zachs11's Profile

人多食中餐，人少食西餐。今次就去試下中環法式小餐館，位置唔算起眼，但係都算方便。座位唔多，裝修幾別緻，不過用餐區域講野幾應聲，人多就有少少嘈。 Tartare de Trulte (Smoked Salmon Trout Tartare) 煙三文魚他他幾好味，少少咸香加埋牛油果 Palourdes (Local Short Necked Clams) 呢個蜆落左好多唔知咩herbs，落牛油就無咩好講，加埋紫菜又幾好味 Salade De Tomatoes Fraiches (Cherry Tomatoes) 簡單一個車厘茄沙律，加左西瓜，兩紅相遇，仲有少少薄荷葉 Polsson Grille (Grilled Fish) 一直以黎都覺得西餐嘅魚係麻麻地，呢個佢話係燒嘅，但係就似蒸完用火槍燒下塊皮咁，味道都唔差嘅，用左大量herbs同薯仔黎襯托出魚嘅鮮味。 Cote De Boeuf (Deboned Grilled Ribeye) 就係好純粹嘅燒牛扒，唔係超級脆面嗰隻，有佢應有嘅味道 Pomme Puree (Homemade Mashed Potatoes) 呢個薯蓉不得不提，十分綿滑 餐牌上面嘅食物款式唔太多，但係海陸空都有齊，唔算得上十分推介，但係一試無妨。…Read More

Weekend lunch menu呢個lunch menu樣樣都有啲，唔使諗，按人數份量出餐 To start: Seafood platter on ice: Boston lobster, oyster, tiger prawn頭盤係海鮮拼盤，生蠔同虎蝦都係每人兩隻，龍蝦份量就唔知點分配喇。全部都新鮮好味。特別想highlight虎蝦好爽甜同肉質實淨。 Tapas: Croquetas de pollo: Chicken croquette, bechamel, romesco sauce其實就係一粒可樂餅，雞肉打碎左，外脆內creamy Tapas: Padron Peppers: Sea salt一款辣椒，簡單焗一焗之後灑上海鹽 Tapas: Gambas al ajillo: Sustainable tiger prawns, garlic, chili oil蒜片蝦係我眼中一款好typical嘅tapas，呢個做法比較濕，我鍾意乾身少少 Mains: Seafood paella: Clums, tiger prawn, baby squid, alioli海鮮飯個飯就有好濃郁嘅湯味，不過海鮮偏細粒同埋款式上無咩記憶點。可能頭盤個海鮮拼盤已經食左新鮮厚肉嘅海鮮，呢個paella就將個重點放返喺個飯。 Mains: Cochinillo asado: Roasted suckling pig, fried potato, signature pork sauce平時喺其他地方食西班牙乳豬通常都無乜肉食，今次呢個就幾厚肉。 Mains: Txuleton: 350g ribeye steak, confit piquilo, garlic, beef jus乳豬同ribeye係二揀一的，我地有5個人，所以加錢轉左少少做ribeye。內質都幾細嫰，但係外層上色好似有少少不足 Dessert: Churros: Chocolate dip平時對甜品無乜興趣，但係呢個churros真係三個字「好好食」。無咩好解釋，留返大家自己去試。 整體黎講都唔錯，食食下先發現呢個lunch set係會食左好多蝦，希望餐廳之後可以調整下。…Read More

大埔一直都不乏食小炒嘅地方，喺openrice 見到囍囍小廚好似幾有趣就即刻打電話約幾個朋友出黎食。裝修方面想行懷舊路線，但係整體感覺略嫌光鮮左少少，唔湯唔水。 咕嚕雞球：本來想試菠蘿咕嚕肉，但係朋友話想試雞球。都幾香脆嘅，不過就切得大件左少少，咀細嘅朋友要一下啪入口就可能有少少勉強。 白灼鵝腸肥牛：一個可以送酒又唔太熱氣嘅菜式，除左鵝腸同肥牛之後仲有大量金菇墊底，配辣椒豉油幾惹味。如果肥牛換成鮮牛就更佳，純粹個人口味同意見。 潮式炸蠔餅：都炸得乾身同香脆，但係略嫌唔夠蠔。 味道方面就ok嘅，鑊氣黎講就好似無乜。唔會特登再黎食，但係如果喺附近都可以去食下。…Read More

