呢间位於日本,被Diners Club International选为世界50佳餐厅嘅法国菜TIRPSE,开业後仅两个月就获得米芝莲一星,成功创造最快摘星纪录!而餐厅最近已进驻尖沙咀商场K11 MUSEA,想喺新一年食下好西嘅朋友去试试啦。
TIRPSE掉转睇系ESPRIT一字,於法文意旨「隐藏的法国精神」,餐厅除咗主打日式法国菜,亦会选用世界各地嘅当造食材。香港店沿用东京TIRPSE团队,餐厅由侍酒师大桥直誉开设,而餐点由年仅28岁嘅主厨清水雄太及甜品师堀内凛主理。
餐厅主理人侍酒师大桥直誉。
主厨清水雄太(右)及甜品师堀内凛。
装潢都别出心裁,一边系日式和室风,亦有仿以前欧洲东方列车风嘅独立房,畀人感觉摩登又不失传统。而且餐厅坐拥180度维港全海景,就咁食个「景」同装修都抵返晒。
食物方面,唔好以为米芝莲价钱就一定好惊吓,晚市dinner set $1188/位,以尖沙咀海景、米芝莲一星以及过江龙嚟讲,价钱都几合理。
开胃菜蟹肉批,系法国传统批,内馅系鲜甜嘅蟹肉,不过仍可能根据时令转做其他海鲜。
另一道开胃菜北海道海胆挞,加入mimolette芝士及亚枝竹,一入口感受到海胆浓浓嘅鲜甜味。
前菜法国石蚝,石蚝厚肉,经过60度慢煮,配上菠菜泥、抹茶粉及菠菜粉,味道又几夹。
同样系前菜北海道白子配法国黑松露,底层铺上法国有名嘅薯蓉,中间系北海道白子,上屠就系法国黑松露,味道温和清新。
第三道菜香煎金鲷鱼,金鲷鱼连埋鱼鳞半煎炸,外皮香脆外仍能保留肉汁,而且鱼肉都滑;至於酱汁系用鲷鱼骨、蚬肉及柚子制成,味道清爽。
主菜法国珍珠鸡,先煎香後低温焗,而酱汁就系用鸡嘅精华加红酒制成嘅烧汁,微甜但唔会盖过鸡味。
最有惊喜系餐厅嘅甜品,Guinness Ice Cream配上谷物种子及白朱古力脆片,酒味香浓。
Kalamansi Mousse白朱古力包住法国吉仔及日本士多啤梨酱,酸酸甜甜恰到好处。
而呢个Mascarpone Cream,材料有蛋白、砂糖及柑桔皮,柑桔皮可以带起成个甜品味道,配埋特有嘅美国檀香雪糕好Match!
地址: 尖沙咀梳士巴利道18号Victoria Dockside K11 Musea2楼219号舖
文: Yanica
相、片: Tom Li