馬仔粉麵

Open Now

Now Closed

九龍城沙嗲火鍋🍲九龍城沙嗲火鍋通常只會諗到方榮記，但其實係九龍城熟食中心都有一檔沙嗲火鍋拍得住方榮記！😉坦白講，馬仔火鍋配料選擇唔算多，亦唔算特別精緻，勝在可以雙拼，兩個人食都可以叫到四五碟。環境夠地道，熟食中心都就重建，香港地真係買少見少！！打住邊爐可以嘆住隔離鋪頭梛青清熱。☺️沙嗲湯底確實出色，味道真係同方榮記差不多，香濃得嚟又帶點花生醬嘅甜味。基本上叫碟手切本地牛肉同公仔麵已經夠做。🥰

8/11/2022今晚相約朋友去九龍城市政大廈嘅‘馬仔粉麵（馬仔四季火鍋）’打邊爐。佢出名係個沙嗲湯底，我哋係衝着佢而來嘅，所以就算佢有得嗌鴛鴦鍋底我哋都淨係直接嗌沙嗲湯底。另外仲叫咗大嘅牛肉 （$360） 其實有少少貴嘅，不過佢真係好足份量，同埋啲紋都幾靚（其實我哋又貪心咗啲嘅，兩個女仔其實嗌細都夠嘅）。另外嗌咗枝竹併蘿蔔、雲吞拼魚片頭、炸魚皮，同埋一個出前一丁。真心$35個出前一定係有啲離譜嘅，但係對住呢個咁濃烈嘅沙嗲湯底，唔叫出前一丁真係對唔住佢😂😂。另外嗌咗兩支大嘅啤酒（$25支，食店嚟講都算抵）。另外佢本身每位都會俾一碟辣椒豉油，但係其實我地都冇點過，因為個沙嗲湯底已經好夠味。我哋大約六點幾去到就都坐咗1/4的枱，到我哋離開大約爭少少八點，已經要等位喇。不過由於呢度始終係街市嗰啲熟食中心，所以衛生情況就一般啦，係見到有強強嘅，好彩同行人士完全唔驚，仲幫我消滅佢（簡直係英雄）。

✨湯底揀左雙拼 沙嗲拼清湯沙嗲湯底 香濃偏甜有花生香 幾惹味清湯 加左大量蔬菜 味道清甜✨牛肉 牛肉揀左大size 份量都可以偏厚切 但有啲切得厚薄不一肉質鮮嫩 帶少少油花 肉味幾濃 唔錯呢個價錢唔算平 以呢個質素都可以接受✨白栢葉冇晒黑栢葉 白栢葉都照殺口感爽脆 配沙嗲湯幾夾✨水魷每嚿都大大件 爽口彈牙✨雲吞皮唔算薄 豬肉多 蝦存在感不足 普通✨炸魚片頭普通交貨貨色 魚味淡 口感彈牙✨枝竹好索湯 都唔錯 但有一兩件有酸味✨出前一丁麵每次點沙嗲湯底最後都必食返個麵索晒沙嗲湯精華 好難唔好食總結：食物可以 火鍋配料質素普通環境一般 喺街市入面 環境預咗會麻麻服務唔錯 價錢合理 都幾抵食好多人攞佢同同區另一沙嗲名店比較以下以個人感受講下兩者分別 供大家參考方榮記 沙嗲足料重口味 配料選擇多 質量比較好 價錢較貴馬仔 走大眾化路線 沙嗲相對溫和火鍋配料選擇少 質素亦普通 但性價比較高兩邊各有好有唔好 個人就相對偏好方榮記

之前日頭去過即將要清拆既九龍城熟食中心食樂園今次夜訪又另一番景象星期五晚竟然人頭湧湧 仲要等位馬仔四季火鍋佔最多空間亦最多人等( ﾟ∀ ﾟ)我地7點左右到 大概等左45分鐘大家都係為左呢個沙嗲湯底慕名而來可以當佢係同區另一間既平民版( ͡° ͜ʖ ͡°)鍋具比一般既細 有啲可愛沙嗲湯底的確濃厚 大部分食材都做到掛汁效果唔需要額外醬料都夠味而且間中都食到粒粒花生碎不過留意加左一次湯後會稀身好多邊爐料方面大推手切牛肉真心高質 油花幾靚 食落軟冧有牛味叫左小size份量都好多.ᐟ .ᐟ出面一丁索價35蚊 但都要叫架啦最好食一定要夾公仔麵嘛( ᵒ̴̶̷᷄꒳ᵒ̴̶̷᷅ )其他食材就中規中矩啦最好既地方係可以雙拼 人少都可以叫多啲款熟食中心系列黎講 我對上環果個都好有興趣( ˶˙ᵕ˙˶ )✿✿✿✿✿✿✿✿✿✿✿Follow @lastbitematters for more

