九龙城麻甩味食店推介
2016-11-23
讲起九龙城大家可能只会有「好多泰国餐厅」呢个既定印象,其实九龙城都仲有好多食其他菜式嘅小店,而且佢地都有一个共同点:唔单止有街坊feel,甚至仲有少少麻甩味!唔信?以下餐厅几乎全部都系情侣约会止步(除非你地已经去到「浪漫?咩嚟㗎食得㗎?」嘅地步啦...),但同学朋友死党兄弟手足姐妹一齐去就啱哂啦!

Lv.0 跌落小店的天使  小方糖甜品


(Photos by Duckduckchic & WinG!)

先由最无麻甩味嘅甜品店开始介绍,系九龙城众多泰国菜同中式甜品舖当中,西式甜品店就自然好似黑夜中嘅萤火虫一样咁鲜明,咁出众。当然能够站稳阵脚,得到附近唔少大学生支持嘅原因系质素有保证。芒果拿破仑嘅即焗酥皮松脆,芒果肉同芒果汁亦相当清甜。钟意食榴莲嘅可以试留恋天使,啖啖香滑榴莲肉搭小丸子,无得输。

Lv.1 无敌爆汁牛肉饼  清真牛肉馆


(Photos by cynthiaaameow & hkkodomo)

放心,虽然系清真小馆,但店员大部分都系香港人,本住想食好西嘅心态入店就得。最出名嘅肯肯定系几乎每枱都有一碟嘅牛肉饼,皮脆而且一咬就爆汁!牛肉亦有鲜味而唔太咸,够抵食,难怪唔少街坊都对呢度嘅牛肉饼百吃不厌。另外咖喱羊腩同牛肉水饺亦系食家推介。

Lv.2 媲美名店炒滑蛋  联发茶餐厅


(Photos by Happinessbb & catcatgogogo)

嚟到联发茶餐厅,无论系早餐、特餐、茶餐定快餐,都一定要拣炒蛋而唔系煎双蛋,因为有唔少食家话呢度嘅炒蛋嫩滑程度可以媲美澳牛!其实呢间茶记系由澳牛第三代带住秘方自己出嚟开嘅。带半熟蛋汁滑一滑嘅炒蛋,加外微脆内软绵嘅牛油多士,谂起都流到成地湿哂...我指啲口水啫。不过亦有人话呢度嘅炒蛋喺蛋香方面稍微欠奉,爱蛋人士要注意啦。

Lv.3 车仔式潮州糖水  潮州合成甜品


(Photos by Rhineats & HappyPolly)

糖水舖都有麻甩味?少少咁啦,呢度有几十年历史,只卖传统潮州糖水。不过得意嘅地方就系好似车仔面咁可以搭配材料,而且非常足料,胃口细嘅朋友仔当饭食都得!想试潮州风味嘅可以嗌莲子清心丸杮饼糖水,莲子够松化,清心丸爽口而杮饼就够清甜滋润。另外马蹄沙同绿豆爽亦可以一试。虽然话自己糖水自己拣,不过如果唔想合成糖水之後觉得中伏嘅话,落单之前都系问下店员意见啦。

Lv.4 熟食中心之地踎乐园  乐园


(Photos by Kantabo & hm_wong)

讲到九龙城不得不提熟食中心里面嘅乐园,名物之一系沙嗲牛肉西多士,炸到金黄香脆嘅多士夹住唔加松肉粉嘅沙嗲牛肉,第一次食未必会习惯,但慢慢习惯後反而会怀念呢种奇异但和谐嘅组合!第二项名物系红豆冰,可以拣普通、奶茶、咖啡同鸳鸯底,红豆粒粒饱满而且起沙,超加分。另外雪菜肉丝炒米粉系食家蔡澜推介,不过乐园星期日唔开,星期六同公众假期两点截单,跨区嘅朋友想试就要早起啦。

Lv.5 霸气原只西瓜汁  街头霸王小食


(Photos by ManChun18)

麻甩嘅重点系唔怕比人知自己麻甩嘅嗰种霸气(好似系),而同样有霸气嘅包括新开嘅呢间小食店里面嘅原只搞搞震西瓜汁,真系原只迷你西瓜奉上,捧住扫街最霸气!另外仲可以试下呢度嘅炸饺子,三款口味金菇肥牛、芝士比萨猪肉同印度咖哩都系每日新鲜包,即叫即炸,各有唔少捧场客。

