wifi.tszching.chui's Profile

今日去咗尖沙咀海旁散步，晚上入去K11 Musea B2樓嘅Foodcourt搵食。其中試咗拉麵店——「次郎拉麵」嘅招牌三色拉麵。??Signature招牌三色拉麵 一碗拉麵有齊雞肉、牛肉、豚肉三款肉，仲有原隻溏心蛋！雞肉嫩滑，牛肉係比較高質嘅肥牛，豚肉肥瘦適中，湯底本身係豚骨湯，但我加咗$10轉咗「香濃海老湯」，真係冇改錯名！湯頭超濃郁，拉麵就係鍾意呢種重口味。😋 雖然本身拉麵已經跟咗木耳絲同埋少量嘅荀，但我都另外再加$12要多咗荀，爽脆清甜，同濃湯好夾！??靜岡綠茶（+$20） 食濃湯拉麵點可以冇嘢飲？單買左枝日本靜岡茶。另外呢度其實有個$148套餐可以包一碗拉麵一份炸雞同一支嘢飲，不過我驚自己食唔曬咁多肉就冇叫喇，但其實套餐抵食好多。…Read More

今日去咗尖沙咀K11 Musea行街，順便試吓B2樓Food Playground入面嘅「YumMee」。我地已經係其他餐廳買左主食，所以係呢到純粹叫左個岩食嘅雜錦小食拼盤，一款拼盤有齊6款小食，啱晒我哋呢啲咩都想試吓嘅人！拼盤包括：🍗 香茅單骨雞翼 – 帶點香茅味，炸得啱啱好，外脆內嫩，仲係單骨食起上嚟更方便！🌯 春捲 – 脆卜卜，入面係蔬菜餡料，唔會太油膩。🐟 魚糕 – 食落有啲似台灣甜不辣，有點彈牙煙韌口感。🍢 魚餅 – 味道香口，點埋佢哋嘅甜辣醬更惹味！🍖 沙爹雞肉串 – 沙爹醬濃郁，細細串，啖啖雞肉！🥟 炸雲吞 – 薄皮超脆，入面有少少肉餡，好香口。環境方面，YumMee位於K11 Musea嘅Food Playground美食廣場入面，雖然係開放式空間，但座位都算寬敞，我地仲坐到卡位，燈光柔和，坐得幾舒服。成個環境乾淨企理，加上K11 Musea本身設計感十足，食完嘢行吓商場都係一種享受。…Read More

今日去咗K11 Musea地庫「牛爸」鋸扒。呢到專賣鐵板牛扒，有T骨扒、肉眼扒同埋西冷扒等等嘅選擇，雖然坐落喺高級商場裏面，但價錢親民。🌟鐵板肉眼一上桌就聽到「滋滋聲」，鐵板熱辣辣，視聽嗅覺全部滿足！肉眼牛扒肉質軟嫩，黑椒汁香濃微辣，淋上牛扒同薯條度簡直絕配！粗身薯條炸得外脆內軟，蘸滿黑椒汁之後更加惹味，邪惡度爆燈！伴碟有三色豆同西蘭花，平衡返罪惡感（笑）～➕$18羅宋湯加配！羅宋湯酸酸地幾開胃，有滿滿蔬菜同牛肉香～簡簡單單又一餐，如果去開海旁又想搵啲親民選擇的話，K11 Musea呢個food playground會係一個好選擇。…Read More

今日去咗Kerry Hotel個Food Court食晚餐，中意佢環境坐得舒服得嚟又有live band。見到呢間新開嘅海南雞店，叫咗個二人套餐，200蚊鬆啲有齊湯、小食、海南雞、元蹄、飯同埋小甜品。湯可以揀無味精靚湯或者肉骨茶，我哋每款叫咗一個試下。王牌無味精靚湯-當日係南瓜紅蘿蔔粟米豬骨湯，非常好飲，好夠味，我連湯渣都食埋。呢個質素似出面賣幾十蚊一碗嘅老火靚湯。肉骨茶，上檯已經問到藥材味，都算正宗。香麻辣鳳爪，已經起咗骨，口感爽彈，食落酸酸辣辣好開胃。極品海南雞半隻，已經起曬骨，雞皮金黃透亮，入口爽脆唔油膩；雞肉嫩滑有肉汁。另外配埋3款海南雞醬料，黑豉油鹹甜適中，薑蓉辛香提味，仲有隻酸酸甜甜汁。鹵水元蹄，鹵得入味，骨膠原十足。時菜當日係灼生菜配蠔油。飯可以揀雞油飯或者白飯，我哋又係揀咗各一試下。雞油飯平時屋企唔會煮，所以食海南雞一定要嗌。最後仲有兩粒蒟蒻做個小甜品。…Read More

