AlcoholicFoodie_HK's Profile

喺西環搵到呢間小店真係有 d 驚喜，地方唔算大，但裝修簡約溫馨，坐低就有種返屋企食飯嘅感覺。佢哋主打西式 fusion 菜，仲可以加錢轉 set，今日揀咗濃湯同有機三色藜麥雜菜沙律，夠晒清新開胃。😋 鮑魚鴨腿絲燴飯 ~ 呢個燴飯幾有心思，上面有一隻完整鮑魚，煮得啱啱好，唔會太韌，鮮味十足。另外鴨腿絲煙韌唔柴，仲帶少少甘香，令成個飯更加惹味。飯底吸晒湯汁精華，又唔會太濃，食落好有層次，啱晒鍾意中西合璧嘅朋友。😋 白酒忌廉蜆肉手工意粉 ~ 手工意粉粗身少少，口感非常煙韌！蜆肉份量唔少，白酒忌廉汁 creamy 得嚟唔會太膩，反而有種淡淡酒香，配埋蜆肉就啱晒。🍮 黑芝麻意大利奶凍 ~ 呢個奶凍真係幾特別，質地滑溜，黑芝麻味好濃郁，唔算太甜，好有驚喜！🍵 銀花甘草茶 ~ 入口微甜，甘草味唔會太搶，銀花有少少花香，飲完有種潤喉解膩嘅感覺，飲完成個人舒服晒。「張三」係一間有心做菜嘅小店，每道菜都盡見心思，味道平衡，價錢合理，啱晒鍾意呢種溫馨又有質素嘅朋友。下次想試埋佢哋其他手工菜式，睇吓仲有咩新驚喜！…Read More

最近喺沙田搵到間好 chill 嘅日式 cafe，裝修走木系和風路線，採用柔和嘅燈光，坐低已經覺得心情平靜咗好多。晚市有一人套餐，啱晒想靜靜地嘆個人晚餐嘅朋友。😋 吉列豬鞍白咖喱烏冬 ~ 一上枱已經俾大大塊嘅吉列豬鞍吸引咗，炸得金黃酥脆，厚切但唔鞋口唔會太乾，咬落仲有肉汁滲出嚟，啖啖都係滿足感。白咖喱加咗忌廉，令成個醬汁更加滑溜，味道唔會太濃，反而多咗層奶香同甜味。烏冬煙韌得嚟又吸晒咖喱汁，食落好有口感！😋 安格斯牛肉月見蛋丼 ~ 薄切安格斯牛肉，中間放咗隻日本「曉」生蛋黃，一撈開即刻變身滑蛋牛肉丼，個飯吸晒牛肉汁同蛋香，真係一啖接一啖！😋 紫薯芋泥麻糬梳乎厘 ~ 呢個甜品真係打卡一流，厚厚嘅 pancake 上面鋪咗煙韌嘅麻糬皮同紫薯粉，顏色好夢幻。Pancake 口感綿密，味道香甜但唔膩，仲有少少天然芋頭香。😋 開心果慕絲撻 ~ 呢個撻就比較精緻，底層係牛油撻皮，上面係濃濃嘅開心果慕絲，入口即溶，堅果香味好突出，上面仲有碎果仁做點綴，口感豐富。呢度真係一個好適合放鬆心情嘅餐廳，無論係想一個人靜靜地食餐飯，定係同朋友傾下計都好適合。食物有心思，擺盤靚，味道又唔馬虎。下次經過沙田，不妨入去坐低慢慢嘆返餐。…Read More