大圍都算係一個多野食嘅地方，間中都唔難發現一啲比特別嘅小店。今次去Curry Boy試下熟成咖哩。有少少日式嘅感覺，開放式廚房，一眼睇曬出餐過程。內部空間唔算大，座位唔太多，另外有半戶外空間嘅吧枱。 主打兩款熟成咖哩，牛油咖哩同麻辣鬼咖椒咖哩。今次叫左牛油咖哩黑毛豬肉餅配薄餅同埋麻辣鬼椒咖哩黑啤牛肋肉配飯。 🍛牛油咖哩黑毛豬肉餅配薄餅：牛油咖哩係接近一般日式咖哩甜甜地嘅感覺，濃香細滑。肉餅都煎得香口又有適量咀嚼感。薄餅有三塊，不過不失。 🌶️麻辣鬼椒咖哩黑啤牛肋肉配飯：用香港人比較熟悉嘅表達，麻辣鬼椒咖哩個預設辣度係大概譚仔中辣，而且後勁比較強，會有越食越辣嘅感覺。咖哩味道方面有少少偏酸，可能係鬼椒嘅味道，但係我就食唔出有「麻」嘅感覺。我幾鍾意配菜嘅炸蓮藕片。可惜牛肋肉比較乾身，亦食唔出有黑啤嘅感覺。 順帶一提，如果想牛油咖哩加辣或者麻辣鬼椒咖哩減辣係可以嘅，會按比例將兩款咖哩適量混合。不過我覺得如果大家想試嘅話應該忠於原味道，怕辣就食唔辣。…Read More

最近食左兩次昌運苑記覺得水準唔太穩定，於是去返大埔墟苑記試下。果然，一坐低就feel到個分別。 白灼黑柏葉：熟悉嘅擺盤同味道終於返返黎，豉油調味嘅比例，薑蔥嘅比例，係最近昌運分店帶唔到畀我嘅感覺，喺大埔墟分店搵返。加埋支啤酒就perfect 及等粥：好耐無食，自從搬左去粉嶺之後都仲未搵到替代品，所以都係返黎大埔食，豬雜新鮮洗得乾淨，唔會有太混濁嘅味道。不過唔知點解今次好多蔥，真係好多。 總結：我暫時應該轉會去大埔墟分店，隔一排先再畀機會昌運分店。…Read More

大圍附近食肆林立，有新有舊。好湯好麵主打足料靚湯優質食材，甚至乎湯比麵好（？）有一日夜晚黎到唔使等位，不過入座之後好快就滿了。 迷你佛跳牆：鮑魚、海參、素翅、魚肚、日本地雞肉、北海道刺身帶子、花菇雲腿絲、高湯、扁陽春麵。中式高湯味咸香濃厚，就係有一種食翅嘅感覺。 海龍皇湯：藍蟹肉、海蝦尾、北海道魷魚、北海道刺身帶子、廣島蠔肉、蝦頭油、皇湯、陽春麵。皇湯係用蝦頭煲嘅海鮮湯（？）有少少似西式嘅龍蝦湯，蝦肉爽脆彈牙。仲有濕紙巾畀你抹手摵蝦tim 玫瑰豉油雞中翼：就係好香豉油味嘅雞中翼 相比之下我比較喜歡高湯，因為飲多幾啖都無咁膩，咁當然呢個可能係個人口味問題。整體黎講都真係幾足料同湯頭唔錯，抵食就唔算架喇，不過我覺得都算對得住價錢。環境方面就坐得比較逼少少。…Read More

好多年前已經有留意一鳴，當時只係有拉麵同埋少量串燒/炸物。最記得係炸粟米球（實際個名唔記）、燒茄子同埋豚平燒。好似全部都消失曬。 生啤買一送一，抵飲嘅。 燒河豚乾：佐酒小吃 土佐豆腐：皮脆內軟 芝士粟米玉子燒：感覺都係無以前咁多粟米，但係同上水分店一致嘅 明太子海鮮什錦御好燒：第一次喺一鳴食呢款野，都ok嘅 當初去一鳴係因為想食拉麵，食過覺得ok又近近地，不過已經好耐無喺一鳴食拉麵。做做下變左屋台走向，都ok嘅，但係就無左以前嗰種感覺。…Read More