雖然都未知幾時開始亦無話重建之後啲餐廳會點，但如果九龍城市政大廈重建後無左馬仔，一定會超唔開心。 一間好街坊式嘅邊爐，十個去九個都係食沙嗲湯底喇～ 湯底算係渴身，亦都幾濃味，留意返如果太滾可能會「火山爆發」，慢慢嘆就無錯㗎喇～ 叫左個大牛，肉味唔算濃但勝在份量夠，沙嗲牛無得輸先。另一樣好鍾意呢度嘅原因就係佢其他料可以雙拼，人唔多嚟食呢樣野真係好緊要，可以食多啲唔同款嘅野嘛～ 入左冬真係要嚟多幾次， 如果唔係可能有排都無得食。

聽講九龍城街市將會清拆, 朋友即刻約局, 之前夏季都食過一次幾出色, 今次天氣清涼更加好feel位於街市嘅3樓, 晚市想食嘅話可能要早少少到, 未到7點已經滿座要等位呢到人人必叫沙嗲湯底, 濃郁程度睇下塊牛肉有幾掛湯就知道, 沙嗲唔會過鹹而且有花生香帶甜BB辣level, 跟湯有件滑豆腐, 索哂精華, 好味到後尾都有叫一碟豆腐拼蘿蔔另一樣我哋都喜歡呢到嘅原因係配料可以雙拼, 人少少都可以食多幾款, 左至右上至下分別有: 鱔片、鵝腸、鯇魚片、豬潤、魚蛋、水魷帶支威士忌分享, 開瓶費收30蚊, 最後再加其他飲品每人都係240蚊, 下次會留肚加個生麵索埋D汁

打開新聞，見到報道話九龍城街市面臨清拆，即刻拿拿臨約朋友衝去馬仔的沙嗲湯底火鍋🫕🥘真係要食反夠本先得 加上天氣又再涼左啲 正式踏入左火鍋無限loop季節🌬❄️🥘馬仔的沙嗲牛湯底火鍋特別濃稠，火鍋湯底精華經過明火錘鍊，愈食愈濃郁🔥雖然話沙嗲牛一定係配出前一丁🍜但個人就覺得比較咸，相反，配米粉就相對合適，當然可以加湯令到湯底稀反小小啦 都係私心分享😗😗🫶🏻 配菜方面 私心推介 🫶🏻🥩牛肉 大 $360 - 又厚又滑又有牛味🥩😋貢丸 墨丸 雙拼$55 - 同市面的丸類大不同 食落彈牙 無粉感 小編認證真才實料😋🤤蘿白 豬皮 雙拼$35 - 索哂湯底 吸收晒個湯既日月精華 又甜又好食🤤*配菜有得雙拼甘嗌 又唔洗擔心食黎食去都係幾款另外，都有嗌到蕃茄湯底，但真係唔建議啦 都係食反沙嗲湯底🥘雙拼湯底$70

.我本人覺得，佢個湯底比方榮記，更加好食！方榮記嘅牛肉款式比較多，馬仔就只係做一款牛肉！所以兩者又不可以完全比較……不過就湯底來講，馬仔嘅湯底更加掛汁，而且味道甜中帶辣，更適合用來打邊爐！馬仔打邊爐，你話佢貴又得話佢平又得…….一講起沙嗲，大家都會即刻諗起，沙嗲牛肉公仔麵！我覺得去呢度食嘅精髓在於……只要你唔叫牛肉、公仔麵，呢個餐飯其實非常平！但只要你嗌牛肉，細嘅300 ，大嘅360 ，出前一丁，一個$35 ！你張單就一定會過500 ！ 其他食物， $55已經雙併，一款大概有五件左右，好抵食！而且佢嘅貢丸好食，魚皮餃，非常非常非常出色，外皮煮幾耐都仲係咁煙靭，必須要叫！而佢嘅水餃，亦係招牌菜！當然，佢嘅衛生環境，非常差，但去得食都會預咗！總的來說，我會再幫襯！.#ymdloveeating #ymdlovecooking #ymdlovehongkong#ymdhongkongstyle #ymdishere #ymdfood #ymdrestaurant

