晚市優惠試咗金銀蒜開邊蒸本灣龍蝦，$38半隻，性價比高。龍蝦蒸得剛剛好，蒜蓉嘅香味同龍蝦嘅鮮味完美結合，肉質爽彈又鮮甜，食落好滿足。
主菜叫咗個深海龍躉兩味組合（$468），一次過試到兩種煮法。兩款嘅龍躉肉都結實鮮嫩，食得出係新鮮貨。翡翠炒大龍躉球嘅龍躉球炒得啱啱好，魚肉又起哂骨啖啖肉，配埋蜜糖豆一齊炒，口感豐富；黃椒醬蒸龍躉頭腩就用咗黃椒醬蒸，頭腩部位肥美嫩滑，配埋木耳一齊蒸，簡單就是美味。龍躉兩味都做得唔錯，鍾意食魚嘅朋友可以一試。
另外叫左兩個小菜。咕嚕肉酸甜適中，外皮脆口，肉質軟嫩，菠蘿用左新鮮菠蘿所以好夠甜之餘甜度好自然，兩者夾住食，味道更加豐富。三蝦乾撈粉絲煲味道就不過不失。
宜家市道咁差，但酒樓當晚平日夜晚都全場爆滿，佢另外有做緊個$628/位，限時2小時嘅大閘蟹放題，眼見都唔小人食，都叫做可以有唔錯質素嘅食物配下美景，算係同朋友聚餐或者家庭聚會嘅好選擇！
