miss.monster's Profile

話説好日都唔會黎慈雲山 但今日去探完個親戚 咁岩到食飯時間 就齊齊落去食個飯～見到呢間翁記上海館門口好多人排晒隊 應該好好食～我地4個都唔執輸排埋1份～排左陣都好快有位 咁就入去嗌野食～1坐低先嗌4杯熱豆漿再慢慢揀野食 雖然小店地方細細 但野食方面都有好多款式 仲要好多係出面食唔到 好特別～首先叫左2個前菜手拍青瓜同水晶肴肉 之後仲有炸銀絲卷 竹笙火腿雲吞雞 當然唔少得小籠包！最後仲試埋酒釀桂花湯丸同豆沙鍋餅～首先講下手拍青瓜～幾大碟 酸咪咪好開胃！青瓜入味 爽脆夠凍～作為前菜1流！水晶肴肉 呢個好特別 係出面未食過～賣相相當精美 食落好清新 由于都係凍食 好似食緊咸既jelly 好過癮～好食又特別！由于我地叫得多小菜小食無叫飯麵～炸銀絲卷就可以飽下肚～雖然係炸 但唔會好油 熱辣辣點鍊奶食 1絲絲好好食～之後就係竹笙火腿雲吞雞 大大碗 足夠我地4個飲2碗有多～湯底好清甜 湯入面有津白 仲有成隻嫩滑雞脾 竹笙索晒d湯 爽口好味！雲吞都有幾隻 大大隻 食得出係自家製作～好滿足！小籠包原籠熱辣辣上 以為得個籠大？錯啦！d小籠包都好大！！真係唔講得少 好足料～咬落去d湯汁立即漏出黎～一定要小心d食小心熱燙！最後食埋甜品做總結 食左我好耐好耐無食過既酒釀桂花湯丸同豆沙鍋餅～酒釀丸子湯底不濃不淡～桂花味好香好清新 驚喜係唔係用小丸子 係用黑芝麻湯丸！1碗6粒 個個要搶我碗野黎試～爭下先過癮！至於豆沙鍋餅 新鮮炸起～外面微脆～豆沙餡不甜不膩！好快俾我地幾個KO左！講呢間上海菜有驚喜！款式除左夠多 仲夠特別！價錢大眾化 完全係街坊價！4個人食先$3xx 份量唔少 食到個個飽飽豬～店員姐姐好親切 係咁推介同跟單～上菜速度都好快手！非常滿足又滿意既1餐～正！！…Read More

