泰廚泰國菜館

Open Now

Now Closed

之前去泰廚泰國菜館，試過佢哋啲串燒好好食，咁啱約咗朋友喺旺角食飯，所以決定再同朋友嚟食。 我哋九點鐘去到，等左大約5分鐘就有位。係等緊入去嘅時間，見到店員喺度製作串燒，串燒嘅香味已經好吸引。之前黎坐樓下，今次上到二樓發現座位都唔少。只要食夠＄200，就可以用$1選一款。我地點左泰式生蝦，生蝦鮮甜彈牙，點埋醬汁鮮味更突出。食泰國菜必點嘅泰式肉碎生菜包，肉碎好乾身仲有啲辣，包住新鮮嘅生菜食非常野味。朋友想食返個菜所以就點左個馬拉盞炒芥蘭，芥蘭好嫩爽爽地好有咬口，配合好香嘅馬拉盞味道一流。頭先喺門口聞到啲串燒咁吸引，梗係要點番啲嚟食啦，和牛好林，個醬汁令到牛肉味更突出，加埋青椒同洋蔥一齊食好有口感。重點左雞翼同豬串燒，串燒燒得剛剛好，雞皮燒得好香脆，配上泰式醬汁絕對係我嘅至愛。飲品點左下咸檸梳打同咸檸七，入面加左新鮮嘅青檸汁，配合梳打水同七喜，好好飲。