返左成個星期工，又到星期六緊係要去食好西啦，朋友介紹呢間馬仔粉麵，話個沙嗲湯底好正，約左一排今日終於齊人！.以前覺得無地鐵既地方就好遠，依家屯馬線開通左去九龍城都好方便。6點幾黎到已經爆哂，等左半個錢多啲先有位，呢到無得book位，只可walk in，過黎食真係要早少少黎到。.黎得呢到就緊係必叫佢個沙嗲湯底😍款式就唔算多不過基本野係有既。沙嗲湯底 $60沙嗲湯超濃郁有花生香味，湯底仲要勁杰！配埋公仔麵再加牛肉真係一流，變左特濃沙嗲牛麵！不過湯太杰有少少咸😂😂😂.大牛肉 $360牛肉色澤唔錯，不過牛肉味就唔算重，份量都算多。.鯇魚腩拼牛丸 $55芋絲$35炸魚皮 $45白栢葉 $55雲呑拼水餃 $55芝士腸拼韮茶餃 $55出前一丁 $35食材就普普通通無其他特別.除左打邊爐仲可以叫埋同埋既泰國野，本身想叫串燒但係太飽，所以最後只係叫左個椰青($35)飲😂😂😂

睇過好多食評及介紹，都話好好食，終於約到兩個老友去試陣！以前未有屯馬線去九龍城，我覺得去九龍城都幾唔就腳，除左諗起食泰國菜會去九龍城之外，如果打邊爐尖沙咀大角咀都好多選擇，所以去呢邊搵食既機會就少左。而家係宋皇臺站，由落車行到上去就真係3分鐘就到，極方便。沙爹湯底濃郁度爆炸，略甜帶咸，由於大部份食物都係較吸味既，所以會好想追住食，好過癮！！！浸係湯入面果件滑豆腐都入晒味，好食到震！牛肉都ok既，肉味唔係好重，個質都嫩，$360一碟份量合理，如果你同我一樣係牛魔王，呢度既牛肉就未必滿足到你，只不過係個湯底令牛肉加分。鱔片刀功都可以，切得適中唔太厚，不過就冇左果浸鱔既鮮味，肉質係淋身果種；點解咁講，如果去街市買鱔，睇住個師傅切落去索索聲，果條鱔既肉質食落口係彈牙脆既，真係非常好食。但$80有超過十片，咁計真係又抵又好食既！唔知係咪鱔都有急凍既呢？？韮菜餃，魚皮餃，水尤，粉腸，豬皮，炸魚皮等就乾淨企理，正常味道普通貨，都係果句：嬴在沙爹湯啦！啤酒又平，仲可以嗌泰國檔口果d沙冰飲下，幾爽既！火鍋食物唔多選擇，地方細，我6點45分到，都坐左7成客，仲有幾張枱（4-5張），唔知有冇得訂枱。第一次嚟

嚟到九龍城，有朋友介紹馬仔粉面打邊爐，估唔到日頭就係魚蛋檔，夜晚就係火鍋譜。我朋友話呢度係方X記鬧交分出嚟嘅，值得一試。一睇啲價錢，完全係平民邊爐嘅價錢，有少少任叫唔嬲唔使就住叫嘅感覺。丸類就係基本，叫咗啲豬潤，豬心，豬紅，豬腰，雞子，水魷。仲有兩碟牛肉。鵝腸，鯇魚腩都係水準之作！當然，最出名嘅，都係佢哋嘅沙嗲湯底，味道好濃郁，唔係平時出邊嗰啲水汪汪嗰隻，係杰撻撻有花生粒嗰隻。唔會太鹹，當加咗幾次水左之後亦都可以叫事頭婆加沙嗲。牛肉好靚，係高質牛肉，估唔到豬內臟嘅水準亦都好高，豬潤一啲都唔苦，爽口。基本上算係平民價錢高質邊爐，最尾來一個出前一丁沙嗲底完美結束！