今日同朋友去咗旺角雅蘭中心嘅「意粉狂熱」食晚飯，餐廳位置方便，地鐵站行兩步就到。我哋叫咗兩個小食同兩個主食。🌟焗薯皮拼盤薯皮新鮮焗起，個鐵烹仲熱辣辣，拼盤有三種口味，肉醬/咖哩/厚煙肉，面頭再有一層芝士！薯皮焗得外脆內軟，三款口味各有特色： - 肉醬味：似迷你肉醬意粉舖喺薯皮上，酸酸甜甜好開胃。- 咖哩味：日本咖哩味，再有少少紅蘿蔔粒。- 煙肉：經典配搭，厚切煙肉碎加芝士，我個人最鍾意呢隻味。建議3-4人分享，因為兩個人食會幾飽！ 🍗香烤雞翼（檸檬蜜糖）(4隻)雞翼控必點！皮脆肉嫩，蜜糖甜味中和咗檸檬嘅微酸，4隻食完唔夠喉！ 🍝香煎鮭魚配味噌忌廉鮮製意粉三文魚肉質滑溜，意粉用咗扁意粉，掛滿味噌忌廉汁，鹹香得嚟唔膩，仲有啲蘑菇，口感豐富。 🍤精選海鮮蒜香蕃茄意粉海鮮有一大隻開邊蝦、幾隻青口同魷魚圈！蕃茄醬酸酸甜甜好濃鬱，圓意粉煮得啱啱好有咬口，最欣賞係醬汁收得夠乾身，唔會水汪汪。如果唔想煩呢度都有套餐選擇，$298up有好幾款2人餐，有齊餐湯/沙律/主菜/甜品/嘢飲～ …Read More

今次同朋友去咗旺角砵蘭街嘅「明記潮館」食潮州菜，環境乾淨企理，而家仲做緊滿$300可以用$8加配鹵水雜錦拼盤/韭菜豬紅嘅優惠。我哋揀咗鹵水雜錦拼盤，都有返咁上下份量，滷得入味，抵食！ 另外叫咗幾個小菜。風沙豬手炸得外皮酥脆鹹香，食落惹味，但食得多會覺得油膩，建議多人share。 蠔仔肉碎粥（細）雖然叫咗細份量，但都可以分到四五碗。蠔仔鮮甜無沙，鍾意食潮州粥有一粒粒米嘅口感，加埋肉碎同芫荽，暖胃又滿足。 涼瓜炆龍躉頭腩龍躉頭腩膠質豐富，涼瓜係爽脆啱曬我口味，唔會炆到太軟淋，保持到口感。 蒜蓉粉絲蒸蟶子王蟶子唔算特別大隻，但蒸得剛好，蒜蓉同粉絲吸收晒鮮味，好香好惹味。 總括來講，明記潮館水準穩定，價錢合理，尤其海鮮同滷味出色，適合一班人聚餐！ …Read More

今日專登去咗尖沙咀加拿芬廣場地下嘅Milkfill，試吓佢哋嘅招牌拿破崙泡芙！鋪頭唔算大，但裝修幾精緻，仲聞到陣陣牛油香，未食已經流晒口水。叫咗三款味道 - 原味、杏仁、開心果味拿破崙泡芙。店員即場唧吉士醬入去，睇住佢唧到滿晒，真係好治癒！個泡芙外型同傳統好唔同，係扁身嘅拿破崙酥皮，咬落去「咔嚓」一聲，脆到不得了！酥皮有濃郁牛油香，仲有層次分明嘅千層口感，但食落又唔油膩，正！入面嘅吉士醬凍凍哋，質地夠滑又唔會太甜。原味吉士醬見到有啲雲呢拿籽，面頭加左少少吉士醬輕輕燒香過，食落好似creme brulee、杏仁泡芙面頭有一塊塊烤脆咗嘅杏仁；開心果味帶有淡淡嘅堅果香，面頭仲有少少開心果碎，增添口感。整體來講，呢個泡芙創意同傳統兼備，味道同口感都好出色，對得住佢個價錢，經過尖沙咀絕對值得試吓！…Read More