最近同閨蜜去咗銅鑼灣嘅 Arcadia，一入門口已經感受到 Halloween 嘅節日氣氛，成間餐廳佈置得好有心思，有種型格嘅神秘感，好多位置都啱晒打卡！星期三至六 9-11pm 仲有 live music，氣氛一流！最近新出嘅魔法系列 Cocktail，夢幻得嚟又有儀式感，真係好有創意！🍸 一千零一夜 ~ 用 sake 做 base，帶有熱情果同伯爵茶香，重點係上枱前會用火燒一燒個盤，有種阿拉丁神燈嘅魔幻感，打卡一流！🍸 世外桃園 ~ 用 vanilla naked malt whisky 配 cold brew 蜜桃茶，入口有淡淡果香同茶味，尾段帶少少麥芽香，味道香甜。其他 classic cocktail 都沖得好好飲，感覺 bartender 好專業！！見到有新出嘅二人 Festival Dinner Set 好抵食，不過我地兩個女仔未必食得晒兩個主菜，所以叫 a la carte 都好開心~~😋 香煎日本刺身帶子伴三文魚籽 ~ 帶子煎到外脆內嫩，唔會過熟，配埋三文魚籽一齊食，口感好豐富。😋 薄切生和牛片 ~ 牛肉入口即溶，配埋少少醋汁，清新解膩。😋 火燒牛骨髓和牛生牛肉他他 ~ 牛骨髓燒到微焦，味道香濃，加埋生牛肉一齊食，夠晒層次感。😋 豬肋骨配莎莎醬 ~ 豬肋骨燒得好入味，肉質鬆化，莎莎醬酸酸辣辣咁幾開胃，半份啱啱好。😋 火焰雪山 ~ 又一個有儀式感嘅甜品！外層係蛋白霜，燒完後有少少焦香，入面係士多啤梨雪糕同蛋糕，夠晒甜甜蜜蜜 ❤️食飽之後上天台參觀下，真係超大，望出去成個銅鑼灣夜景盡收眼底，閃爍燈光加埋微風，簡直 chill 爆！…Read More

呢間係名古屋老字號嘅鰻魚專門店，主打名物「一本鰻」近年登陸銅鑼灣利園，再度掀起鰻魚熱潮！餐廳裝修走高級和風路線，木系設計，座位舒適，透過玻璃仲可以見到入面嘅師傅即場運用備長炭同竹炭原條碳燒鰻魚，充滿視覺享受！員工好有禮貌，介紹 menu 時唔單止講食材，仲會分享食法同配搭，感覺專業。😋 名物一本白燒定食 ~ 白燒鰻魚完全無落蒲燒醬汁，直接以炭火燒烤，燒到皮脆肉嫩，食落去有淡淡炭香，鰻魚本身油脂豐富但唔膩。白燒食法真係好考功夫，呢度做得好乾淨俐落，食到鰻魚本身最原始嘅鮮甜風味，值得一讚！😋 鰻燒和牛三吃丼 ~ 薄切日本A5宮崎和牛，油花靚，入口即溶。蒲燒鰻魚醬汁香甜但唔搶味，鰻魚燒得啱啱好，魚肉鬆軟肥厚，皮脆肉香，鰻魚三吃更加各有風味：1. 直嚐蒲燒原味2. 加入三吃配料3. 加入特製高湯製成茶泡飯🍵 鰻肝湯 ~ 呢個養生湯確實不容忽視，鰻肝處理得好乾淨，無腥味，湯底清澈但有深度，飲落去有少少甘香，感覺解膩，係一個好好嘅收尾 ❤️香港分店保留咗本店嘅精神，環境高雅，服務親切，鰻魚質素亦有水準。價錢唔算平，但以質素嚟講絕對值回票價。無論係想試下正宗名古屋蒲燒，定係想感受職人手藝，呢間過江龍都值得一試！…Read More

最近去到筲箕灣搵食，被呢間餐廳嘅環境吸引咗，中間有個旋轉木馬，好有童話 feel，環境寬敞，座位舒適，啱晒同朋友慢慢傾計食野。今次叫咗 set dinner 二人餐，份量啱啱好，菜式都幾有心思。😋 俄羅斯鮮蝦薯仔沙律 ~ 薯蓉夠晒綿滑，蛋沙律又好足料，上面鋪咗好多隻大大嘅鮮蝦，非常新鮮彈牙，口感好豐富！😋 炸手打墨魚條 ~ 係我嘅心水之一，墨魚漿手打得好實，炸完外皮金黃酥脆，咬落去仲有少少煙韌感。😋 秘製 Dirty 屠夫牛扒 ~ 厚切但煎得啱啱好，外層有少少焦香，食落有 d 煙燻味，肉質鮮嫩，有好濃郁嘅肉味，呢塊扒絕對係重頭戲！🍹 Pineapple Hat ~ 呢杯飲品真係幾搶眼，一大片焦香過嘅大菠蘿，隔離仲有個大菠蘿裝飾好搞笑 🤣🤣 入面係菠蘿梳打，酸酸甜甜，飲落清爽又有熱帶風情。🍹 Fresh Grape & Apple Yogurt Soda ~ 呢杯乳酪梳打幾特別，上面鋪滿一粒粒嘅青提子，打卡一流。…Read More