話説自從食過幾次蒸氣火鍋之後就覺得好正 d料新鮮好味之餘 因爲係蒸 唔洗落油 變相成件事好健康～所以成日周圍食蒸氣火鍋！而今次就搵食搵到去柯士甸啦！呢間私房御約係柯士甸站行約5分鐘就到～算方便 好易搵到！1入黎就覺得呢度裝修幾新幾潮～同埋座位闊落 地方乾淨！1坐低老闆就送上1壼紀子龍眼菊花茶 味道幾清 我好鐘意～但mr.monster要飲凍野 所以佢就order左咸檸7！然後我地就揀好 食龍躉海鮮餐～係等緊上菜既時候順便就混個醬～但其實蒸氣鍋食原汁原味 對我黎講可以唔混醬都夠晒正！自家製既前菜好好食 我同mr.monster由於太肚餓搶住食～老闆話有咩材料都唔會隔夜日日新鮮 所以淨左既料就會做前菜 今次前菜入面有蜆肉 魷魚同蝦！好彩既話有機會會有龍蝦tim 哈哈哈！好快老闆就預備好粥底放落去 再放埋基圍蝦同花甲落去蒸～老闆會幫我地計準時間 務求食物蒸得岩岩好 唔會蒸過龍或未夠熟 讚！蝦同花甲好快食得 2款海鮮新鮮 食落鮮味十足 蝦肉爽脆 唔會霉～花甲多肉 好乾淨無沙～下一款就係深海龍躉魚腩 平時聽牙媽講龍躉魚腩好貴架 而老闆就話每日親自落魚檔預留同挑選 唔怪得知食落淡淡肉 魚肉新鮮結實 龍躉皮好厚！！食落好似花膠咁充滿骨膠原～龍躉魚腩真係貴得有道理！食到我地2個讚不絕口～之後就係手打墨魚滑同手打鮮蝦滑仲有宮崎放養豬梅頭肉～首先墨魚滑同蝦滑都係明乎其實手打 打到起膠 因爲真係好爽滑好彈牙！其次豬豬真係用心揀過 蒸完仲保留好香豬味～油脂好均衡所以食落好軟熟好好食！下一道就係元貝皇連裙邊～老闆先蒸裙邊 因為蒸過龍會韌 依家蒸得岩岩好所以係爽脆既！之後再蒸元貝 元貝落左小小海鹽 所以蒸完要先飲其蒸出黎既精華～大大粒元貝食落口極之滿足！順心帶1提元貝洗到白雪雪好乾淨～可以好放心食！最後蒸既就係蟲草花紅棗冬菇蒸雞 嫲嫲愛心韮菜餃 同七色時蔬～蒸雞真係又一驚喜！好多肉之餘仲要出奇地滑！蟲草花紅棗冬菇已經入晒味落d雞度 真係正！而mr.monster話韮菜餃好好食！真係似佢媽媽以前包既味道 好神奇！而蔬菜就好嫩新鮮～好快俾我清晒！最後最後當然係食埋萬眾期待既粥底～粥底好杰身 好夠米～除左所有食材既精華都落晒落去之外 仲有粒粒粟米既清甜～整個粥底鮮甜美味 我同mr.monster都食左幾碗 完全清晒！！正～原來唔記得左仲有個甜品～桃膠雪耳木瓜糖水～清甜滋潤 第1次食桃膠原來好似雪蛤膏咁滑滑的～「平民燕窩」名不虛傳 美顏一流～總括$298 1位 食到如此高質食材 仲要有咁有heart服務 絕對超值！套餐俾現金仲要有85折添！下次要帶多d fd黎食！…Read More

雖然去完泰國番黎無耐 但真係對泰國菜念念不忘所以今日收工就同mr. monster一致決定要食泰國菜！今次揾食揾到黎佐敦廟街 依家廟街真係越黎越多野食～見到呢間莎娃迪卡即刻唔洗唸衝入去！入到去侍應叔叔好熱情招呼我地 由於樣樣都想食 所以等佢推介講解下 我地2個人眼闊肚窄 但都叫左好多野！！包括有冬蔭公，生菜包，香茅雞翼，飛天通菜，泰式炒金邊粉仲有甜品芒果糯米飯！首先上菜就係肉碎生菜包 新鮮生菜用木制碗裝住好美觀 唔求其！肉碎用左大量香料炒 包括香茅 香茜 洋葱等 用生菜包住食 爽脆 好味！開左2胃 就要食第2道菜啦～就係冬蔭公大頭蝦湯(細) 話就話細 我地2個人每人都飲左2碗有多 蝦好大隻 好爽好彈牙 開邊切開 食用時好方便！冬蔭公湯唔會太酸或太辣 洽到好處 適合香港人口味！之後就係香茅雞翼同飛天通菜！雞翼份量都唔少 上面放左好多炸蒜 格外惹味 mr.monster最愛食雞翼 食多幾隻岩晒佢！！飛天通菜就我岩我 因為食得太多肉要食番D菜中和番 最衰mr.monster唔食椰菜苗 如果唔係食泰國運黎既椰菜苗就仲正！泰式炒金邊粉亦都好好食！侍應叔叔仲教我地落調味料落去撈埋食 令到成個金邊粉更加有泰國風味 鍾意食辣既我 落多d辣椒粉就岩晒！另外都有幾隻蝦肉～炒到好爽口 食得出係新鮮既蝦～最後點可以唔試埋係泰國日日食既芒果糯米飯呢～呢度既芒果糯米飯有2球飯 分别係糯米飯同紫米～飯就煙煙韌韌 配上大量椰汁同香甜芒果 真係好似去左泰國咁正！今次同mr.monster都食到飽飽 下次要再黎食其他野！值得一讚係侍應叔叔同哥哥仔好有禮貌 同埋好好人！講解食物之餘會同你傾下計 仲帶左我地上上層參觀下 原來樓上仲可以做包場～幾夠私隱 包場開party1流！…Read More