今日去咗觀塘啲商廈到覓食，Openrice search到「Add Some Thai Restaurant」呢間泰菜小店，食落覺得唔錯！ 叫咗一個4人套餐（HK$828）超抵食，份量十足！泰式酸辣鳳爪沙律，鳳爪爽脆無骨，酸辣汁醒胃，青檸香茅味突出，辣度適中，開胃前菜必點！ 原隻海蝦雜錦海鮮冬蔭功湯用熱爐滾住，湯底香濃又夠酸，海鮮有蝦同蜆； A.S.T小食拼盤包左好多款小食，尤其單骨雞翼、手打蝦餅同炭燒豬頸肉岩的口胃，雞翼酥脆，蝦餅有咬口，豬頸肉爽彈！ 泰式無骨海南雞好嫩滑，配埋泰式醬汁好開胃。 鹹蛋黃酥炸海蝦鹹香惹味，面頭包裹滿鹹蛋黃茸，蝦肉彈牙，非常香口！ 招牌冬蔭海鮮菠蘿炒飯炒得乾身，面頭仲冧咗豬肉鬆，仲配咗碗冬蔭功湯。 馬拉盞通菜炒得夠鑊氣，好惹味。最後嘅招牌椰汁千層糕軟糯香甜，面頭淋咗椰汁，完美作結！ 如果唔鍾意食椰汁糕嘅亦可以加錢升級芒果糯米飯。總括嚟講，呢間泰菜性價比唔錯，味道算正宗，服務同環境都唔錯，食完都真係Add Some Thai多左d泰國味，會再encore！…Read More

今日同朋友去咗佐敦嘅七福神和食亭，係裕華國貨附近，地點就腳，坐得舒服，啱晒傾偈慢慢食。 **頭盤：蟹子沙律（細）** 沙律菜新鮮爽脆，蟹子份量唔吝嗇，撈埋沙律醬食好開胃，細份都夠2-3人share！ **壽喜燒牛肉鍋燒烏冬** 烏冬係讚岐烏冬，壽喜燒湯底甜度適中，牛肉片嫩滑，仲有豆腐、本菇等配料，熱辣辣上枱，秋冬食肯定更正，可以暖下胃！ **鹽燒油甘魚鮫** 魚鮫燒得外皮香脆，肉質超嫩滑，魚油甘香，擠少少檸檬汁更提鮮，必點！ **柚子胡椒豚肉野菜炒** 呢個有驚喜！豚肉片炒得夠鑊氣，野菜爽脆，柚子胡椒帶微微辛辣同清香，好惹味！ **串燒拼盤五品（雞翼、小青椒、金菇牛肉、雞軟骨、冬菇）** 串燒即叫即燒，火候掌握得幾好。特別鍾意金菇牛肉卷，金菇索晒牛肉汁，好juicy；雞軟骨香脆有嚼勁，雞翼外皮脆內裡嫩，小青椒解膩，整體水準唔錯！ **甜蝦唐揚** 炸粉薄脆，蝦肉鮮甜彈牙，送酒小食之選。 **清酒煮大蜆** 蜆肉飽滿冇沙好大隻，清酒湯底鮮甜帶酒香，飲埋啖湯好滿足。 整體價錢合理，份量足，服務態度亦友善。如果想喺佐敦搵間坐得耐、傾得舒服嘅日式居酒屋，呢度係唔錯選擇！ …Read More

