喺疫巿下开新餐厅,除咗有股勇气之外,创新谂法亦唔少得。有间人气韩国菜馆,最近喺将军澳开新分店,日日午巿都大排长龙,餐厅仲有多款新菜式,同埋拉丝「挑机比赛」呢~ 够晒话题性。
自问系芝士控嘅朋友仔,等疫情过後记住要搵时间嚟朝返个圣。全新菜式邪恶拉丝猪髀仔,用咗4款咁多嘅芝士去制作,包括水牛芝士、车打芝士、巴马臣芝士同奶油芝士。等啲芝士开始进入热溶状态嘅时候,就可以放几只猪髀仔上去,喺一片金黄芝士海上面卷呀卷呀,卷到成只髀都畀芝士包围住咁食,系治癒嘅。猪髀仔嘅制作都绝不马虎架,加入咗黑胡椒同蜜糖去腌制,再放入焗炉烤制,锁紧肉汁。食落阵阵芝士香之余,亦有突出嘅蜜糖甜香。
餐厅亦特别搞咗个斗芝士拉丝比赛,叫咗呢道菜式嘅客人就可以参加。用猪髀仔拉丝,一路拉一路拉,拉得愈高,就愈多折扣。例如拉到5cm就有5%折扣,最多拉到30cm或以上,就可以成碟半价!
另一款新菜式系玫瑰糖真露醉鸡翼,甫上枱就闻到阵阵酒香,片片瑰瑰花瓣亦相当悦目。师傅采用新鲜玫瑰花风乾再制成玫瑰糖,加入韩国真露烧酒烹煮,味道香甜,不过酒味可以再重多少少。
韩国餐厅,点少得近期大热嘅400次咖啡?咖啡奶绵密,带焦糖香,下层系3.6牛乳,口感细滑。另一杯靓靓嘅打卡特饮系闪烁蓝银河特饮,搅一搅就会见到闪令令嘅银河星星,原来系食用闪粉嚟。饮落系蓝莓嘅清新酸甜。
捧场客实会食过嘅招牌菜亚之妈炸鸡同芝士岩浆炒饭,前者酸甜香辣,外脆内嫩;後者有微微辣劲,仲可以疯狂拉丝,轻易就可以留住粉丝心。
韩阁
地址:将军澳欣景路8号新都城中心2期1015号舖
文:Kar
相、片:Tom Li