午餐時段叫咗兩個主食：
「馬來炒貴刁」鑊氣十足，芽菜、蝦仁、火腿、叉燒、洋蔥齊全，條條河粉都上色均勻，帶住微微辣味，食落亦唔會太油膩。
「金牌大雞髀雙蛋飯」更加係震撼視覺！真係唔講得笑，隻雞髀同我塊面差唔多大，炸得金黃香脆，咬落去皮脆肉嫩，仲有肉汁流出嚟，真心好好味，係好出色嘅炸雞髀。配埋兩隻太陽蛋同黑椒汁，撈飯食真係無得頂，夠晒邪惡！
加幾蚊配咗杯凍檸茶同西洋菜蜜，凍檸茶茶底夠濃，西洋菜蜜清甜潤喉，正好解解膩。
小食方面：
「瑞士汁雞翼」煮得入味，瑞士汁甜鹹度啱啱好，雞翼肉質嫩滑。
「法蘭西多士」係我嘅至愛！炸得外脆內軟，中間嘅花生醬份量恰到好處，淋上糖漿同牛油，邪惡到極點但又忍唔住食晒！
總括來講，保頓冰室唔單止賣懷舊，食物質素都真心唔錯，價錢合理，份量十足。如果想感受下舊式冰室風情，呢度絕對值得嚟試下，保證你食得滿足之餘，仲可以打個靚卡！