天氣又凍番幾日 真係又想打邊爐啦！今次同Mr.monster食龍鼎閣 就係小肥羊舊址 對住朗豪坊 1見就見到 非常方便。由於有Book位 去到唔洗等 樓下就有姐姐禁lift帶我地上去～上到去見到醉雞鍋半隻只係加$28 唔洗唸啦！就食呢個～之後再點d任食既前菜～有手拍青瓜 豬耳 海蜇 木耳 椒鹽豆腐 蜜汁叉燒 口水雞等10幾款！蜜汁叉燒半肥瘦 肉質軟腍 好食！另外要讚椒鹽豆腐 新鮮炸起熱辣辣 外脆內軟 豆腐好滑 好好食！忍唔住食左3 4碟～好正！食前菜同時湯底都到了 醉雞同上湯分碟上 真係有半隻醉雞 雞肉夠多夠嫩滑！再叫埋火鍋料 應有盡有 幾十款咁多！肥牛片 羊肉片 豚肉片 全部新鮮切 1卷卷 唔會痴埋1舊舊 落湯拖1拖就食得 好方便～墨魚滑 蝦滑又係必食 新鮮手打 2者都好彈牙 墨魚味 蝦味十足～花膠都好大舊 淥完唔會縮水 夠漿口！蔬菜 丸類 海鮮都非常多 2個人樣樣想食 樣樣想試 但奈何個胃裝唔晒 哈哈！野飲方面係半價 mr.monster 話打邊爐唔可以唔飲啤酒 所以佢叫左1支青島而我就叫左榨蘋果汁 好好飲～化解打邊爐既油膩飽肚感！Good！！另外仲有其他半價海鮮可以Order！鮑魚～聖子皇 帶子 象拔蚌 半價好抵食～可惜真係太飽 唯有下次再食！…Read More

去到9龍城真係10次有11次都係食泰國野或者打邊爐 但今次錯有錯著 揾緊車位既時候發現呢間意大利菜 門口不太起眼 但就好多食客 由於我地都未唸到食邊間 咁就一於試試呢度。入到去店鋪乾淨企理 店員面帶笑容 幾有親切感。由於我地完全未有idea想食乜 揭開餐牌又樣樣都吸引 總廚就出黎向我地推介幾款菜～我地都覺得唔錯咁就聽話order!店員送上兩款餐包 由於掛住傾計仲未開動 過左陣頭盤黑松露忌廉汁意大利帶子牛肝菌雲呑就上菜了！總廚教我地雲吞汁搽面包 果然好好食 好食過搽牛油 個包食完仲想食！再講講個雲吞 1定要趁熱食～雲吞皮算幾薄 連汁食黑松露味道好香好滑 加上豐富餡料 1粒粒帶子同牛肝菌 口感人豐富！極之好味～然後就到白酒煮新鮮紐西蘭大蜆 大蜆肉粒粒大如青口 咬落蜆肉去非常飽滿爽口 加上白酒味道令蜆味更鮮甜 味覺昇華！主菜香草燴羊膝闊條麵份量不少！羊肉不會很羶 肉質鮮嫩軟腍 口感不像冰鮮雪藏貨 百多元吃到這個菜真是驚喜！最後由于意猶未盡再Order了甜品 心太軟加上愛爾蘭雪糕實在少有 竟然有2球雪糕 看著都好開心 雪糕奶味香濃 加上合桃 口感十足～心太軟用上68%朱古力 甜度適中 口我胃口！今次吃貨之旅非常滿足 來到九龍城 不防試試這間PAVIA 嚐嚐隱世意大利菜！ps：店員們跟總廚超級nice 而且很健談 整個飯局樂也融融 非常開懷開心！…Read More