喺尖沙咀食串燒真係唔可以錯過呢一間！裝潢型格，主要係 bar 枱位，睇住師傅即場炭燒好有 feel，仲有戶外位啱晒一班朋友包場開 party 或者慶祝活動。主打由日本農場直送嘅香草雞肉，唔止新鮮，仲有好多稀有部位可以揀，師傅炭燒功力一流，每串都燒得啱啱好，外香內嫩，啖啖肉汁，真係好食到停唔到口！首先每枱都會有一碟五味調味盤：生椒粉、七味粉、一味粉、柚子鹽、咖喱鹽。個人最鍾意柚子鹽，口感清新，配雞肉一流，食完唔會膩。必食推介 🍢🍢😋 提燈 ~ 雞卵燒完之後色澤金黃微焦，賣相已經夠吸引，咬落去果下，外層薄脆，入面嘅雞卵一爆開係超級 juicy，成個口腔都係濃郁嘅蛋香，係我心目中 No.1 ❤️😋 糯米雞肉棒 ~ 外層糯米經炭火燒到微焦，帶住陣陣米香同焦香味，煙韌有口感。入面包住嘅雞軟骨肉，肉質嫩滑又有脆口，好豐富嘅層次感！ 😋 雞白子 ~ 燒白子真係好少見，而且呢度做得好出色！外層微微焦脆，入面仲保持到白子嘅軟綿綿口感，帶少少甘香，完全無腥味。連平時唔食白子嘅朋友都話有驚喜，值得一試！😋 新潟白舞茸 ~ 喺日本被譽為僅次於松茸嘅極品菇類，香氣十足，燒完仲保留到菇菌嘅鮮味，而且味道特別濃郁！仲有雞上髀肉、雞頸肉、雞心、雞肝等等都滋味十足！ 而家逢星期一至三同星期六都有酒水 promotion，同朋友一齊飲酒嘆串燒，爽 🍻🍻最後要讚下師傅同職員，好有禮貌又親切，令整個用餐體驗加分 ❤️…Read More

呢間型格樓上 café 環境唔算好大，裝修走水泥風，灰灰地幾有格調。座位唔多但坐得舒適，啱晒同朋友慢慢傾計或者自己一個人放空。😋 蒜香辣椒蜆肉意粉配軟殼蟹 ~ 呢個意粉一上枱已經聞到陣陣蒜香，辣椒唔算太辣，反而帶出蜆肉鮮味。最開心係呢隻炸到又香又脆嘅軟殼蟹，外皮酥脆但唔油膩，夠晒滋味！😋 招牌名古屋鰻魚大阪燒意大利飯 ~ 個底係 creamy 嘅意大利飯，上面就鋪咗厚厚嘅一條大鰻魚，燒得香口得嚟又有煙韌感，再加埋大阪燒嘅元素，呢個 fusion 菜係幾有創意。🍰 Tiramisu ~ 賣相唔花巧，但一食落去就覺得好滿足，忌廉滑到不得了，咖啡酒味唔會太搶，平衡得好好。原來逢星期一至四加 $28 就有蛋糕放題，仲有六款選擇，其他 cheesecake 都幾吸引，可惜今日實在太飽，唯有留返下次先再嚟慢慢試。…Read More

一入去呢間餐廳就感受到高級日式餐廳嘅靜謐氛圍，最正係坐窗邊望出去就係無敵大海景，食住和牛睇住維港，真係寫意到不得了。今日分別試咗兩個 set，同樣都係咁出色！🍽 日山．和牛盛宴  呢個 set 真係牛魔王必食，嚴選咗七個唔同部位嘅A5和牛：腰脊、肩胛、牛柳、牛肋、內裙、西冷、肉眼，每款都有唔同嘅油花分佈同口感，牛味濃郁但唔會太 heavy。😋 A5和牛肩胛刺身 ~ 呢道好有驚喜，肩胛位油花分佈平均，切得薄薄地，幾乎入口即溶。上面鋪咗一片片黑松露，牛脂嘅甘香同黑松露嘅濃郁味道互相提升，簡直係奢華嘅享受！😋 A5和牛腰脊紫菜脆餅 ~ 感覺係高級 fusion 之作，底層係香脆紫菜脆片，中間鋪咗微炙嘅A5和牛腰脊粒，油脂香濃但唔膩。最上面鋪咗海膽，鮮甜滑溜，入口即溶，食落去層次感好豐富！🍽 日山．松  呢個 set 就偏向海鮮，有刺身、清酒蒸鱈場蟹等等，啱晒鍾意清新口味嘅人。😋 日山嘅壽喜燒真係無得頂！肉質嫩滑，油花融化得啱啱好，加埋生蛋汁一齊食，口感更加滑溜，牛肉嘅香氣同蛋香嘅融合，幸福感滿滿！配埋支自家製日山 HARU 清酒，微甘口，啱晒慢慢嘆住食 ❤️…Read More

