渝味曉宇重慶老火鍋 (Prince Tower) (Closed) View

一間試完一次就唔使番兜既店。由於食到最後覺得好失望先影相證明我有食去食食評。見Openrice咁多好評就黎試下，諗住幾百個好評實無伏啦，點知都係唔得。有去過四川食麻辣火鍋既人相信都唔會推薦呢間店，我通常會係開始食火鍋先飲一啖湯去試下本身個湯底好唔好味，一開始已經覺得好普通，麻辣湯底應該有既香氣亦相當欠缺。四川火鍋必食既今次只係點左鴨血同黃喉，根據餐牌上既時間去淥熟，可能本身湯底唔算濃郁，食材未能入味，以淡然無味黎形容也不算過分，但鴨血質素相當唔錯，即使湯底無味但可以食得出係質素好既鴨血，口感軟嫩無雜質。而另外點左麻辣牛肉，淥完食落成口粉，牛肉既口感全被蓋過，食完一塊成個口腔充滿苦味。相反嫩牛肉無左大量既調味粉，食得出食材本身既味道之餘亦食到嫩滑爽彈既口感。而另一湯底大骨滋補鍋一開始都好普通，但食到最後湯底中多左唔同食材既鮮味加分左唔少，反觀作為店舖招牌既重慶麻辣湯底食到最後飲一啖湯最後只得苦味真係大大扣分，甚至可以講係海底撈呢類連鎖既麻辣火鍋店都比佢好食。唔推薦，如果好想試就試一次唔使番轉頭，服務質素唔錯，但性價比偏低。