曾經銅鑼灣係有間叫做Chitose既日本食店，不過時移世逆 銅鑼灣Chitose已經成為過去。而最近發現屋企附近又開左一間同名既食肆，睇門口餐牌就應該係食西餐既，有西冷扒之類，都好想一試同以前有冇分別，就Book左諗住同Mr.monster享受下浪漫氣氛。環境方面，傳統西餐Feel，企理四正，地下枱面都好乾淨。入門口店員就有禮貌咁招呼我地坐低，亦都推介我哋要食乜野，再仔細揀野食先至發現其實係Fusion菜式，我哋就一於揀左推介既香煎慢火煮羊西冷配意粉、五花腩芝士汁意大利面、香蔥惹味牛柏葉，仲要加一個松露醬薯條。先上既係係香蔥惹味牛柏葉，哩味送做前菜係幾好選擇，雖然西餐牛柏葉好似好奇怪，不過既然係推介就梗係要試，食落口，凍既，非常爽口唔會韌，同出面食到就咁白洽果d真係冇得比較，配埋個蝦油秘制醬，係一流既絕配，尼得哩度，唔食哩味簡直對唔住自己。再講個香煎慢火煮羊西冷配意粉，西冷牛就食得多，西冷羊真係少見又少食，同食羊架羊 膝原完唔同，除左無骨之外，可以講得上完全冇羊騷味既。五花腩芝士汁意大利面係一個我認為唔食對唔住自己既菜式，因為哩個菜式實在太邪惡，上台成個樣好似拉麵咁，正係粒半生熟蛋都引死人，食落芝士味好濃郁，配埋半肥瘦五花腩，邪惡到爆炸。黑松露薯條份量好多！粗粗既薯條熱辣辣炸到内脆外軟 仲要唔油！點埋黑松露醬又香又好味！飲品方面我飲呢杯oreo奶昔真係好正好creamy 好似食緊雪糕咁好好飲！最後，2個set加一蚊食埋個甜品朱古力窩夫就完成今日既浪漫旅程啦。…Read More

一向都有譚仔癮 1個星期1定要食1次～次次都係食一模一樣既餸 一模一樣既湯底好似好專一 但好似好變態 (但我深信唔係得我係咁)餐牌都唔洗睇 竹苼腩肉冬菇中辣走九～凍檸蜜少冰～由於我一向好食得辣 所以中辣一定難唔到我 (但係街唔想食到成身汗所以我未挑戰過大辣)唔好以為湯底好清無料到 其實已經好夠辣!辣既原因仲有佢碗野係即煮 所以勁熱 所以感覺上先會咁辣 竹苼係我3個餸之中最愛 因爲佢索晒湯汁 而且好爽口～食多多都唔夠♡♡冬菇我就不嬲都喜歡食既 所以唔需要原因 冬菇有4粒 算幾多～至於腩肉 切得夠薄 肥瘦分明 食落有層次 好味！米線份量都幾多 基本上連湯食曬會好飽～唔想食咁飽有是我會叫少米線～而米線煮完唔會1舊舊 反而好滑好易咬開。配菜方面有少量芽菜同腐皮 芽菜無草青味 腐皮夠薄易入味！食完最後飲埋杯凍檸蜜少冰 少冰既原因係唔想d冰溶化溝淡左整杯飲品 飲檸蜜仲可以潤一潤喉嚨～正！BTW其實佢地個湯底係勁多味精同調味 所以食完勁口渴～…Read More

由于食左個下午茶mr monster都仲未夠飽 咁就由油麻地行番去旺角！好耐無去旺角 原來登打士街依家小食店多到咁！真係人山人海 個個立食！mr monster見到芝士撻就衝左入呢間有少量座位不過我地都係選擇企係度食～20蚊1個酥皮芝士撻 價錢唔算貴。唔洗排隊 俾完錢拎單去攞撻 算幾大個 睇落漲卜卜 咬落酥皮幾脆 中間芝士有少少流心 酸酸地忌廉芝士 唔會好漏。飲品叫左杯藍蝶花鮮檸檬果茶 買撻加$12 貪佢紫色夠靚。原來都幾大杯 算幾好飲。有機會的話再試其他野～…Read More

