東寶小館 (Moved) New Location

星期三，凍唔夠幾日，又要出動夏天衫，香港嘅天氣變化真快。不是很久的從前，筆者都會聯群結隊，浩浩蕩蕩嚟「東寶」食飯。十多名壯男，圍成一桌，一人一個戰鬥碗，攝高衫袖，「乾咗佢」此起彼落。是晚，沒有大班人，只得太座與筆者二人，亦沒有一枱十幾樣餸、十幾支酒嘅場面，在升降機旁的一張小桌子，悠然自得地嘆羊肉煲($128)及清炒豆苗($45)。旁邊嘅大枱依舊坐滿年輕人，重複做著筆者當年做過的事。那時嘅「戰」意，如今所剩幾許！羊肉煲是不包菜的，要烚下烚下，就得別外order，覺得不是味兒。羊肉煲腩位只得幾塊，所以叫「羊肉煲」非「羊腩煲」，冇誤導食客。羊肉本身味道肥美，可惜的是煲得唔夠耐，瘦肉部分非一啖就溶化。本是精華所在的枝竹，嚇然是未完全煮腍的，而且入口粗糙，與吸滿羊肉汁的境界相去甚遠。只有啖啖的馬蹄，既爽且甜，蘸上一點羊肉汁，也蠻好吃的。一碟清炒豆苗，卻弄得頗為油膩。也算吧，廚師慣了重手煮菜，一時要輕輕出擊，調節不來。加一碗白飯，平均每人差不多一百蚊。是令人失望的一夜，睇嚟，還是小炒比較出色。店員雖忙，見太座腹大便便，都特地弄來一張有背嘅椅子，值得一讚。