今次同朋友去咗尖沙咀B&B Oyster Steakhouse，地點就喺美麗華廣場2期，方便易搵！餐廳環境幾有格調，座位闊落坐得舒服，最正係晚市有Live結他唱歌表演。我哋咁啱撞正隔離枱生日，歌手會走過去唱生日歌，全場一齊拍手，氣氛超熱鬧！ **🔸 抵食優惠** 用OpenRice book位有折之餘，仲發現個超值deal： ✅ 叫一打生蠔即送紅/白酒一枝！生蠔新鮮海水味濃，配白酒簡直絕配～ **晚市套餐** 脆炸德國咸豬手 ($288)外皮炸到超脆，入面肉質嫩滑唔乾身，份量夠3-4人share，側邊仲有啲淋咗Cajun粉嘅薯條，抵食！ 是日餐湯係蘑菇湯，飲到粒粒蘑菇肉好正，店員話加咗意大利牛肝菌！餐包食落有啲似outback嘅黑糖包，鬆軟口感外皮帶脆。另外加左碗龍蝦湯，濃郁creamy，仲飲到啖啖龍蝦鮮味，夠濃味！ 另外嚟到蠔吧就梗係叫生蠔食啦，我地叫左最平嘅Pacific Rock生蠔 $23/隻，半打，每隻都新鮮肥美有海水味，知少少檸檬汁鮮味爆曬燈！**🎨 本地藝術主題** 餐廳位置以前係畫廊嚟，餐廳成租咗之後同畫廊合作，推動本地畫作文化，每個月都會轉畫作主題，今次遇上 「夢遊獨角獸」佈置，值得支持！…Read More

銅鑼灣京都廣場6樓嘅「川滿居」一直係我嘅川菜口袋名單，前幾晚再同朋友食個過癮！ 首先必點嘅當然係金湯酸菜魚，湯底濃郁，酸菜夠晒入味，魚片嫩滑冇骨，仲有薯粉、萵筍、菇菌索汁，酸辣得嚟唔會太嗆喉，好開胃！ 麻辣香鍋，我哋揀咗海蝦、蓮藕、萵筍、金菇同牛蹄筋，醬汁要咗香辣級別。一上枱就聞到陣陣香料味，海蝦偏細隻，牛蹄筋炆得軟腍，蓮藕同萵筍爽脆，金菇超索汁，辣度啱啱好，送飯一流！ 乾扁四季豆，醬汁濃郁，炒得乾身，帶少少焦香，好惹味，送飯一流！魚香茄子佢落左醋煮，同平時食開嘅粵版魚香茄子唔同味，但做得夠鑊氣，茄子走過油又軟滑，好味！…Read More

半夜三更喺旺角搵食，砵蘭街呢間「好燒式」絕對係邪惡之選！營業到凌晨2點，串燒即叫即燒，今次試咗成枱嘢。👇 **✨肉食獸天堂** - **安格斯牛肋串（$30）**：牛味濃得嚟帶微微焦香，咬落有肉汁爆出！ - **陰公豬（$30）**：其實即係冬陰功味嘅豬腩肉，豬腩肉好爽彈，肥瘦層次超邪惡。 - **西班牙黑毛豬肋串（$30）**：肉質爽彈，油脂滿溢！ - **雞全翼（$22）**：街坊價！燒到皮脆肉嫩，撒滿孜然粉夠惹味，必點。 - **泰式燒豚肉（$42）** ：其實即係豬頸肉，面頭加咗少少泰式甜辣醬燒到微微焦香！ - **日式雞柳串（$20）** ：雞肉好嫩滑，塗上照燒汁。 **🔥人氣之選** - **鹽燒油甘魚鮫（$118）**：魚皮脆到咔嚓聲，魚肉多汁，肉質細嫩，擠少少檸汁已經鮮味爆棚。 - **黑松露菌蝦多士（$68）**：多士鬆脆，但有點油，蝦膠彈牙，黑松露醬落得豪氣。 - **煙肉蘆筍卷（$22）**：蘆筍清甜中和煙肉鹹香，食多幾串都唔膩～ - **煙肉金菇卷（$22）** ：煙肉鹹香包住多汁金菇，燒到煙肉脆邊，金菇索盡油脂精華，一啖咬落去爆汁！**🍢蔬菜素食** - **串燒豆腐（$22）**：外脆內滑，外層掃咗啲甜醬油吊味，素食者必點。 - **翠玉瓜（$32）** ：厚切翠玉瓜燒到外微焦內多汁，撒上蒜蓉同七味粉，清新解膩，保持到蔬菜鮮甜。- **豆卜（$18）** ：豆卜燒到外脆內軟，吸滿燒汁，簡單但好味。 呢度嘅串燒唔會燒到乾爭爭，火候控制得剛好，調味可以自選辣度/蜜糖/孜然粉/辣粉/麻辣汁/泰式酸辣汁。…Read More

