【飲食潮流】尖咀人氣雪糕店新款果味雪糕投奔初夏

夏天為大地帶來的唔止美腿，仲有美食！雖然而家大家都好鍾意愈凍愈要食雪糕，但當熱辣辣熱辣辣好熱好熱嗰陣食，嗰種透心涼嘅感覺又真係好爽！尖沙咀有間人氣雪糕店就搶先喺初夏推出咗兩款果味雪糕同埋幾款輕食，畀大家喺味覺上投奔初夏。

呢兩款果味雪糕分別係芒果味同士多啤梨味，面頭仲淋咗啲果醬，開飯仔建議大家都係唔好掛住餵飽你部相機，快啲食咗先，雪糕唔等得呀！而除咗呢兩款雪糕，觀察力強嘅朋友仔應該會留意到兩支甜筒有啲特別，一支塗滿咗白朱古力，一支就係朱古力彩碎，任你想點搭都得。兩款口味都唔算話好甜，淡淡咁滲出果香，配埋朱古力甜筒咁嚟食，甜度啱啱好。

食雪糕有少少罪惡感？加返啲生果會唔會好啲？蜜瓜芭菲或者士多啤梨芭菲個底都係有鮮甜嘅芒果粒，夾住啲殼片脆脆，有啲咬口，雪糕仲可以揀要牛乳味定係抹茶味。唔好講笑，食晒一杯都幾飽。

抹茶控留心，呢度有個京都宇治抹茶輕食，包括咗個抹茶芝士蛋糕、草莓大福配白玉同十勝紅豆等等，個抹茶芝士蛋糕有幾層㗎，由上到下分別係抹茶蛋糕、芝士、抹茶芝士，中間仲夾住層好薄好薄嘅紅豆層，芝士味同抹茶味分佈平均，濃得嚟又唔覺膩。個大福都幾特別，咬開原來係黃豆蓉加茶葉嚟。

如果覺得呢個輕食都唔太輕嘅，可以揀日本直送水果輕食。成碟都係生果，夠晒輕夠晒健康喇啩。日本生果不嬲都係甜啲，仲要係蜜瓜、士多啤梨、奇異果呢三款生果，就更加甜嘞，個蜜瓜仲好多汁添。

詳情：
4月30日起，海港城分店獨家推出

文：Kar

隨時接收最新資訊
讚好OpenRice專頁！