喺香港地食飯，想搵間無限時、環境又舒適嘅餐廳慢慢食都唔係咁易，不過尖沙咀呢間新開嘅日式茶舍可能啱你心水。餐廳環境優雅舒適，最啱就係同朋友嚟食嘢飲嘢傾吓偈。
日和茶舍由兩位媽媽Mon及Stephanie開設，Mon本身係一位陶瓷藝術家；而Stephanie從事天然䕶膚品行業，因為兩位對料理有共同理想，堅持以真材實料製作料理，亦期望透過料理帶到溫暖畀食客，所以日和茶舍就咁誕生咗～
日式戰士餃子鍋(供四位用)($228位)
店內所有餃子都係即叫即製，想試多種口味嘅開飯仔囡們可以試試呢個日式戰士餃子鍋。湯底係豆乳腐皮白雞湯，餃子山上有齊晒餐牌上七款口味，包括七味辣味健康走地雞肉餃、黑松露雜菌黑豚肉餃、野生牛肝菌健康走地雞肉餃、椰菜芝士黑豚肉餃、麵豉濃香雜菌素餃、日本大蔥黑豚肉餃及白菜馬蹄黑豚肉餃。
餃子每日新鮮人手製作，選用天然食材，如西班牙黑毛豬、純天然無激素47天走地雞、野生牛肝菌、秋菇、姬松茸、蟲草花及本菇。七味辣味健康走地雞肉餃惹味，而黑松露雜菌黑豚肉餃有濃厚黑松露香。
失傳黑毛豚腩叉燒流心蛋飯($98)
Stephanie出生於燒臘世家，父母係昔日九龍城榮記燒臘嘅主理人，媽媽仲有叉燒女王呢個稱號，佢地嘅叉燒連蔡灡都讚好！所以Stephanie就決定將叉燒帶埋嚟日和茶舍。叉燒選用西班牙黑毛豬，純天然餵飼，不含增長素及激素。豚腩部份爽口、肥而不膩；梅頭部位肉味香而富彈性，對叉燒有情意結嘅朋友不可錯過！
餐廳仲有供應各款特色點心，如金沙熊貓包、奇趣金魚餃。一個人嚟可以叫呢個點心拼盤，咁就每款點心都可以試試啦～
另外店內有個小角落售賣Mon親自挑選嘅陶瓷同埋Stephanie嘅天然䕶膚品及手工肥皂，嚟食嘢之餘仲可以行去睇吓㗎！
地址: 尖沙咀堪富利士道6-6A號爵寓1樓
文、相、片: Yanica