今日係2017年第1日 mr monster本身話帶我去cafe 點知遊行又塞車 去到油麻地間cafe竟然無開 超掃興唔知食乜好 已經4點又攰又餓 見到馬路對面casa hotel好似有間Ok ge西餐 二話不説就上左去。由于我地2個都好鍾意食黑松露 就叫左2個黑松露野菌意大利飯 order完好快上台 店員送上既時候陣陣黑松露味好香 賣相吸引 食到一半覺得好古怪 唔飽肚 但開始濟 可能因為多忌廉所以太漏。Mr monster 叫左凍既焦糖牛奶咖啡 都幾大杯 賣相幾可愛 味道唔錯。我叫左榛子牛奶咖啡 我鍾意飲熱既 有個心型拉花 好彩無加糖 因爲唔洗加糖都夠甜。環境方面由于坐窗口位 一邊食野有街景望下 睇下街上遊行情況。亦由於係假日有人book左場 但隔音做得唔好 環境嘈到不得了 聽到入面d牙姐係度叫陳太乜乜乜！其實好想坐下hea下 但太嘈連傾計都要好大聲先聽到 真係唔想留太耐。…Read More

有日收工係西九龍見到呢間加騰屋新開 由於唔洗排隊 唔洗等位 咁就入左去食啦！店面好光猛 亦都好乾淨 睇睇餐牌 好搞笑～佢係吉野家+pepper lunch 有得hotpot, 牛肉飯, 仲有鐵板牛肉飯！天氣凍凍地 咁我同mr monster就一人一鍋打邊爐 大家都嗌左牛肉 追加左豚肉！呢2碟肉都幾ok 色擇唔錯 份量算幾多！咬落幾林 唔會好硬～其他配料就比較少～但食埋個讚岐烏冬係好夠飽！個烏冬好食幾好咬口～另外講一講湯底 mr monster話壽喜燒日式濃湯甜甜地 好夠味 幾好味幾特别！提提你野飲要叫少冰～如果唔係會成杯都大大粒冰 實際飲得幾啖！慳錢建議：因爲佢食1個餐會有4蚊coupon 所以買2個餐記得分開買 咁就可以用2張～慳8蚊！…Read More

話説我好少會想食pizza 今日係尖沙咀做完facial 突然同mr monster講我想食呢間大大塊pizza！所以就走左黎食～我最中意食辣肉腸 所以order左辣肉腸pizza～mr monster就order左四式芝士～佢係勁中e食芝士既！order完佢加熱番pizza 埋位坐低等一陣就有人送上～大大塊pizza 熱辣辣 配埋杯啤酒！超爽～～pizza唔會好厚皮 薄薄地條邊有d脆～平時2個人叫1個pizza實食唔晒 咁樣大大件食1塊真係岩岩好 最緊要唔會浪費～…Read More

新記 我已經大大話話黎過10次以上 次次都想寫食評但次次都懶 今次終于落筆啦！話説1個月總有幾日突然間想食生牛檬 呢間抵食又好食 所以係我首選！基本上都係收工黎食 晩晩都幾多人黎食 但好彩次次都係唔洗等位！例牌我係食生牛檬 通常order左唔洗5分鐘就有得食 而店員次次都會先奉上一蝶配料 就係芽菜同九層塔香草！！加埋落去食 整體味道提昇 九層塔真係好鬼香～生牛檬黎到 真係生既 無呃我 湯好熱 足夠浸熟牛肉同芽菜～湯底好濃好好飲唔係味精湯！牛肉都有5-6片 而且好香牛味好林好正～$36碗粉份量都唔少～食完飲埋杯野(+$6)好夠飽！$42食個晩餐 又好食 算幾抵！另外 次次黎親都見到係1男1女店員 幾有禮貌 好勤力 做野好爽手！值得一讚呢！…Read More

