虫子hat's Profile

清湯牛爽腩河 $90清湯崩沙腩河 $90餐廳選用左騸牯牛 聽個名覺得好似好pro咁🤓牛味好濃 肉質好滑 膠質都好足夠😝個湯係熬左18個鐘嘅牛骨湯 清甜又唔會覺得漏😚蘿蔔好腍 又吸收埋湯嘅精華 河粉非常之滑口😋ps牛坑腩/爽腩/崩沙腩都係限量供應 有興趣記得早d去😉咖哩牛丸 $42咖哩魚蛋就食得多 牛丸真係第1次 估唔到又幾夾😯牛丸好彈牙又有牛味 咖喱汁又夠哂惹味😜炸魚皮 $28份量都幾多 脆卜卜 配湯河食幾好😁…Read More

之前嚟嘅時候，呢度都係人山人海架，但因為疫情嘅關係係，少咗好多人堂食，亦都唔使排隊等咁耐啦。前兩次食嘅都係蕃茄豬扒焗飯，一個餐有齊湯、飲品同焗飯，價錢喺同區來講算係合理，但質素嚟講我會鍾意大X樂嘅厚切豬扒多啲。今次再嚟就試試新野 — 鐵板農家雞扒。可以揀用鐵板或者碟上，有燒汁、黑椒汁同蒜蓉汁可以選擇。塊扒嫩滑有雞味，幾有驚喜，出嚟果陣熱辣辣、沙沙聲，好食過焗豬。另外見到好多人叫和式定食，大約$55，價錢算抵食。午餐嚟講可以再encore 🙂…Read More

心血來潮想食碗麵，印象中食過依間味道唔錯，今日過嚟翻兜。有少少意外咁耐都冇加過價。魚蛋同魚片嘅魚味都好重，食得出係真材實料。魚蛋非常彈牙，優秀！見好多人都喊爽腩下次嚟會試吓。份量算係一個輕盈午餐，男仔一定唔夠食，建議叫撈麵。…Read More

年尾因為有社企禮券就到期，揀左依間餐廳，食物質素比想像中好。蒜蓉包香脆可口，有驚喜。羊架同三文魚意粉係好食嘅，雖然D白汁比較膩，但喺正最凍果幾日去，反而覺得好飽肚 😂 羊架肉嫩呈淺粉紅色，唔會太un。睇吓果朵三文魚花，擺盤都幾有心思。員工包括傷健人士，部分或需要以手語溝通，又或或動作行為會比較誇張，希望大家俾多啲包容。午飯嚟講小貴，不過喺尖沙咀地區來講算係合理，食物質素比想像中好，支持下社企嘛💪🏻P.S. 最難忘係個蒜蓉包🤤 P.S.2 覺得坐入面啲嘅位置氣氛比較好🙂 …Read More

之前聽朋友介紹已經很想來，今次好友生日，餐廳又推出優惠，決定前來一試。餐廳做足防疫措施，包括量體溫、消毒噴手、設置防飛沫隔板等。我們較早到達，侍應生安排了窗邊的位置給我們，景色較好。沙律份量比想像中多，以跟餐沙律而言，質素屬於中上。這道安格斯肉眼扒應該是餐廳的招牌菜，賣相很吸引，味道亦沒有讓人失望。我們點的是五成熟，看得出廚師煎扒的功架很不錯，很多餐廳都會煎得太熟，變成七成熟的模樣，但這家的成品是「真五成熟」，入口是滿滿的肉汁，一點也不韌，食肉獸/牛扒愛好者必試！另外薯條用小鐵鍋盛載，可以保留熱度，是貼心的考量。至於香煎魚柳味道則相對普通，不過配菜頗有驚喜，醬汁很開胃，彌補了主角的不足。我們坐了足足兩小時談天說地，侍應生仍然非常有禮貌地添開水，也沒有施加壓力讓我們離開。有個小提點，如果你跟朋友分享吃的話，有需要可於點餐時特別說明逐道菜上，以免後來的餸菜冷掉。這頓生日飯友人和我都非常滿意，相信我們會再次前來。…Read More

點左招牌蝦湯拉麵。麵底係最ok的，煙韌有口感，叉燒較一般，below average。至於個湯底，食得出係鮮蝦嘅，但真係好咸...我飲咗幾杯水。如果你比較淡口味的話，我唔太推薦。如果你從事體力勞動嘅工作，相信呢碗麵可以為你補充大量鹽分另外服務態度一般，見到有兩位侍應姐姐喺埋便傾偈，得返一位哥哥仔喺出面招呼客人。裝修幾靚，對外嘅吧枱位置適合傾偈。不過疫情之下呢...大家堂食都係小心為上吧！原諒我冇影到相 :(…Read More

