【2020圣诞】甜蜜心意 圣诞蛋糕+杯子蛋糕精选
2020-12-17

今年圣诞节无论系一班人开Party,同屋企人自己煮大餐,定同另一半二人世界,记得唔好订漏一个又靓又有气氛嘅圣诞蛋糕!开饭仔特别帮大家精选多款卖相吸引嘅蛋糕,由原个蛋糕到一支公都啱食嘅杯子蛋糕或者迷你蛋糕都有齐呀。
 

圣诞艺术甜点  Bombshell

间间饼店嘅圣诞蛋糕都好鬼靓,呢间人气创意艺术糕饼店嘅当然都唔例外啦,而且除咗靓之外,仲充满玩味。打完卡影完靓相之後,狠心少少用小木槌敲碎朱古力嘅外层,就会有好多充满童年回忆嘅朱古力同糖果、曲奇倾泻出嚟啦。另外,如果自问艺术天分ok嘅,仲可以拣DIY圣诞花环礼盒嗰款,附有朱古力画笔同糖果装饰,各位大艺术家可以自由发挥,喺花圈上随心设计,创作自己专属嘅圣诞花圈。打完卡後同样都可以逐个花圈击碎拎糖食架~

名厨精品蛋糕  当文历饼店 by Dominique Ansel


(左)红白棒棒糖,(右)摘星许愿树、红鼻子驯鹿

由世界知名甜点主厨Dominique Ansel创辨,进驻香港後首次推出嘅手工节日系列充满巧思。红白棒棒糖灵感嚟自圣诞薄荷糖,红白相间相当抢眼,里面系番石榴士多啤梨啫喱、柚子慕丝同法式杏仁蛋糕,酸甜有致。另外仲有摘星许愿树同红鼻子驯鹿,前者系栗子挞嘅变奏,後者系可爱嘅法式泡芙。
 

个人化蛋糕系列  DALLOYAU

呢间法国糕点品牌,喺圣诞前夕推出全新个人化蛋糕系列,可以印相落蛋糕面又得,制作3D装饰又得,订制Sweet Blast系列都得,仲可以加埋招牌歌剧院蛋糕喺底,敲碎完外层除咗有朱古力食之外,仲可以有cake食,够晒开心。

纯素甜点之选  The Cakery


(左)圣诞树头蛋糕,(右)圣诞杯子蛋糕

呢间健康烘焙店今年再度推出纯素蛋糕,纯素圣诞树头蛋糕以朱古力为主,配搭不含乳制品嘅鲜忌廉,加上「树头」朱古力卷、红桑子、蓝莓及迷迭香作为装饰。圣诞杯子蛋糕更有多款口味选择,可以配合无麸质、纯素、有机或生酮饮食! 
 

招牌千层酥圣诞版  Butterfly Patisserie


(左)大溪地云呢拿千层酥圣诞版,(右)蛋酒柑橘圣诞球

尖沙咀呢间酒店饼房嘅大溪地云呢拿千层酥非常出名,嚟到圣诞佢哋就推出圣诞版,选用大溪地云呢拿忌廉配搭松化焦糖酥皮,最後用糖霜洒出圣诞树形状。其他节日甜点仲包括蛋酒柑橘圣诞球、肉桂烤苹果圣诞树、传统栗子圣诞木头蛋糕和姜饼曲奇等。
 

更多【圣诞特集】:
1. 留在家中都可叹大餐 圣诞到会大合集
2. 在家开派对 甜品火锅套装推介
3. 休闲打卡 圣诞下午茶推介

 
茶香法式糕点  Tea WG Salon & Boutique


(左)法式伯爵茶朱古力炖蛋蛋糕,(右)玫瑰芬香茶柚子蛋糕、法式伯爵茶榛子朱古力挞

嚟自新加坡嘅茶叶品牌亦推出圣诞限定茶香法式糕点,原个蛋糕有法式伯爵茶朱古力炖蛋蛋糕,以杏仁脆饼为底,加上盖绵润杏仁蛋糕,外层就系法式炖蛋同法式伯爵茶茶香朱古力慕斯。迷你蛋糕则有四款选择,包括清香嘅玫瑰芬香茶柚子蛋糕,同香浓嘅黑森林樱之颂!茶香朱古力蛋糕。
 

经典红丝绒蛋糕  Lady M


红丝绒蛋糕

平时讲开呢间美国过江龙,通常第一时间都会谂起千层蛋糕,但嚟到圣诞佳节就会变成经典圣诞蛋糕:红丝绒蛋糕!今年嘅原个红丝绒蛋糕用雪花、冬日小屋、迷你圣诞树同可爱北极熊朱古力片点缀,件装蛋糕亦会以雪花及糖珠装饰。加上口感湿润、味道浓厚嘅传统美式红丝绒蛋糕,节日气氛够晒浓厚。
 

传统日式蛋糕  A-1 Bakery


(左至右)圣诞小村庄(比利时生朱古力蛋糕)、白雪祭(士多啤梨杂果蛋糕)、圣诞树头卷蛋

日本人过圣诞亦会买圣诞蛋糕庆祝,呢间嚟自大阪嘅面包糕饼店今年就以日本圣诞蛋糕传统滋味为主题,推出由日籍师傅设计及主理嘅传统日式蛋糕,好似白雪祭就以经典日式蛋糕士多啤梨杂果蛋糕为基底,选用香滑法国忌廉,配搭鲜果同芒果热情果酱,甜而不腻。比利时生朱古力蛋糕就用咗60% 比利时生朱古力,朱古力控必试。

 

文:Cathy

关键字
圣诞
圣诞节
蛋糕
Cupcake
红丝绒蛋糕
开饭专题
开饭仔为你提供各类型最新饮食情报及优惠,全面照顾你的饮食喜好。
餐厅资料
更多
收起
本月热门
【随时更新】零食速报 每周新款零食、酒品点评
4天前
【2021生日优惠】超爽着数!免费任饮任食日式烧肉/火锅(持续更新)
2021-04-12
【最平$298最贵$938】佐敦新开日式和牛烧肉放题 独家引入鹿儿岛小田和牛
2021-04-09
带妈妈味游异国!母亲节Brunch六选
2021-04-20
3月份好评餐厅十强
2021-04-08