呢幾日天氣又凍番 係時候要食雞煲打邊爐啦！呢間火鍋薈就係西九對面 又係我公司附近 樓下個姐姐幾nice 傾左幾句計又講得下笑 幾有親切感！所以係短期內我已經食左2次 上次食雞煲加打邊爐 今次一於試另1個湯底～就係滋補花膠醉雞鍋！聽到名都流晒口水～order左湯之後就去雪櫃揀野飲 竟然有我勁勁勁中e飲既冬瓜茶(最後我係飲左起碼5罐因爲太好飲)除左冬瓜茶另外仲有韓國野飲 同自己煲既洛神花茶 開胃又清熱～跟住當然去混個醬先 香茜 生蒜 炸蒜 辣椒係我必食既!!搞完個醬湯底好快送到～落左起碼半隻雞落去 d雞多肉夠嫩 醉雞味道一流!!花膠夠厚又大舊 食落口會漿住 真係真花膠!!我飲左1啖個湯 好夠醉雞味 酒落得夠多 夠足料 好好飲 我忍唔住飲左2碗 飲完個身暖笠笠!!d雞食到咁上下就落火鍋料 全部都係任食!!海蝦 帆立貝 花膠 手切肥牛 羊肉 黑豚肉 手打蝦滑 手打墨魚滑食材全部都好新鮮 而且無漏單！我好中e食海帶結 呢度都有!!好鬼正～手打蝦滑·墨魚滑真係手打 唔會腥 好彈牙 好好食!!聽講呢度未有酒牌 但可以自攜啤酒上黎飲 所以真係想飲酒可以買定上黎雪住佢～另外侍應們都好親切 個個笑容滿面 幾有禮貌 清理台面 收碟 都好快手！值得一讚～最後埋尾食番個雲呢拿雪糕 掂！飽晒～～$158食到呢個質數認真係抵！呢個冬天得閒就要call齊人黎食…Read More

星期日同mr.monster蒸完腳唸住繼續relax 黎左timesquare玩下自拍咖啡 竟然唔洗排隊唔洗等位！可能因為價錢比樓上星__克貴少少 但就可以坐得舒服唔洗迫 亦唔會眼望望俾人趕 真係可以抖一抖。由于我係買左團購$59當$120用 所以飲2杯selfie coffee都係$59 算好抵！正價都$59 1杯！咁我就飲凍鮮綠茶咖啡 mr.monster就飲凍焦糖咖啡 坐定定自拍完一輪 等一陣就可以出去拎！好期待♡♡實物原來好大杯 相片印左係豐厚既奶泡上 印得好清！而且張相可以keep到好耐 我以為一陣間就化晒！味道方面 焦糖咖啡好甜 而我果杯味道都一般般。另外我地仲叫左2件cake 每件$40幾 分别係朱古力蛋糕同豆腐芝士蛋糕 味道都係麻麻地 遍甜 掛住食無影到。其實唔係貪過癮玩下杯selfie coffee都唔會黎試 哈哈。…Read More

岩岩星期日 好耐無去過銅鑼灣行街 行timesquare行到9樓 發現有層9²仲要有韓國野食頡1頡門口menu發覺唔錯 我對個3人部隊鍋幾有興趣就問1問侍應 3個夠唔夠食 侍應哥哥話夠 咁我 爸 媽3個就入去啦！首先黎到係絕對唔夠食既 個份量我1個人都食得晒 無計 咁就加個蔬菜籃 豆腐同芝士 加配菜絕對係唔貴 食完都係唔夠飽 就再叫多2個拉面 份量算少 味道整體Ok 唔辣 加左芝士係幾好食！叫左2杯飲品 1杯菠蘿冰水 1杯藍色檸檬水 不得不讚一下小小肥既侍應姐姐 話我地知呢2杯飲品係有汽既 仲俾d好老實既意見話俾我地知邊樣好飲 邊樣比較甜 仲有點菜時佢係最好禮貌 有笑容 夠親切 侍應黎講呢個好過其他2個女仔 2杯飲品都幾好飲 我會喜歡飲檸檬水多d因為有d青檸味幾舒服！最後就食甜品 紅豆豆粉雪花冰 甜品份量夠大 3個人share食好滿足！雪花冰好細 睇落似椰絲 質感好棉棉 食落口好凍！！敏感牙齒馬上脾左 哈哈！雪花冰係牛奶味唔膩唔甜 淡淡地 紅豆蓉都唔會太甜～整體Ok！開頭以為呢間韓國野新開 星期日竟然好多位唔洗排隊 點知侍應姐姐話已經開左有1年 但我問侍應menu上問題 大家你眼望我眼唔多識答咁..哈！真係有趣。整體一般 應該唔會再黎食。…Read More