銅鑼灣呢間餐廳最近嘅自助餐要特別推介佢地嘅龍蝦海鮮帽子鍋，帽子鍋邊緣放滿龍蝦、緬甸虎蝦、青口、扇貝等海鮮，用魚湯煮過更突加鮮甜無比！另外西班牙海鮮飯亦真材實料，不容錯過。

環球「搶鮮」自助晚餐
供應日期：即日起至2016年10月31日
供應時間：18:30 – 21:30

日式刺身 x 韓式美食　　咖啡亭

尖沙咀呢間餐廳嘅即開生蠔不嬲都相當出色，呢輪自助餐仲加埋無得輸嘅日式刺身壽司，同近年大熱嘅韓式美食，例如人參雞湯同韓式慢烤小牛排就更加吸引。當然海鮮Fans可以繼續專攻新鮮阿拉斯加皇帝蟹腳、鱈場蟹腳、即開生蠔、翡翠螺、青口等海鮮啦。

瀛真‧韓味海鮮自助晚餐
供應日期：即日起至2016年10月31日
供應時間：可選首輪(18:00 – 20:00)或次輪(20:30 – 23:00)

新加坡胡椒蟹 x 大蝦冬蔭功　　2+2 Café

自助餐其中一個受歡迎嘅原因就係佢可以一次過滿足你想試唔同菜式嘅願望，沙田呢間餐廳今次以東南亞特色佳餚做主題，包括新加坡代表惹味胡椒蟹，泰國代表酸辣冬蔭功，而且仲有無限量即開生蠔供應！同場仲有一口海南雞飯、榴槤糯米糍等美食。

味遊東南亞自助晚餐
供應日期：即日起至2016年11月30日
供應時間：可選全時段(18:00 – 22:00)，第一優惠時段(17:45 – 19:45)或第二優惠時段(20:00 – 22:00)