FiNg Jeh的个人专页

聽d朋友講吞pot幾好味，所以我地2個女仔就黎試下😍😍😍等候大堂幾寬闊，旁邊有toilet枱既size幾大，叫多d野食都有位放👍🏻Menu款式頗多，對於我地心思思三心二意既人就好興奮又好難揀其實佢有好多特飲，不過我始終覺得打邊爐配啤酒係絕配🥰 ($30大枝裝)登登登登！最期待既湯底黎喇！！由於女人唔補好易老，我地2個揀左滋補螺片花膠雞煲，個湯濃到呢.......半隻雞都好多，重點係螺片花膠都好多！我起碼飲左4碗湯先開始打邊爐，食到最後d雞都仲好好味❤️第二個重點就係我好期待既牛，我地揀左$300幾蚊既本地手切牛頸脊，因為我好鐘意食呢個部份，入湯，滾2-3秒，超滑超香唔會老，未食過牛頸脊既朋友要試下！蜂巢豆腐，索湯一流！大大舊花膠我至愛牛頸脊我地仲叫左十全大寶丸，好似呢個有海膽係入面，心思十足。我地仲叫左皇帝菜，好新鮮，食到飽到好似放題咁，每人$400，好滿足好高質，多d人黎應該食到多d同埋平d☺️☺️☺️…查看更多

其實唔少放題都有包括埋有限度嘅自助餐，可能係有飲品、甜品同小食，而殿大喜屋可謂係超越咗一般嘅放題，有full嘅日式放題加full嘅自助餐，有主食、蔬菜，仲有瀨尿蝦。飲品同甜品都好齊，酒類繁多，雪糕都係超班，有Haagen Daz, Mòvenpick, Milktop，少有齊章。刺身種類唔係特別突出，不過質素就好高，帆立貝刺身出色，而甜蝦都係重點，大大隻嘅甜蝦，好creamy 好黏口。壽司係放題嘅敵人，好怕俾啲飯喂飽，不過殿大喜屋嘅壽司款式好值得試，有左口魚群邊、劍魚都好正。重點嚟啦，就係標準大細嘅海膽手卷，雖然係要指定時段同要排隊，不過無限拎嘅次數，海膽份量奇多，新鮮又甜，係重中之重！熱食推介炸蠔同天婦羅，炸蠔真係可以點完再點。…查看更多

喺尖沙咀搵拉麵食有好多選擇，不過沾麵就唔係咁易搵到，元祖沾麵專門店唔止有得食，仲好豐富，不過沾麵的確好飽肚，要預多少少胃口去食。門口嘅menu 都包含曬沾麵嘅選擇，而座位唔多又成日坐滿，要預返半個鐘至四十五分鐘排隊。不過一開始拎籌就有埋menu，可以等位嘅時候就填好，一坐底就落單。極上芝士海膽沾麵（$168），真係一大板海膽，份量係多過配個沾麵，配麵食之餘仲可以當埋刺身食。個芝士湯底似芝士火鍋底，上枱嘅時候仲係滾，個人鍾意食熱啲嘅面，所以浸入個湯底長少少時間。極上Raclette芝士龍蝦沾麵（$178），有一隻完整嘅龍蝦，厚厚嘅芝士同龍蝦肉，而龍蝦湯底有好濃嘅龍蝦味，建議先用湯麵食沾麵之後先食芝士龍蝦，湯底會更突出！麵底加$15可以多100g，真係幾大份，quota夠嘅話可以加大，唔好浪費咗個湯底。…查看更多

一般打邊爐都好少飲埋個湯底，雖然叫湯底，不過都真係太多油，唔會亂咁俾啲quota個啲油。今次頭啖湯打破常規，因為根本就係用個湯打邊爐。點咗椰子雞煲（$128半隻），以一個特式又足料嘅火鍋湯底嚟講真係好抵，除咗眼見嘅料之外，仲有海底椰，一啲都無偷工減料！不過要等啲熟晒先可以開始食，都要等大概十分鐘，建議一滾就開始飲湯，未食其他嘢之前已經飲咗三四碗。雖然湯底本身都已經有竹笙（$38），不過濃湯配爽口易入味嘅竹笙，好夾！牛肩胛係另一個重點，同竹笙一樣係必點，$168一盤大嘅，好嫩口，唔駛全熟，濃湯都唔會蓋過牛肉味。要留意牆上嘅menu，手打丸都好重份量，墨魚丸係咬到墨魚肉，其實想試埋蝦丸，雙拼唔知可唔可以墨魚丸配蝦丸呢？…查看更多

魔膳廚房正正喺鱷魚恤大廈隔離，工業大廈堆裡面算係比較易搵到嘅，座位好寬敞，好啱一家大細一齊嚟食。佢提供嘅套餐款式唔少，扒餐、沙律餐、海鮮餐、兒童餐都有，都有跟餐包餐湯。沙律吧大概有十款揀，有菜有水果，有日式前菜，不妨一試。海膽汁海鮮意粉，足料海鮮，大蝦青口魷魚，份量幾大，初時怕海膽汁會腥，不過海膽汁嘅味控制得好好，濃汁得嚟唔會破壞個意粉。三文魚柳沙律嘅三文魚配水果醬，濃淡適中，魚柳亦唔會太老，藜麥沙律亦都好大份。…查看更多

