全港首间主打萨摩和牛店 九龙城立食和牛汉堡
2019-01-23

身为牛魔王,最重要嘅任务系咩?梗系周围搵靓牛食啦~ 话说九龙城最近新开咗间舖,系全港首间主打萨摩和牛嘅高级食材店,有多款和牛冻肉选择不在话下,仲有熟食区,可以食埋即叫即制嘅靓和牛小食。

萨摩和牛有咩咁特别?萨摩半岛位於九州最南边,气候温暖,嗰度出产嘅牛肉质鲜红粉嫩,脂肪分布平均而油花丰富,油脂中更带有奶油香。而被评为萨摩牛嘅牛嘅BMS霜降程度要有5级以上、仲要系最少28个月大但又未生过B嘅母牛,无使用抗生素同生长激素等。舖头选用嘅牛都好矜贵下,食熊本米同大分米大㗎,到6个月大嗰阵就以TMR饲料(鹿儿岛烧酹、菠萝等)喂饲。讲多样嘢你知,上年先开始有萨摩牛进口香港咋。

份量十足嘅和牛芝士汉堡,面包有轻轻烘过,加埋煎香咗嘅厚和牛肉扒同微热嘅芝士、蕃茄、生菜,咬落肉味香浓。

但更吸引牛魔王嘅相信会系呢块香煎和牛西冷。薄薄地一大块,脂肪纤细,分布平均,富油脂香,入口瞬间溶化,连个心都溶埋,叫你开心些牙一少块畀个Friend都未必舍得。

另外仲有蒜香和牛粒同京葱串烧和牛粒两款和牛小食,後者比前者更为惹味。

不过呢度都唔系净得和牛嘅,日式烧汁烤无激素鸡中翼、烧牛油珍宝带子串、烤德国香肠拼盘同各式便当都有。

至於冻肉方面,一入门口就有两大「日本一」鹿儿岛和牛冻肉专柜啦,全部都系由自家农场产地直送,等级A4或以上嘅和牛,唔同部位都有,好似日本A4黑毛和牛三角腩(烧肉片)、M级肩胛心火锅片等,由专业师傅切割,打边炉又啱、铁板烧又啱,香煎当然更加冇问题。

 日本A5极上牛肩胛(烧肉片)

识食嘅牛魔王就绝对唔会放过4%奇迹牛喇!咩系4%奇迹牛?听个名就知系得好少数嘅牛先做到啦。原来系萨摩牛入面,BMS霜降程度有成10级或以上嘅A5和牛先可以配得到呢个称号,可以话系牛中之牛!肉质更香更细腻,肉汁更丰腴啊。

 日本A5极上西冷(寿喜烧片)、日本A5极上肉眼(寿喜烧片)

 日本A5极上肉眼牛扒、日本A5极上西冷牛扒

多款刺身级海鲜如生蚝、青边鲍、皇帝蟹等都可以喺度选购度,厨神要买靓料返家大显身手绝对唔系问题。

最後,重点通常放最後。新店开张梗系有着数啦,由1月25日至2月10日期间,夜晚7点後,廿蚊就可以食到一串成18寸长嘅「日本一」 萨摩A4和牛杂菜串烧,每日限定50串。


裕千家
地址:九龙城 狮子石道57号新康大楼地下


文、相、片:Kar


关键字
九龙城
和牛
日本菜
牛肉
牛魔王
汉堡
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
1天前
【2019圣诞】早鸟优惠! 圣诞自助餐推介
3天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
5天前