七輪燒肉 (Closed)

識咗嗰住港島西嘅朋友，自然要嚟覓食啦。依間燒肉喺正地鐵站對面，位置方便就腳，店舖開揚，坐嘅位置都幾寬闊。醬料碟有檸檬、燒肉汁同葱油，我基本上都係點燒肉汁同檸檬，比較開胃清爽，朋友就點葱油，味道厚郁。嗌咗套餐有包飲品，我點咗巨峰葡萄梳打，唔算甜又幾香，朋友點嘅可爾必思青檸梳打都唔錯，飲炭酸飲料配燒肉係一件幾開心嘅事，夠清涼。沙律係和風沙律，有洋蔥、蕃茄，酸甜開胃，另外有附味噌湯，仲有蜆喺入面。前菜我哋揀咗牛舌煮同辣汁雞肝，牛舌都幾肥美，汁香軟嫩；雞肝嘅辣味都幾令人食唔停，仲有菇喺入面添。主角牛拼盤，唔算好肥美，但幾有牛味，唔洗燒太耐都有得食，我最中意牛肉串，有種食串燒嘅味道喺度，牛肉又鮮嫩。鰻魚炒飯有驚喜，調味好食，仲真係有粒粒鰻魚喺入面，不過就唔算多。菜我哋就點咗芝士雜菜，點知都係菇😹但係係開心嘅因爲我鍾意食菇多啲。最後用雀巢甜點作結。總結嚟講套餐非常抵食，兩個人捧住個肚走，質素又唔差，可以一試。