616俾到我一個強烈「去完再去」嘅感覺，為免要排好耐，揀咗西環分店，其實都好方便，地鐵站行兩步就到。個餐牌唔算多款式，主要都係牛，好欣賞係電子落單。不過太多唔同部位嘅牛，真係唔識揀，而枱面有張圖簡單解釋大概位置，user friendly!鍋底嘅料唔算多，不過要留意，好濃好夠味。616吸引之處唔單止令自己彈指之間成為牛嘅專家，仲有超高性價比，大部分都係大概$48/$68一盤，人唔多都可以試多幾款。橫隔肌比較特別，口感十足，牛味都好重。而推介牛頸脊，嫩口又唔會太肥膩。另一推介，紙菜卷！同響鈴有啲似，不過紙菜易淋啲，建議淥1-2秒就夠。…查看更多

新麻蒲BBQ喺坑口開咗一段時間，同一田超市差唔多時間，嗰個corner每個週末都逼滿人，要試任何一間都要預早啲，而新麻蒲仲係坑口唯一一間韓燒。未點嘢之前已經上晒小食前菜（有7-8款㗎），二人枱根本放唔哂，同時倒埋蛋漿，新麻蒲嘅蛋漿可能含蛋量好高，如果太遲食會好易黏底。特別推介啲個Wasabi味嘅蘿蔔，好印象深刻，好特別又好味。新麻蒲嘅定價都係算高，每一款都係適中嘅份量，不過食落就知好值。今次都食得好啲，叫咗韓牛，唔係好大份，而都無切開一件件，剪開燒會易handle啲，因為韓牛都幾多脂肪，如果放喺個爐中間燒會喺咁滴油，件牛好快overcook，建議放喺爐邊燒。另一款叫咗辣味新麻蒲護心肉，一盤有八至十件，$148，辣味唔突出，反而燒耐少少都唔怕，好香好嫩口。Cocktail Rita，有酒精，椰子菠蘿，$98，唔好放太近個爐，啲冰沙會溶得好快。…查看更多

終於試到木船啦，由太和地鐵站行過去大概5到7分鐘，又因為早咗啲到，一去到就有位啦。但係，無論你幾早到，都有其他人更早到，仲要已經叫到成枱餸。雖然店內唔算大，洗手間都要到店外，不過位置唔會太逼，張枱叫多幾味餸都夠位。侍應都好好服務，會好主動斟水，又會上下一道菜之前問清楚上得未，而木船泰菜嘅外表有別於一般嘅菜式，上菜前都會講返聲菜式嘅名，menu內含有泰文同中文翻譯，幾有趣，同時加長咗我揀菜嘅時間😛。前菜有生菜包同木瓜沙律，個生菜包係必點之選，啲肉一啲都唔乾，唯一要注意係個份量好大。主菜有金邊粉同軟殻蟹墨汁意粉，自己唔識分係咪算fusion 菜，不過兩道菜嘅外貌都有驚喜，唔係好傳統嘅泰菜look，但係食落去好有泰菜風味。而飲品要讚，特飲性價比唔係最高，泰菜一般都會咸少少，特飲唔太甜真係好適中。…查看更多

父親節就嚟 為咗答謝老豆咁多年嘅照顧點都要請佢食餐飯咁啱老豆又鍾意食日本嘢於是就上網搵下睇下有邊啲日式放題咁啱見到呢間係喺尖沙咀 好方便 而且評價都唔錯於是就決定食呢間一入到去 環境就唔算太嘈吵 可能因為book咗枱嘅原因 佢畀咗卡位我哋啲梳化櫈都幾舒服嘅 主要食物 特別嘅係 餐廳有唔少創作嘅卷物 同埋特別嘅壽司 餐廳特有嘅海鮮 即叫即做 北海道燒帆立貝有啲油膩不過濃味 始終都係正啲尚壽司拼盤初初唔知係啲咩 原來係壽司拼盤覺得幾特別 除咗擺盤精美之外好少有日式放題會有壽司拼盤 而且啲壽司全部都係原創 特別推薦 岩鹽鵝肝牛肉同埋松葉蟹膏燒赤蝦刺身選擇非常之多 有時令嘅松葉蟹棒 啖啖肉 非常滋味而且大部分刺身都非常厚切 好大嚿 油甘魚有咬口得嚟又唔滯上菜速度非常之快 而且好少漏單見到老豆都食到冇停手食物選擇豐富 雖然比起其他日式放題貴但一分錢一分貨 嘢食質素的確係比較好呢間一定會有下次👍👍…查看更多