我以為私房菜一定係樓上舖，仲要係有少少隱蔽嗰隻，原來地舖都可以。朋友介紹大角咀禤師傅，試下囉有咩唔好啫。 冰鎮鮑魚：都大隻嘅，唔知點解伴青瓜 椒鹽瀨尿蝦：呢個真係好大隻，足足有一隻前臂咁長，但係除左大隻，肉質方面我唔識品評，本身唔特別鍾意食瀨尿蝦 辣酒煮花螺：普遍香港食辣野嘅通病，唔夠辣 黃金魚魷：一開頭以為係椒鹽鮮魷，走去問人拎汁。幾香口但係無乜咸蛋香 椒鹽九肚魚：偏硬，不是外脆內軟 避風塘炒蟹：大隻嘅，都厚肉 魚唇扒豆苗：魚唇幾入味嘅，豆苗方面不過不失 薑蔥魚腩煲：同行嘅朋友無乜人識欣賞，可能怕多骨 豉椒炒花甲：大隻嘅，但係多沙 整體黎講份量都唔細，特色海鮮類好似都係用銀色兜。質素幾平較，但係食物方面除左瀨尿蝦大大隻，好似無乜記憶點。 同枱唔逼，但係同其他枱好近，兩枱之間背對背唔需要伸手就可以觸碰嘅距離。當晚後面有一枱好嘈，成餐飯全場人4-5枱客就邊聽佢地講野邊食飯。…Read More

位於大埔藝術中心嘅手工意粉餐廳。環境舒適，空間感充足。 🍲 是日餐湯（蕃茄雜菜湯？不過唔係羅宋湯）：蕃茄味濃郁，雜菜都好豐富。 🍏 青蘋果水耕菜沙律：青蘋果、水耕菜、堅果、提子、蜂蜜油醋醬。一個幾清新嘅沙律 🍄‍🟫 大啡菇溫泉蛋炒手工意粉：大啡菇、溫泉蛋、雜菜、醬油、手工意粉。有少少日式炒拉麵嘅感覺。 🦐 焗蒜蓉牛油大海蝦意粉：大海蝦、車厘茄、海鮮濃汁、海鮮牛油、手工意粉。大細係相對嘅，隻海蝦只可以話大過細嗰啲，唔要個「大」字可能無比較無傷害。整體味道唔錯，不過蝦同意粉就各自各精彩，好似構成唔到一個dish咁。個phrasing係「焗蒜蓉牛油大海蝦｜（茄汁）意粉」instead of「焗｜蒜蓉牛油大海蝦意粉」，無貶意，純粹係一個美麗嘅誤會。 🍝 手工意粉偏向有「咬口」，一般香港人未必食得慣或者接受到，不過我覺得OK嘅，食落似粗少少同硬身少少嘅油麵。 公道啲講，整體用餐體驗係OK的，沙律、湯、餐包都幾好味，只不過手工意粉沒有很驚艷的味道或者感覺，想坐得舒服食餐飯係唔錯嘅選擇。…Read More

佳寧娜係一間以潮州菜為主打嘅餐廳，提供各式潮州美食。餐廳有數十年歷史，傳統中式佈局，座位舒適，不會太逼。 1. 滷水拼盤：掌翼比較重滷水味，腩肉唔會太肥。魚片同豆腐就清淡少少，中和一下濃味掌翼同腩肉。 2. 黃金蟹棗：蟹棗係潮州菜嘅特色菜式，通常係將蟹肉同其他配料混合製成嘅球狀小食，然後炸到香脆。 3. 潮州蠔烙：即係蠔餅，幾乎係食潮州菜必點嘅菜式。唔係一味多蠔就好食嘅，整到好似薄罉咁，外脆內嫩。 4. 川椒雞：呢道菜係潮州菜嘅一款辣味菜式，將雞肉裹上川椒同香料烹煮而成，味道濃厚。 5. 蘿蔔排骨春菜煲：呢款菜式係一道滋補養顏嘅菜式，將蘿蔔、排骨同春菜等材料燉煮喺一齊，湯汁鮮甜可口。我認為重點係蘿蔔。 6. 冬菜蒸原條馬友：冬菜嘅香味同馬友嘅肉質配合得好好，魚肉細嫩。 7. 雙面黃：美中不足嘅係只有一面黃 整體感覺唔錯，朋友聚腳好地方。用餐前後都有功夫茶唔記得影相。…Read More

