咁耐冇得去旅行，唔知大家有无啲挂住喺泰国行夜市嘅感觉？以前去得泰国嘅market，人人都必定会食名物香蕉煎饼，不过原来而家喺香港唔少地方都已经有得食喇，而且重发展出好多唔同口味同配搭，今次介绍5间有卖泰式煎饼嘅小食店同餐厅畀大家，等大家喺香港都食到泰国味道！
Foodie泰式煎饼 (旺角)
由80後酒店厨师主理，主打泰式煎饼同鲜果捞嘅小食店。泰式煎饼有八种口味，最特别系有咸有甜，除咗经典香蕉口味，重有马来西亚100% D24榴槤煎饼，加入满满嘅榴槤蓉，喺表面洒上糖霜，一入口就感受到阵阵榴槤香气，锺意榴槤嘅朋友必试！咸味选择方面当然唔少得近年最hit嘅「荽」喇，芫荽火腿芝士口味加入火腿丝、芝士粒、芫荽同沙律酱，芫荽味恰到好处又唔会太抢，另外香滑芝麻麻糬煎饼都好值得试，香脆嘅煎饼配上烟韧麻糬，口感系几特别嘅。
图: 泰小子 (屯门)
屯门呢间泰式煎饼开业冇耐就已经储咗唔少fans，曾经创下日卖200份嘅纪录，真系唔简单！呢度嘅煎饼搓得好薄身，即叫即煎，所以食落特别脆口。口味方面就以甜味为主，除咗常见嘅朱古力香蕉、榛子酱香蕉等，店主将时下港人最锺意嘅食物加入煎饼中，如芝士紫薯煎饼同芝士榴槤煎饼，两款口味都甜咸交错，反而冇净系甜味嘅煎饼咁易腻。咸味方面芝士肉松都唔错，加入鸡蛋、肉松、芝士及沙律酱，好惹味！
图: 香蕉仔 (元朗)
前年结业、元朗超人气嘅泰式香蕉煎饼，今年年头喺原址重开返，重keep住长期都大排长龙～唔同口味嘅香蕉煎饼，每一份都热辣辣，一共有8种口味，甜味包括招牌原味、榛子酱、炼乳、朱古力、阿华田同花生酱。外层香脆，香蕉份量又足！温馨提示营业时间由16:00开始，预计等待时间为45-60分钟，有心试嘅朋友仔可以拎咗筹再去行下街先。
图: tiffsuet
泰谷 (荃湾)
近几个月先开，位於荃湾路德围嘅泰式小食店，泰式煎饼有香蕉同榴槤两款口味，可以自选朱古力酱或炼奶，外脆内软而且味道香甜。除咗煎饼，舖头亦有唔少小食都几有惊喜，如铁板龙虾海鲜炒面，选用泰国龙虾，龙虾弹牙而且烧得唔乾身，而酱汁可选蒜味、黑椒同最人气嘅冬阴公酱，好有泰式风味！
Samsen 泰馆 (上环)
米芝莲必比登推介嘅泰国菜，亦系湾仔人气船面店泰面嘅姊妹店，好多人都系为招牌和牛船面、咖喱面同Pha Thai而去，但原来Banana Roti一样咁受欢迎！大厨会将煎好嘅薄饼面，夹入香甜嘅香蕉，最後再放上铁板煎一煎後上碟，淋上大量炼奶，咬落去系劲薄脆又充满炼奶香甜，好出色！另外仲可以加埋Nutella㗎～
图: 文: Yanica
编：Kar