NeNe Chicken 同一般韓食店一樣都會提供炸雞，但係佢同時都有pizza 、芝士火鍋，而今次係揀咗homeset嘅芝士鐵板雞。一個M size 嘅homeset 有一個雞湯，四件炸雞，一個主食，兩碗白飯同一碟泡菜。炸雞嘅味可以選menu大部分嘅味道。先上嘅係雞湯，個湯有一整隻雞，湯唔會太咸，而非常之足料，雞入面塞滿米飯，但係留意如果兩個人食一個餐就要留返啲空間俾後面嘅菜式。橘子炸雞酸酸甜甜，好開胃㗎，一心係嚟食炸雞嘅朋友，要諗清楚係咪會叫homeset，因為炸雞只得四小件。芝士鐵板雞好出色，一盤有九至十件雞，芝士味濃，唔好以個盤好淺，雞之外仲有年糕、菇同菜。芝士嘅份量仲唔駛就著食，每一件嘢食塗滿芝士都有剩。…查看更多

食開區外雞煲嘅都應該有一定嘅認知，先食雞（可選擇唔同程度嘅辣、唔同雞嘅份量），漁民雞煲特別之處就係有好多唔同嘅配搭，蝦配雞煲、鮑魚雞煲、蟹配雞煲、豬肚雞煲，雞煲之餘仲有海鮮粥底火鍋。坐底就有得自己混醬，仲記得要快啲叫咗煲先，其他配料先慢慢叫，另外介紹沙冰梳打，$45一杯，好大杯仲要唔太甜，由頭飲到落尾。叫咗鮑魚雞煲，鮑魚會連殻上，足四隻，而辣可以盡情叫辣啲，因為佢哋嘅辣比一般辣雞煲易接受。推介黑豚腩片，烚多陣都唔怕太老，肥得好啱比例，亦都唔係薄切，唔會感覺得陣風。牛頸脊性價比都好高，哩份係細份，密佈平面🤤，叫一盤都已經好滿足，不過牛肉記得唔好烚得太熟。試咗幾款肉丸，鵝肝手打墨魚丸同流心咸蛋豬肉丸，都係試試，都係少有嘅火鍋料。…查看更多

北角仍然係好多小店食肆嘅地方，今次揀咗服務一流嘅金樂軒。同一般雞煲一樣，先雞後烚，小辣嘅雞煲啱啱好，仲要好足料！落咗湯後，味道唔會太濃太咸，會叫炸魚皮嘅朋友，記著等埋個湯先食，好味程度倍增！牛肉同一般邊爐一樣相對貴少少，不過其他都好合理，都要再一次強調，炸魚皮好抵食。牛控當然要試特級安格斯肥牛，建議淥其他嘢食之前就食，因為唔單止食嫩牛嘅口感，仲有肉香味，唔好俾其他味蓋過。另一要讚一下服務，邊爐一般要係各自各打，不過店員都好主動問食物如何，坐得舒唔舒服，感覺非常好！…查看更多

午餐晚餐喺銅鑼灣食襯嘢都會覺得好焗束，樓上舖都唔例外，排隊上樓都要花一段時間，不過今次去銅鑼灣極尚大瀛喜感覺好好，枱都係坐滿人，但空間感十足！另一驚喜係，電子落單！一齊都覺得食放題落單嗰下好浪費，同一類就算只叫一件都要用一張紙，叫太多食唔曬又浪費。電子落單又快又有紀錄，唔怕落咗唔記得。放題嘅刺身當然係主角，上得快又足數，特別推介係劍魚腩同帆立貝刺身。燒鰻魚都係亮點，點完再點。食壽司當然係一個挑戰，好在飯唔會太大舊，而左口魚群邊係必試必試！…查看更多

觀塘工業區經常都俾到驚喜，掌壽司可算係近期最正嘅一餐，今次用OpenRice 訂位仲有9折。係大廈等𨋢比較耐，上到去坐感覺好舒適，氣氛好warm好cozy。一坐低就有個前菜，酸酸地好開胃。叫咗時令刺身盛，另外送吉列蠔同燒龍蝦半份，$598。哩個刺身盛好抵食，海膽、厚拖羅、赤貝同牡丹蝦都係高水準，另外有十幾片左口魚嘅薄刺身，係一道食得飽嘅刺身盛。吉列蠔都係有意料之外嘅好味，炸得好香口，配上千島醬好襯！份龍蝦就一般，太乾身而肉就太少。另外加咗鰻魚手卷、火炙左口魚壽司同野菜天婦羅。食材都好新鮮，天婦羅性價仲要極高，份量好大，蕃薯係好甜好爽口。…查看更多

週末午餐唔駛排隊，而點餐係用tablet，清晰方便，而坐位都好鬆動，落單之後大約十分鐘嘢食就到。最先係蒸蛋，好滑好熱，唔會太稀太淋，係足料嘅蒸蛋。叫咗個中等級數嘅壽司併盤，每一款都好味，唔係一啲得幾款貴食材混合咗一啲普通嘅併盤，同朋友分享一啲都唔怕，款款都貴同靚嘢。鰻魚丼都好正，十和每一道菜都比一般日本料理大份，哩個丼鰻魚有成五大塊，非一般嘅份量。推介之選就係哩道三色丼，有呑拿魚、海膽同蟹肉，刺身同飯嘅比例差不多一比一，係難得嘅分量。蟹肉係一個驚喜，初時以為只係陪襯，不過同其餘兩款係有得比，難忘日式午餐。…查看更多