暗調復古英倫風裝修，有少少哈利波特feel（？）牆上面仲有一個鐘嘅數字同轉向都係逆時針，睇嘅時候要動動腦筋。 1. 🥚香茅雞翼（鹹蛋黄）：香茅味唔太明顯，濕濕地嘅流沙鹹蛋黃醬，我鍾意乾身嗰種「黄金」鹹蛋黃多啲，感覺香口啲 2. 🦀黃咖喱軟殼蟹比薩：平時食咖喱軟殼蟹都會叫薄餅蘸啲咖喱汁食，呢個pizza就將成件事一體化呈現。批底略嫌太脆，軟殼蟹本身已經炸得香脆，薄脆嘅批底令到pizza口感比較單一。個人認為用薄底可以，但不用太脆，增加返另一種口感。 3. 🍝明太子蟹肉野菌意大利麵：成碟意粉混合得好好，分唔到主角係明太子？蟹肉定係野菌？其實可能意粉先係主角。 4. 🍖蜜味酸辣豬肋骨：甜甜地嘅蜜味係有嘅，酸同辣嘅感覺欠奉。我都明喺香港嘅辣即係唔辣，不過好彩佢唔酸，太酸我都食唔到。都幾厚肉，唔會得棚骨 5. 🍺Yebisu Beer：Menu寫獅子山啤，但係原來係得惠比壽。 6. 🍸Cocktail / Walk Into A Bookstore /：酒底有自家玄米茶酒（應該係infuse出黎）加白酒，仲有檸檬汁同果皮糖漿。整體偏甜，有少少似飲清酒嘅感覺，唔睇唔知有玄米茶。 7. 🍰巴斯克芝士蛋糕（提拉米蘇奶蓋）：個燶面唔夠燶（可能只係個人喜好，不過有cream遮住其實又唔係好覺）上面篤cream同塊餅都唔錯嘅 整體黎講擺盤幾靚，味道方面不及擺盤出色。我又唔想話佢係打卡類型嘅餐廳，但係味道方面真係要加把勁。…Read More

畢打奧係一間以英式酒吧風格經營嘅餐廳，為顧客提供一個懷舊氛圍嘅用餐體驗。 畢打奧嘅歷史可以追溯到數十年前，詳情就唔講太多，總之就係老字號，搬過舖又開過分店。 今次無食牛，叫左法式焗田螺、農場豬扒配薯菜同埋焗白汁海鮮飯。 法式焗田螺：蒜蓉牛油再加埋薯蓉，都無得點輸 農場豬扒配薯菜：經典配搭之一，豬扒肉質鮮嫩juicy 焗白汁海鮮飯：不過不失，唔會太膩又唔會太淡 除左扒之外，焗飯都唔錯。另外仲會定期更換廚師推介，保持新鮮感，今次食完唔知下次幾時再有。…Read More

聯和墟瓏門小廚係一間家庭式嘅小店，食物配搭方面包羅萬有。手撕雞係賣飛佛，夜少少去都賣曬，今次終於食到，特別係個大大隻雞髀同埋青瓜墊底嘅組合，真係幾抵食。 手撕雞酸辣粗麵用左大大隻雞髀加上酸辣湯同粗麵，畫面上真係好豐富。雞髀起肉之餘仲起埋皮，但係識食梗係食埋皮。再加上清脆嘅青瓜，帶出唔同嘅層次同風味，令成個組合有更多層次。總括嚟講，喺瓏門食手撕雞真係抵食，絕對值得一試。晏書黎就通常都有嘅，夜晚想食的話記得要早少少黎。…Read More

瓏門小廚位於粉嶺聯和墟，係一間算得上大件夾抵食嘅上海餐廳。佢主打酸辣湯麵同各式菜飯，你諗到同諗唔到嘅組合都有，價錢都算經濟實惠，夜晚有好多人收工過黎買外賣。無辦法啦，今時今日聯和墟夜少少真係會無啖好食，應該話選擇太少。 今次我叫咗炸排骨酸辣粗麵。本身想食手撕雞，可惜賣曬，下次想食要早啲黎。碗酸辣粗麵都幾大碗，其實我成日都覺得呢啲酸辣湯唔酸又唔辣。好彩唔係好酸，太酸我都食唔到。炸排骨幾香脆，比較乾身。 總括黎講，瓏門小廚款式多份量夠，性價比唔錯。…Read More

金華牛雜粉麵位於粉嶺，係一間小型粉麵店，傳聞係家庭式經營，內部簡樸，僅有十餘個座位，營造出親切溫馨的用餐氛圍。 招牌菜好似係崩沙腩，但係我今次想食牛雜，於是就叫左碗牛雜麵。湯底香濃偏咸，適合喜歡重口味嘅朋友。牛雜份量OK啦，牛腸細舊左少少，其他野都不過不失。雖然店鋪位置較為偏遠，但係金華牛雜粉麵算係附近比較唔錯嘅粉麵舖頭。特別係如果你喜歡重口味湯底。堂食黎講座位真係有啲窄，基本上就九成九要搭枱，好似同陌生人太親密，啲湯彈黎彈去。…Read More