九龙城新开虾面店 8斤鲜虾熬汤加波士顿龙虾(有片)
2018-07-26

香港以海鲜做主题嘅餐厅唔少,不过虾嘅专门店就唔多。最近九龙城就开咗间新餐厅,招牌写住米线泡饭专门店,同时又有大大只龙虾喺度,原来主打虾汤底嘅面食同泡饭,虾汤用足8斤鲜虾,再加其他配料每日熬煮。想食豪啲配料仲可以拣波士顿开边龙虾呀!
 


虾匠顾名思义以虾做主题,招牌系佢地嘅足料虾汤。先用猪骨、鸡、青红萝卜煲清汤,再加8斤鲜虾虾壳虾头,加虾籽、虾乾、虾米熬足3-4个钟头,将鲜红香浓嘅虾油煲出嚟,唔需要任何味精都够哂惹味!
 


虾匠汤配龙虾半只(配掺掺)(原价$88,开业特价$68)

虾匠汤即系原味虾汤,本身配料就有虾、札肉或腩肉、豆卜、芽菜,想鲜味升级就可以再加半只波士顿开边龙虾。虾汤闻落的确带非常香嘅虾味,饮落一开始可能会觉得有少少淡,之後辣味就会涌上嚟,就算系夏天都会令人忍唔住一啖接一啖咁饮。
 


面底可以拣油面、米线、米粉或者掺掺,即系油面加米粉,一碗试匀两种口感。加埋弹牙嘅龙虾肉、札肉,同吸哂汤汁嘅豆卜等,相当丰富。
 


冬阴功虾汤(配米线)($48)

想再刺激啲嘅话,就可以拣冬阴功虾汤面!香茅等香料味道相当浓郁,略嫌有少少盖过虾汤本身嘅香味,不过饮落就够哂酸辣开胃。配料有虾、青口、鱼片、秀珍菇同蕃茄。
 


花胶鸡汤泡饭(晚市$98半只,午市$78例牌)

招牌写得米线泡饭专门店。当然亦有泡饭食啦。除咗虾匠汤之外,仲特别推介呢款花胶鸡汤泡饭!汤底用上等金华火腿、瘦肉、老鸡同花胶熬煮6个钟头。之後加三黄鸡同花胶,以镬仔上枱,下面会点火保温。建议大家可以先饮一啖鲜甜带少少胶质嘅汤,之後再加饭食泡饭。
 

更多【新店直击】:
1. 东京牛肉油拌面专门店 10cm高重量级牛肉丼
2. 油麻地木盒墙身楼上café 食Wilson落肚?
3. 云石流心蛋糕尖沙咀新店 新推梳乎厘蛋糕+刨冰

 

虾虾霸霸($68)

小食同样充满虾香!虾饼食得多,好似手掌心咁大嘅就比较少见。餐厅每日用新鲜虾自家手打,再炸至金黄色、外脆内弹嘅虾饼,点少少酸辣酱食更香口。
 


虾匠皮蛋($20)

即系麻辣虾香皮蛋,皆因餐厅特别喺红油当中加咗少少虾乾碎,闻起来带虾香而食落先麻後辣,最後仲有少少虾嘅咸味。配以皮蛋软滑又弹牙嘅口感,层次丰富。
 


冰镇青瓜($22)

食咗咁多香辣惹味嘅菜式,可以食返呢碟冰镇青瓜清清味蕾。青瓜条用冰镇形式上枱,视觉效果突出。中间两条玻璃管分别装住芥末豉油同麻酱,前者带辣後者香浓,按自己口味想点几多就几多。
 


(左)柠檬天葵花,(右)百香天葵(各$38)





虾匠
九龙城福佬村道20-22号学林轩地下A舖




文、相、片:Cathy

关键字
九龙城
虾面
福建虾面
冬阴功虾汤
花胶鸡汤泡饭
虾饼
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
2019-11-29
【2019圣诞】早鸟优惠! 圣诞自助餐推介
2019-11-27
秋风起!5间大闸蟹放题食店集合
2019-11-19
【2019圣诞】年尾叉电 圣诞下午茶集合推介
2019-11-19
【2019圣诞】约会之选 圣诞市集推介
2天前