尖沙咀凱悅酒店咖啡廳

其實尖沙咀凱悅係2年之前嘅自助餐都有做過任食新鮮波士頓龍蝦，但係嗰時知道得太遲所以都book唔切，就冇食到！今次見佢做返新鮮波士頓龍蝦任食，就即刻拿拿聲book啦！由於d星期六日我都fully book嘅關係，就決定同阿貴價飲食buddy食平日。放工去到酒店已經6:30pm，buffet都已經開始咗，一坐底就梗係即刻拎隻新鮮波士頓龍蝦食啦！見佢display d龍蝦勁新鮮，仲郁郁下咁，睇到都覺得好味！一食落去，勁鮮味，又彈牙！新鮮嘅果然係唔同d！食咗成隻龍蝦之後就再睇下有咩嘢食啦，咁基本嘢刺身，凍海鮮，cold cut，grill station，粉麵檔，熱食果d都有齊㗎啦，但相比新鮮波士頓龍蝦，呢啲嘢食都變成雞肋，不過有時都有d期間限定，就好似有即斬燒乳豬同埋片皮鴨咁，都有d驚喜位！除此之外，佢都有即煎鴨肝，我都拎咗舊食下，兩邊煎得好脆又夠大舊，好好食！到最後甜品啦，尖沙咀凱悅果d卷蛋蛋糕出咗名好食，我都拎咗件士多啤梨同榴槤試吓，佢個蛋糕超鬆化又唔甜，食完好多隻龍蝦之後再食佢都完全冇問題！埋單佢原來有做85折（我都係係官網訂），一人$635，都好超值！