【2020圣诞】食得又睇得嘅圣诞送礼/交换礼物推介
2020-12-18

又到圣诞,大家又要谂下买乜嘢嚟交换礼物或者送礼啦,尤其是今年未必可以约埋出嚟相聚庆祝嘅,送份礼物更见心意。不过送咩又几难拣嘅~ 咁不如送啲食得嘅更加实际,我哋搜罗咗几款食得又睇得嘅圣诞礼盒畀大家拎下灵感!不过今年玩还玩,都要注意个人卫生同埋社交距离啊~

期间限定Sanrio雪糕杯  Häagen-Dazs

圣诞除咗送朱古力,送雪糕畀朋友一样咁开心,仲要Häagen-Dazs今年联乘 Sanrio推出3款可爱嘅雪糕杯,分别有布甸狗、My Melody同Hello Kitty,呢三款立体造型嘅杯仔,好鬼可爱,打开仲有杯雪糕添。食完只杯都可以循环再用。

复古法式礼盒 Junon

轩仔嘅仙后餐厅出晒名充满怀旧西方风情,最近推出嘅三款礼盒都唔例外,款款都好复古,其中Premium Hamper仲特别加入客制化嘅纪念香槟,大家可以喺酒樽上刻名,送畀朋友就更加特别。另外,礼盒仲可以按个人喜好自行组合,仙后自家制美点、西班牙黑毛猪火腿、法国鹅肝酱、园艺草莓果酱等嘅美食全部都可以拣,其中正宗法式蝴蝶酥、朱古力法式杏仁蛋白糖等都系今年嘅新品。

特级朱古力礼盒 Godiva


相信Godiva系唔少人平时都会用嚟送礼嘅牌子,佢哋嘅朱古力用比利时工艺制作,用料讲究,送礼当然得体。今年圣诞节,佢哋都推出咗多款唔同style嘅圣诞礼盒同埋套装,将焦糖、胡桃同红莓等圣诞食材同朱古力融合,仲有经典圣诞老人、雪人同企鹅造型嘅朱古力,靓得嚟又cute。

北欧拉脱维亚雪糕 Ekselence

呢个牌子嘅雪糕系100%北欧制造,最近佢哋趁圣诞节都推出咗节日礼盒,礼盒内容好丰富,里面有雪糕批、雪糕杯、雪条同埋芝士棒等。而「Ekselence尊贵节日礼盒」仲包含咗两盒低糖低脂雪糕或雪葩,啱晒同又惊肥又想食雪糕嘅朋友仔一齐分享啦~

零食倒数月历 Sugarfina

圣诞节梗系唔少得圣诞糖果啦,例如戴住颈巾嘅白色小熊曲奇饼、驯鹿爆炸糖脆心朱古力等,呢个品牌出咗好多造型可爱嘅节日限定糖果呀。仲有不得不提佢哋嘅圣诞倒数月历,每日拆开一盒,每日都有快乐力量,送畀另一半或者小朋友就实氹到佢哋开心啦!

Sanrio圣诞礼盒 奇华饼家

你哋身边有冇朋友系Sanrio粉丝?奇华今年同Sanrio男团HAPIDANBUI合作推出咗呢个圣诞礼盒套装,有隔热手套同埋围裙,好鬼靓,就算唔落开厨嘅都想着一着入厨房。另外,DIY圣诞曲奇礼盒有朱古力同姜味曲奇之外,仲附有朱古力笔畀大家可以发挥自己嘅小宇宙,画靓靓块曲奇呢。

茶控之选  Tea WG

今年大家都辛苦,饮啖茶养生得嚟又可以放松,送茶都系唔错嘅选择啊。Tea WG推出嘅圣诞茗茶礼物套装,除咗有多款啱晒圣诞节饮嘅茶品,如融合咗黑茶、香料、水果同幼滑巧克力味道嘅圣诞欢乐黑茶迷你茶罐,仲有精美茶具配件。另外亦推出节日限定嘅华丽圣诞之茶,带果香嘅黑茶香气好浓郁,啱晒圣诞节呢个温馨嘅节日!
 

香港制造手工毡酒 Two Moons Distillery


由两位对手工毡酒充满热诚嘅八十後年轻创办人成立嘅本土品牌Two Moons Distillery,今年都推出咗全新升级版嘅圣诞礼盒套装,当中700毫升招牌乾毡酒加入咗意大利嘅嘅杜松子、马达加斯加嘅云呢拿豆、巴西嘅零陵香豆及中国嘅乾柑橘皮等,毡酒味道更复杂而且有层次。

DIY鸡尾酒  homeshake

对酒鬼嚟讲,今个圣诞最惨就系冇得出去饮酒狂欢。不过唔紧要,可以送呢set DIY cocktail畀佢哋,等佢哋自己喺屋企都可以做bartander,自己调酒饮!Amor调制过程简单,跟住指引,逐支tube倒落酒杯再揽匀就完成,暗红黑色渐层,系靓嘅。饮落咖啡味突出,仲可以配埋黑朱古力一齐食,苦中带甜。但唔好睇少呢杯嘢,都成13%架。而醉柠茶就再简单啲,已经直接由中式茶提炼出茶香,经过多重调酒工序调好咗,直接饮都得。口感清爽,甜甜地酸酸地又有啲回甘。不过想玩下嘅,都可以搭配梳打水或者vodka嗰啲饮都得。

爱酒之选 Timeless & Tasty


顶级烈酒供应商Whiskies & More旗下嘅网店Timeless & Tasty推出3款圣诞烈酒礼品套装,分别有比较清新嘅毡酒礼品套装、酒鬼最爱嘅精选烈酒套装同埋网店主打嘅威士忌套装。全部都包装优雅,酒鬼收到实会笑到见牙唔见眼。


圣诞瓶装鸡尾酒 PING

由香港瓶装鸡尾酒品牌推出嘅圣诞鸡尾酒,以多款冬季及圣诞元素作灵感,当中包括由紫薯化身成嘅Purple Snow、圣诞必饮嘅热红酒变化版 Mull Mull Mull、橙味朱古力的 Chocorange、尤如一个三层士多啤梨蛋糕嘅 Strawberry Cake及姜饼人 Gingerbread,同朋友聚会时饮最啱!


文:Hailey
编:Kar





关键字
圣诞节
礼物
送礼
朱古力
雪糕
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
1天前
【2021生日优惠】持续更新!7月寿星半价叹和牛烧肉套餐
2021-07-09
【恭喜张家朗、何诗蓓】多间餐厅立即推出限时优惠一览
2天前
榴槤Buffet真的很兴奋~ 九龙区酒店7、8月限定榴槤盛宴
2021-06-30
投奔盛夏 7-8月份下午茶推介
2021-07-08