鹹蛋肉餅上次嚟冇食到，今日終於試到喇 ～個肉餅成層塔咁高，份量亦好多，同朋友兩份食其實有點多，朋友又細食，食本都食唔完咁。肉餅咬落鬆軟，肉質夠淋。味道唔會太鹹，對淡口味嘅我嚟講剛剛好，加上DD蛋黃會有畫龍點睛嘅效果，撈飯食一流，不愧係鎮店之寶！手撕雞又係堆到一個塔咁，好有層次 xD D雞好入味但有點鹹，對我嚟講比較重口味，但如果係不嬲出開街嘅朋友應該會覺得啱食。店鋪位置唔多，晚飯時段嚟食最好七點到，再遲D嘅話可能要等下。店內冷氣唔大，如果坐近門口會比較熱同可能會食少少二手煙，如果介意最多坐入D。見老細同D客有講有笑，應該係街坊，相信都係做街坊生意多。下次要試埋個膏蟹蒸蛋！P.S. 今次用咗Openrice嘅現金券，有得平$10，唔好錯過呀 ～…Read More

叫左三餸麵，牛肚、豬大腸、蘿蔔，幼麵。牛肚有成6、7塊咁多，抵食！夠淋、牛味重，浸完個湯底真係好好味。豬大腸有4件，淋得嚟又有咬口，係我鍾意嘅質感，不過比起豬大腸我更加鍾意牛肚多一啲。蘿蔔冇渣，啲湯底入晒落蘿蔔度，非常香甜。依一碗車仔麵、依一個配搭，冇一點令我失望。以試過嘅餸嚟講，暫時心中嘅排名：牛肚 > 雞翼尖 = 蘿蔔 > 豬血 = 豬大腸 （人人喜好不同）聽講西洋菜好好味，可惜阿姐話已經冇晒 😭 下次再嚟試！P.S. 留意番呢度只收港幣現金，記得帶夠錢呀。…Read More

之前去過銅鑼灣分店覺得幾好味，今次嚟到佐敦分店。比起銅鑼灣舒服同大，座位頗多，格局似酒樓。侍應有禮貌，唔會太chur你點菜。4個人，點咗老火湯、豆腐魚腩煲、上湯浸時菜（揀咗娃娃菜）同沙拉骨加3碗白飯。豆腐幾滑，魚腩有3-4塊，味道不過不失。時蔬味道剛好，唔會太鹹。沙拉骨比較失望，肉質較鞋，唔太值得點。老火湯大大煲，夠足料，煲底好多材料，$55真係超值。飲得出唔係味精湯，有屋企湯嘅味道。埋單每人一條紅衫魚有找，今時今日，仲想點 xD 超值啦 ～ …Read More

Burger Joys係我第一次食完就愛上嘅漢堡包，佢嘅Signature double cheese burger咬落去啖啖肉、肉汁多，麵包有少少烘唔會太軟，加埋番茄、洋蔥、芝士等配料，簡直係人生一大享受。聽聞個麵包配方係老闆用一百萬同人買返嚟嘅，而個包亦真係口感好好。自從食完之後，我就係咁推介朋友同同事嚟食。有兩位嘴刁嘅朋友食完，都覺得真心好味 Burger之外，佢嘅薯條就比較遜色啦，有d似麥記嘅薯條，上面再淋少少醬料，都算脆，但唔值依一個價。但係佢嘅雞翼非常之好食，水牛雞翼我就麻麻，但另外一隻Crispy Garlic同Cajun都好好味。Crispy Garlic有d似泰式醬汁，甜甜地咁；Cajun就辣得嚟好爽，我唔太好辣都好鍾意。我真係好鍾意食Burger Joys，好快會再嚟㗎啦 …Read More

