香港人都喜歡吃日本菜是常識吧。不過，近日舉行嘅第6屆東京食蟲節裡面嘅蟲蟲料理，你哋又夠唔夠膽挑機先？有壽司、有咖喱飯、有火鍋、有小食，連「清水」都有，睇嚟明將要退位讓賢了。
Come on，點返個蟲蟲壽司，好不？
師傅即場好畀心機整㗎，搓靚嚿飯之後，再好似平時放甜蝦咁放條蟲蟲喺上面，想要軍艦嘅一樣得，得咗！都幾多款揀，有黃蜂啦、蝗蟲啦、粉蟲啦、青蕉小強啦，同埋蠶蛹，嗯，總之就係蟲蟲啦，2件盛惠400円。
食完壽司，不如打返個邊爐。有日式火鍋shabu shabu呀！不過係黃蜂幼蟲shabu shabu，唔知係咩味嘅呢？講明先，唔係成個蜂巢畀晒你食呀，400円兩條呀。
除咗傳統日本美食，呢個食蟲節仲突破國際防線，連土耳耳斯坦咖喱飯都有得試，呀，正確嚟講係土耳其斯坦小強咖喱飯，睇圖所見，都幾足料㗎。500円就可以食到一碗咁有國際風味嘅菜式。
食咗咁多嘢，飲返杯水漱個口啦。
Btw，你唔係以為呢杯真係清水嚟呀嘛天真豬？話明食蟲節，梗係蟲製水啦。係混埋巨型水曱甴製成㗎！嗱，唔好噴水呀，聽講係有陣甜甜地嘅香味㗎。
如果下年仲有第7屆嘅，大家不妨去挑戰下，我等你哋嘅試食報告呀。
文︰Kar
圖片來源：otouhutaishou （Twitter）
資料來源︰ Rocketnews 24
隨時接收最新資訊
讚好OpenRice專頁！
关键字
東京
食蟲節
蟲蟲
日本
壽司
复制到剪贴板