Lv.6 我喜欢坚持  地茂馆甜品


(Photos by Crystal_koo & miss.mo)

又系糖水舖?比开饭仔我介绍埋呢间咁大把。呢间地茂馆今年二十六岁,以人嚟比喻嘅话就准备踏入壮年,咁啱小店最近亦交由第二代接手,装修过後别有一番新气息。当而家唔少甜品店都跟潮流卖芝士挞或者特别鸡蛋仔嘅时候,呢度依然坚持做传统中式糖水。其实唔少糖水都非常花功夫,例如芝麻糊要以人手炒香芝麻,合桃露要每日鲜磨唔好比香味流失,单系呢份坚持就值得鼓励。

Lv.7 细细个就听过佢个名啦  义香荳腐食品


(Photos by hung_united & dercch)

唔少小店可能都面对紧香港常见嘅土地问题,幸而九龙城仲有唔少老字号继续撑住,超过五十年历史嘅义香就系其中一间。舖头细细,无冷气之余人多要搭枱。但豆腐花够平,堂食都只系$8碗,热辣辣又够滑,唯独有少少可惜嘅系豆香无之前咁重。三宝亦系必食之一,想煎亦得炸亦得,得咗!温馨提示,有唔少街坊曾经喺呢度附近野生捕获发哥周润发,下次嚟试嘅话不妨留意下!

Lv.8 宵夜惹味串烧首选  金泰沙冰


(Photos by foodsearchers & 为食熊猫佳)

虽然好想忍住唔介绍泰国菜,但讲到麻甩点可以漏咗串烧店呢?呢间金泰沙冰好似《国产凌凌漆》嗰啲表面上系须刨实际上系风筒嘅道具,因为个名十足十似饮品店,但其实佢无沙冰亦无特饮卖,取而代之嘅系香喷喷嘅泰式串烧。老实讲啲肉无乜非常特别之处,但腌得入味,加埋个越食越辣越惹味泰式辣汁就不得了!买返屋企一手串烧一手啤酒,完全爽歪歪。

Lv.9 不想说的秘密  马仔粉面


(Photos by Yanomich)

每次介绍好嘅食店,特别系小店嘅时候都非常挣扎,因为多咗人知嘅话下次去可能就要等更耐。不过隐藏喺熟食中心嘅呢间马仔的确跑出,无办法之下唯有不藏私大公开啦!无错呢间系粉面店,但佢最驰名嘅系晚市打边炉嘅沙嗲汤底!沙嗲汤底几乎系所有火锅店都有,但马仔嘅沙嗲汤底特别香浓而且有花生甜香,惹味但唔太辣,平时唔食辣嘅朋友亦可以试下。喺街市楼上开,配料自然亦相当新鲜,本地牛肉、鹅肠、墨鱼丸同鲩鱼腩都系推介。既然公开得顺便讲多句,马仔附近有间食泰菜嘅,贪心嘅朋友可以喺嗰间店嗌埋嘢饮同小食,实行一次过满足两个愿望,最後分开结账就OK。

随时接收最新资讯
赞好OpenRice专页!


关键字
九龙城
牛肉饼
炒蛋
西多士
串烧
沙嗲
开饭专题
开饭仔为你提供各类型最新饮食情报及优惠,全面照顾你的饮食喜好。
相关文章
元朗「泰」滋味 5间特色泰国菜馆
2017-04-13
再战东大街 有咩小店值得食?
2017-04-19
将天草渔市场搬过嚟!铜锣湾新店Lunch Set有惊喜(有片)
2017-04-24
【新店直击】青洲灶记咖啡氹仔新登场!
2016-08-09
【当时得令】三盏灯周边的茶记隐世美食
2016-11-17
泰国名气宫廷菜抵港 超软滑三重芝士榴槤挞
2017-03-29
餐厅资料
更多
收起
本月热门
【随时更新】零食速报 每周新款零食、酒品点评
2021-05-03
【2021生日优惠】持续更新!5月食日本直送海鲜送西班牙红/白酒
7天前
带妈妈味游异国!母亲节Brunch六选
2021-04-20
期间限定$1抹茶菠萝包、$3竹炭菠萝油 佐敦新开 2500 尺新派点心小厨
2021-04-30
荃湾新开 人气名古屋班戟分店 首推冲绳紫薯梳乎厘班戟+班戟汉堡
2021-04-15