為咗開會搵咗依個地方 ～真·龍蝦肉 蕃茄醬意粉睇咗好多食評先敢叫依個粉，真係龍蝦肉嚟㗎，蕃茄粉就正常嘅茄粉，冇乜特別。本身鍾意食酸野，整體味道唔錯。到嘢飲啦，依杯Americano打破咗我對咖啡嘅印象，我竟然飲得出涼茶嘅味道，好淡同少苦，冇乜咖啡嘅香味...話係飲過最難飲嘅咖啡都不為過。作為「文青聖地」但咖啡難飲好似有點說不過去。另外如果你好肚餓，千祈唔好嚟依度，因為佢哋出嘢食嘅速度係奇慢！我哋成枱六個人，每個人都要等45分鐘至一個鐘先拎到嘢食，食物嘅質素祗係好一般。雖然杯嘢係好唔掂同嘢食都係一般，不過喺尖沙咀有一處可以買杯嘢飲就唔限時、有wifi、有得叉電、又啱開會討論嘅地方，實在唔容易。依度樓底唔高，聲音集中（不過相對亦會容易聽到隔離檯嘅聲），如果想需要用電腦工作或者開會都唔錯，同埋通常wall-in都會有位。見佢好評都唔少，依個質素嚟講有點失望。…Read More

坐忘我已經幫襯咗好幾年，都唔記得食過幾多次喇，每次都係點炒15種野菜咖喱飯或豬軟骨咖喱飯。好鍾意佢果種日式家庭料理嘅感覺，覺得好warm好舒服。咁多年嚟水準都保持穩定，豬軟骨煮得好淋好容易入口，好大份好正，應該滿足到各位食肉獸。有位朋友平時唔食豬軟骨，我俾咗一舊佢試之後，佢問我再拎多一嚿（笑）至於15種野菜咖喱飯，據佢哋所講350g嘅蔬菜已經係人體一日所需嘅蔬菜份量，而且有15種咁多，口感非常豐富。我最鍾意食炸蓮藕片，薄薄脆脆好好味。素食嘅朋友可以揀依個！咖喱飯份量都唔少，建議細食嘅朋友叫少飯避免浪費 ～ 佢地午市/晚市同價，以天后區嘅晚飯嚟講，性價比真係冇得輸，難怪晚飯時段總見到一條人龍。…Read More

朋友話想食西班牙菜，去附近見到呢一間評價唔錯，就入咗去。唔係好肚餓，只係點咗兩道小菜同一杯啤酒。1）伊比利亞豬肩肉, 燒茄子有驚喜，豬要整得好食比較考功夫，肉汁鎖得好，香得嚟又多汁。茄子燒得夠淋同香。講起都流口水🤤2）西班牙鱈魚, 墨汁小米朋友食咗舊鱈話好鹹，我再試試，鱈魚係鹹但而D飯好淡，但兩樣夾埋一齊食嘅話味道竟然意外地夾，點埋cream的話味道層次會再豐富D。3）環境比較relaxing，我哋去到嗰陣已經冇晒卡位，唯有坐吧檯。佢哋係open kitchen，坐吧檯你可以睇到晒佢哋點樣處理食物同埋煮每一道菜，廚房衛生都唔錯。兩道菜嘅份量唔多，但貴精不貴多，都係高質素嘅。好多道菜都想試，下次會call多啲朋友一齊嚟食！…Read More

難得嚟中環做義工，晏晝就搵吓附近有乜嘢好食啦！記得好耐之前有喺附近返工嘅朋友介紹過，就嚟咗陶館。入到去好似去咗另一個世界咁，牆上有用粉筆畫嘅小忌廉同一啲插畫，仲有啲心靈雞湯嘅句子，係爭分奪秒嘅中環區見到份外覺得窩心。點咗原條鰻魚蛋包珍珠飯，一上菜 ～ 哇 ～ 鰻魚肥美，鰻魚汁好掂，蛋又香又滑 撈飯一流 ～ 搞到本身Keep fit緊嘅我都忍唔住食晒成碟飯。份量唔細，應該一般男士都會夠飽。午餐仲包埋一杯台式飲品，因為要養生，我點咗韓國蜂蜜人蔘紅棗茶。咁嘅食物水準同配搭都只係$74，喺中環區嚟講，真心係良心價，嚟開一定會再幫襯！…Read More

:) 不俗的中式點心是日與友人在旺角飯聚，揀選了這間一嘗點心，不到三分鐘即可進入。或因門外無食客輪候，店員沒有催我們點餐。 上菜速度蠻快，雖然誤把淨雞翼連飯上，不過很快就更換了。用餐完畢，店員旋即替我們結帳(有人在外面等候吧)。總括而言，食物質素中上，必食生煎包，喜愛點心的朋友值得一試。…Read More