火鍋撚 (日富里百好大廈) (Closed)

一班朋友冇事冇干出黎打邊爐，其中一個介紹左呢間，就一於試下。一入到餐廳已經聞到好香，口水都流埋。餐廳既座位夠闊落，好好座，方便吹水。我地極速咁點左D野食，配上佢個胡椒豬肚湯底，個湯底最早黎，我地見到中間有舊野，其貌不揚。正當我奇怪緊既時候，呢度既侍應已經開始做野。原來舊野係豬肚黎，包住左入面隻雞，佢地好細心咁剪開俾我地食，隻雞食落好嫩滑，但味道偏淡，配合埋個湯真係剛剛好。個湯好夠味，成隻雞既精華都煲晒出黎，佢入面既胡椒味不會太搶，冇蓋過左D雞原來既味。淨係呢個湯我都飲左幾碗！之後既野食陸續黎到，佢所有野食都有個細牌仔，話你聽要"六"幾耐，岩晒我呢D嘟嘟地既人，同時又保障到客人唔會overcook, 令食物係最好食既時候俾人食落肚，小小而重要既安排，令小弟非常欣賞。點左咁多樣野食，最值得一提既係聖子，佢既聖子大大隻，好清甜，而且一D都唔韌，超級推薦！之後就係肥牛，佢切得好薄，卓一卓就食得，食落好新鮮，贏在用料同個湯底。仲點左D羊肉、雙拼滑、菜、麵之類既野，整體食物質素都好高，我地仲點左幾支佢既手工啤酒，十分爽皮。