呢間兩層高嘅餐廳位於灣仔，地方唔算大，座位排得比較密，坐低之後有少少逼，但勝在氣氛幾 casual，啱晒同朋友輕鬆聚餐。😋 燒烤醬豬肋骨 ~ 一上枱已經聞到陣陣燒烤香，豬肋骨外層塗滿濃郁 BBQ醬，甜甜地又有d煙燻味，味道都幾香口。😋 帕馬火腿酥皮薄餅 ~ 呢個薄餅唔係傳統 pizza，而係用酥皮做底，食落有層層酥香，唔會太厚。上面鋪咗帕馬火腿、火箭菜同芝士，味道幾平衡，鹹香中帶少少酸，幾開胃。😋 香烤三文魚配薯蓉 ~ 三文魚煎得幾靚，外皮微脆，入面仲保持到嫩滑，無過熟。底下鋪咗一層 creamy 嘅薯蓉，口感滑溜。😋 荔枝草莓可麗餅 ~ 嚟呢度係必食可麗餅！今日係朋友生日，叫呢個都係覺得佢外形幾靚，草莓切片鋪得好整齊，荔枝肉白滑晶瑩，中間仲有忌廉，甜度啱啱好。可惜寫盤果句「Happy Birthday」手字真係有d求其，無乜心思，不過味道方面確實唔錯！😋 椰香芒果班蘭可麗餅 ~ 呢個甜品就真係有驚喜，可麗餅係班蘭味，食落有淡淡香氣，唔會太甜。上面鋪咗芒果粒，而椰漿同忌廉令口感更加豐富，椰香同芒果味好夾！…Read More

每次經過呢間餐廳都見到門口排晒長龍，可見佢人氣一直持續高企，而且夜晚唔接受訂位，只可以walk-in，今日等咗 45 分鐘先可以入座 🙈🙈 呢度主打美式 fusion 風，入面環境燈光偏暗好有氣氛！😋 炸芝士通心粉球 ~ 呢個係我唯一嘅心水之一，外層炸得金黃香脆，咬落去啲芝士通心粉係 creamy 得嚟唔會太漏，芝士味濃但唔會膩。😋 Nachos 配辣雞肉 ~ 上面鋪滿芝士、酸忌廉、牛油果醬，不過辣雞肉有少少唔乾，味道一般。😋 芝士四重奏長通粉 ~ 用咗四種芝士：mozzarella、ricotta、romano 同 parmesan cheese，味道唔算濃郁，係長通粉煮得啱啱好，煙韌度適中。如果要排咁耐隊，加上食物質素一般，未必會再去了 🙈…Read More

今日 lunch time 已經早咗少少落灣仔搵食，點知呢度都仲係咁多人排隊，等咗成半個鐘先有位，而且上菜時間比較慢 🙈 店內裝修走台灣文青簡約風，木枱白牆，環境感覺幾 chill。酒香椒麻牛絲拌麵 ~ 牛絲係幾入味，食落唔會太乾，但就無乜牛味。有少少酒香但唔突出，椒麻唔算好辣，麻味都係比較輕。蔥香雞油雞腿拌麵 ~ 雞腿煎得香口，皮脆肉嫩，雞油香味幾突出，香氣十足。雞油拌麵就比較油香，麵條吸晒 d 油汁又幾滑口。不過食落有少少單調，食多幾啖會覺得膩。三寶牛肉麵 ~ 三寶滷得幾入味，湯底香料味唔重，偏清，唔似台灣果種濃厚牛肉湯，整體算穩陣但唔突出。椒鹽豬排魯肉飯 ~ 豬排炸得幾香脆，肉質唔算厚但唔鞋口，正常一般台式魯肉飯。今次試咗幾款麵飯，味道方面就中規中矩，無乜太大驚喜，價錢唔算平，等位時間又長，建議避開 lunch peak。…Read More