今次同班friend殺上觀塘廣場15樓嘅「校長燒肉日韓料理」，位置唔起眼，但其實開左好多年，地膽一定識！我哋食$298價位，入座店員就叫我哋社交平台打卡讚好，可以免費升級送咗盤限量高級和牛豚肉拼盤，入面有齊美國頂級手切牛、北海道A4和牛肋條、A4黑毛和牛同千歲米豚腩！重點推介北海道A4和牛肋條同黑毛和牛，燒到微焦一咬落去——油香爆出嚟，肉質軟到好似雪糕咁化開，「牛魔王」必食！ 自助區亦都豐富：刺身十幾款，大蝦鮮甜到彈牙、帶子厚切細粒無渣，三文魚油潤，仲有榮螺、魷魚⋯⋯回本位之一！燒物區種類好多，雞扒、雞翼、三文魚、雞腎、豬扒、牛仔骨、秋刀魚等等等不能盡錄！食太多肉怕膩？我哋直接開個火鍋，夾左好多蔬菜菇菌平衡下！飲品選擇係酒吧級：生啤任斟！仲有支裝啤酒、水果沙冰芝士奶蓋，試埋cocktail menu嘅蘋果酒草莓芒果沙冰，酸甜清爽夾燒肉一絕！隔離枱阿哥話齋：「出面酒吧飲兩杯都$200，呢度包埋任食刺身燒肉，仲有一盤靚肉送，抵到爛！」 甜品胃記得留位，爽食Mövenpick同Häagen-Dazs等多款，出面買都要幾十蚊一杯嘅雪糕甜品！ …Read More

今日朋友帶咗我去新蒲崗廣場嘅「好運泰國美食」食泰國菜，位置都幾唔起眼，真係地膽先會發掘到呢啲美食寶藏。餐廳雖然唔算好大，但食物質素同價錢都唔錯，啱曬街坊。馬拉盞椰菜苗鑊氣十足，馬拉盞嘅鹹香同椰菜苗嘅爽脆配合得剛剛好，好啱送飯！主菜方面，青咖哩豬頸肉個青咖哩味道不過不失，豬頸肉份量唔算少，我哋另外散加咗香酥薄餅蘸汁食！泰式乾炒河鑊氣超夠，河粉炒得乾身唔油膩，配料亦足，豬肉片嫩滑唔會韌，平凡唔需要整色整水，但已經超級好食。最後嘅芒果糯米飯為呢餐畫上完美句號，芒果香甜，糯米飯軟糯，有六粒細細粒可以幾個人分，椰汁另上，可以鍾意先點嚟食。總括而言，呢度性價比算高，味道唔錯，支持小店！…Read More

今日同朋友去旺角搵食，試咗呢間「棋子燒鵝」，貪佢有套餐夠抵食！一個例牌燒鵝＋燒味單拼＋郊外油菜＋主食＋飲品，散叫嘅話肯定貴一截，套餐慳唔少～ **🔥 棋子燒鵝（例牌）** 招牌必試！鵝皮燒得脆卜卜，肉質嫩滑唔乾身，仲有少少肉汁滲出嚟。醬汁鹹甜適中，但唔會蓋過鵝肉原味，送飯一流！ **🍖 單拼燒味｜肥叉燒** 揀咗肥叉，果然冇失望！半肥瘦比例完美，肥肉相間，邪惡但滿足～如果怕膩可以配啖瀨粉食啖白飯平衡下。 **🥬 郊外油菜｜白灼菜心** 菜心新鮮冇渣，淋咗少少豉油，再點少少燒鵝汁，簡單清爽，中和返燒味嘅油膩感。 **🍚 主食｜瀨粉 / 白飯** 瀨粉夠彈有口感，不過食燒味始終都係撈白飯最好味！ **💡 外賣優惠Tips** 見到門口貼住外賣限定：買半隻燒鵝可以用$10換購半隻切雞！岩哂屋企加餸抵食～ **總結** 性價比高嘅燒味店，尤其套餐真係平靚正。肥叉同燒鵝都出色，服務同環境就一般茶記格局，但為咗個味道會再encore！ …Read More