任食Movenpick、Haagen-dazs! 海洋公园酒店新开幕 首推全环保海鲜自助餐
2018-11-08

各位buffet迷又有新场去啦~ 话说大人细路都啱玩嘅海洋公园间酒店新开幕啦,即系代表住又有新嘢食,其中一间系buffet餐厅~ 环球海鲜梗系唔少得,呢度嘅海鲜仲全部都系经认证嘅可持续发展海鲜嚟添。而且,一入去你就会见到超大个自动旋转雪糕机,入面嘅Movenpick、Haagen-dazs等都系任食!!

成个buffet分左几大区:海鲜、刺身、冻肉、沙律、熟食、肉类、甜品等,即刻同大家「高呼」下有咩食先~

开场个个都系立马冲去海鲜区,个海鲜山离远望到已经好吸引,有珍宝蟹啦、长蟹脚啦、波士顿龙虾啦、翡翠螺、青口、海虾、蚬等等,全部都系可持续发展嘅海鲜嚟,而最多人捕住嘅一定系蟹盖,超多膏啊,仲好鲜甜,几乎每次都系一出就被秒抢。

寿司同刺身区选择亦多,包括有赤虾、带子、吞拿鱼、希灵鱼之类,全部都好新鲜。

肉食兽就梗系要去肉食区啦,分别有冻肉同烤肉,即切嘅烤肉眼、烤羊排都几入味。

熟食区中嘅主食,首推就系蒜蓉粉丝蒸带子啦,又系秒速消失嘅item。另外仲有串烧呀、烧味呀咁。

每日有唔同嘅炖汤,开饭仔去嘅呢日就系海底椰炖猪展,滋润啊。

等咗咁耐,终於到你哋嘅「主菜」啦,即系甜品呀科科。最OP肯定系部自动旋转雪糕机,好大部,好多雪糕啊,个个见到都变晒bling bling眼啦。仲要系Movenpick、Haagen-dazs,同iscream喎,好多款口味啊,前两者唔多介绍啦,iscream嘅开心果味都好值得一试,好软滑。

甜品都有好多款,细细件嘅cheesecake仔又有,花花装饰嘅cupcake又有,苹果金宝、面包布甸、咖啡焦糖炖蛋布甸、奶冻同埋蛋糕sss都有。呀,仲有一樽樽软糖,啱晒甜魔怪。要特别讲下佢有张甜品枱,特登set矮咗,方便小朋友都可以自己夹到嘢食。

如果你系无酒不欢嘅朋友仔,加少少钱就可以无限任饮酒精饮品同各类果汁、汽水,甚至连即调cocktail、mocktail都有,听讲迟啲仲可能会加多部日本生啤机添呀。

每位入座都会免费送客slow cook鲍鱼啊。

BTW,而家经OpenRice订座仲可以顺个靓便储埋亚洲万里通嘅飞行里数添啊留意返。至於酒店入面嘅其他餐厅,下星期再同大家介绍。

海湾餐厅及海湾咖啡室
地址:黄竹坑黄竹坑道180号香港海洋公园万豪酒店海湾地下

文:Kar
相、片:Tom Li

关键字
黄竹坑
海洋公园
主题乐园
自助餐
任食
雪糕
甜品
海鲜
环保海鲜
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】最後倒数!即将结业的老字号及人气小店
2020-07-21
【随时更新】零食速报 每周新款零食、酒品点评
2020-07-31
全城抗炎!北角酒店最新应变 自助餐都有得外卖?
2020-07-17
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-07-30
好人好店! 餐厅全日禁堂食 民间自发开放午膳空间地点一览
2020-07-29