呢間人氣餃子專門店真係有 d 驚喜，佢哋主打多款特色餃子，可以揀湯餃、水餃，或者煎餃。我就試咗湯 & 煎，兩款都各有千秋~ 湯餃隻隻都皮薄餡靚，湯底又清甜，唔會搶味，襯托返餃子嘅鮮味；煎餃就皮脆餡嫩，仲留有少少湯汁 😋😋😋 墨醉雞餃 ~ 呢款餃子可以話係招牌之一，嫩滑雞肉配上醉雞汁，入口有淡淡酒香，加上有墨魚嘅爽脆口感，味道層次好豐富！😋 韭菜蝦皮豬肉餃 ~ 呢款比較貼地但做得好出色，傳統韭菜豬肉餃加上已炒香嘅蝦皮，韭菜香味夠，蝦皮好有鮮味，簡單又好味！😋 火焰醉雞翼 ~ 呢個係打卡之選，上枱嘅時候會點火，儀式感滿滿！雞翼火燒完之後有微微焦香，肉質仲保持嫩滑，配埋柚子醬又幾清新。…Read More

呢間有兩層嘅酒家位於灣仔，裝修保留住舊式酒樓格局，餐椅、地毯、所有佈置都好有懷舊味道。早排見佢出通告話十月尾結業，即刻約幾個朋友嚟幫襯，叫咗個四人套餐，順便回味下舊香港嘅味道。粟米魚肚羹 ~ 呢煲羹一上枱真係嚇一跳，好大煲，夠四個人飲兩轉都仲有剩。羹底稠度適中，唔會太杰亦唔會水汪汪，粟米味算香，但魚肚無乜口感，食落唔太突出。茄子班腩煲 ~ 個煲仔上枱仲好熱辣辣，茄子煮到好腍，吸晒啲汁，入口夠味，拌飯都算啱，但食多幾舊會覺得油膩。椒鹽焗排骨 ~ 排骨炸得乾身，咬落去都幾香口。鹽焗雞 ~ 味道偏淡，鹽焗味唔夠入，雞肉味道一般。另外再加碟鹹魚雞粒炒飯，份量啱啱好，炒得乾身，粒粒分明。最後每人送一碗糖水 ❤️「醉瓊樓」有情懷、有氣氛，今次嚟主要係為咗懷舊，感受下舊式酒家嘅風味~~…Read More

喺葵芳新開嘅「肉肉大米」主打日式漢堡排，食材講究都係由日本直送，採用東北虹煌米，粒粒晶瑩剔透，煮出嚟香軟又有米香；日本新鮮雞蛋，蛋黃濃郁，拌飯一流；漢堡排就更加有心思，係用九州黑毛和牛混美國牛肉，咬落去有啖啖肉香，誠意十足！雖然排隊人多，但翻枱快，唔算等得太耐。店內裝修簡約日系風，設有 24 個吧台座位同開放式廚房，新鮮現製和牛漢堡排但唔大油煙。白飯、湯、西蘭花都係任添，唔怕唔夠飽，職員仲會主動問你要唔要加添，服務態度好親切。試咗佢哋最受歡迎嘅三件漢堡排套餐，每塊都厚身多汁，放喺鐵板上面加熱，入面肉質仲保持嫩滑。配料方面選擇多，枱面有燒肉汁、洋蔥醬、黃芥末醬、胡椒鹽等等，任你自由發揮。😋 原味 ~ 加埋壽喜燒汁同生蛋一齊食，蛋黃拌埋飯真係邪惡到不得了，再灑少少胡椒鹽，味道層次即刻提升。😋 芝士 ~ 店員即場喺你面前刨芝士絲，落得夠豪，芝士溶喺熱辣辣嘅漢堡排上面，香濃又拉絲，芝士控必試！😋「期間限定」南洋青咖喱 ~ 呢款就比較特別，漢堡排上面有菠蘿片同香草醬，微辣嘅青咖喱帶少少椰香，清新得嚟又不失風味，幾有驚喜。以呢個價錢食到咁高質嘅日式漢堡排，加埋任添配菜同貼心服務，真係抵食又滿足！…Read More

喺銅鑼灣搵間靚嘅麵包店梗係去 Hashtag B，買多幾件俾同事做早餐送咖啡，正呀！呢間現場烘培真係好有創意，每一款賣相非常吸引之餘，味道都好出色，絕對係早餐 / 下午茶首選！今次揀咗愛爾蘭咖啡撻，咖啡味濃郁但唔苦，入口滑到不得了，底部係酥脆牛油撻皮，咬落去鬆脆有層次感，而且唔會太甜 😋 另外見到呢個白粟米酥外型咁特別就好想試，法式酥皮入面充滿又香又滑嘅蜜糖吉士，上面就鋪滿一粒粒焦香咗嘅白粟米，味道清甜唔會膩。Hashtag B 間唔中都會出新品，自家手工製作認真，每件食品都見盡心思 ❤️…Read More