傅珮嘉同台籍老公Steven開設嘅三星台菜食堂，前排先喺灣仔開分店，估唔到咁快又有新分店，今次更衝出港島，喺沙田商場入面開舖！沙田分店比銅鑼灣及灣店店更加大，菜式亦最齊全，新增多款獨家菜式其他分店都冇架！
得沙田先有嘅係威士忌牛肉麵，係Steven專誠為黃秋生而設！原來黃秋生好鍾意食三星嘅牛肉麵，而佢亦係威士忌愛好者，於是Steven就將佢合二為一。用上台灣最出名嘅KAVALAN威士忌，再加埋Jack Daniel’s嘅蜜糖威士忌，比例為二比一，咁酒味就帶甜啱啱好喇。
威士忌會喺上枱前先會於客人面前淋上去，先用火槍炙熟全生安格斯牛小排，之後將酒點火淋喺麵上，酒香即刻出晒嚟！而且麵上仲特意加入少少麥芽，炙燒可以聞到陣陣麥芽香。
食落酒味其實唔算好重，微微酒香混合濃郁紅燒牛骨湯，又真係幾match！配料有齊三星牛肉麵招牌牛腱、牛筋同牛肚，亦可以揀粗麵或幼麵，個人覺得粗麵吸湯啲，仲沾到少少酒味。唯一要彈係呢碗麵實在唔平，成$188一碗！想食就要豪少少喇。
新店亦多咗台式刨冰，有十幾款配料選擇，好似芋圓、地瓜圓、仙草、愛玉、黑糖水晶等，再加自家現煮黑糖糖漿及煉奶調味，全部都係台灣入口。八寶冰可以揀足8款配料，成座山咁高，4至5人食都得呀！芋圓、地瓜圓夠QQ，味道亦濃郁。
另一款就係刈包，有四款口味包括舖頭主打酸菜牛肉、焢肉、炸蝦餅($38)同埋蟹柳蛋沙律($38)，同樣都只用台灣貨。炸蝦餅入面有流心芝士，配上泰式甜辣醬都幾特別！
冷泡茶亦係Steven喺台灣入口，於台北文山地區的包種茶，入口清香帶回甘，夏天飲好舒服。
地址：沙田新城市廣場1樓128號舖
文、相、片：Perrins