相信大家都有聽過方榮記沙嗲湯底邊爐，但應該好少人知，馬仔記其實係方榮記員工開。🙊佢地開喺九龍城街市入面，必試佢地嘅沙嗲湯底！😀沙嗲味好濃，微甜！手切牛，非常好食，牛味好濃，好嫩滑。🥰鱔都幾好食，爽口，配上沙嗲湯底，非常之夾！😇炸魚皮都不錯，好薄好脆，加沙嗲又係好好味。😂佢地有火腿丸，不過冇咩驚喜。😌黑栢葉：好難控制火侯，我地整到好韌😆識玩可以挑戰下。豬腰爽口，無咩內臟味，幾好！😇最後一定要整番個沙嗲一丁，掛曬汁嘅沙嗲，真係好邪惡！🥰Tips: 1. 食到咁上下，個沙嗲唔夠濃，可以叫番d沙嗲醬加入去；）2. 環境比較熱、衛生差少少🤏🏼。

性價比：⭐️⭐️⭐️⭐️回頭率：⭐️⭐️⭐️⭐️（五⭐️為滿分)當沙嗲牛肉關注組熱烈推介附近其中一間火鍋店，我就唔太認同。呢一間係幫襯咗好多年嘅火鍋店，環境未必理想，但係食物質素絕對一流沙嗲湯底香濃，牛肉嘅質素亦都穩定，最後嘅時候，加個公仔麵落去。簡直係人生一大享受。火鍋配料都唔算貴心水配料有牛柏葉、豬皮同埋墨魚丸。兩個人大概$500埋單。比一般火鍋算平佢哋啲員工非常之好傾。同場加映：來自隔離泰國菜嘅芒果冰

天氣突然間轉涼🥶，同朋友去咗九龍城打邊爐。我哋一行八個人分開兩張枱🍽，叫咗四個湯底：沙嗲、清湯同埋蕃茄🥘。我哋最欣賞就係佢個沙嗲湯底，相比起其他口味，會更為香口同埋濃稠。🥰來之前已經食咗少少嘢打底，所以我哋冇放縱自己係咁嗌😂我哋嗌咗：炸魚皮$55炸魚皮幾大份，聽侍應講呢度嘅炸魚皮🎣全部都係自己親手製作😍，配埋沙嗲湯，一流！牛肉（ $360 ）睇落好似好貴，但真係一分錢一分貨，同出邊放題食到嘅牛肉🥩好唔同，呢度係厚切肥牛，牛香味🐄同出邊無可比擬！滿足程度100分！💯牛柏葉$55牛柏葉好爽口👍，推介！時菜$25夠晒新鮮🥬🌱，唔錯唔錯鯇魚腩$55最鍾意食鯇魚腩🍣！因為肥美得來又新鮮，佢哋呢度都冇腥味，正到爆！😋蘿蔔拼枝竹$35蘿蔔🥕鮮甜😄順帶一提，我哋叫埋隔離間泰國餐廳🇹🇭嘅豬頸肉炒飯🍳，真係勁好食🍚！有機會就幫襯埋佢啦😂順帶二提，我因為呢間嘅位處街市裏邊，環境清潔上面爭少少，我哋食食吓見到有小昆蟲😅——————為食分界線——————📍 馬仔粉麵 (九龍城)九龍城九龍城市政大廈3樓2號舖推介指數 🤰🤰🤰(3/5)好味指數 🤰🤰🤰🤰🤰(5/5)抵食指數 🤰🤰🤰(3/5)環境推介 🤰🤰(2/5)

溫度急降，最好一定係打邊爐。 星期日晚五點幾嚟到已經全場爆滿，無辦法，港式火鍋平靚正，打邊爐之餘仲可以食吓泰國菜，係九龍城熟食中心才做到。 最精彩嘅係非常相宜嘅價錢，你可以試到唔同嘅火鍋料，有單點有雙拼，鵝腸、豬腰、豬潤、魷魚、墨丸、牛丸、魚皮餃黑栢葉、韮菜餃、鯇魚片鯇魚腩等等，最貴雙拼都是$75。 不過最出名嘅一定係牛肉同沙嗲湯底，加個公仔麵，最正嘅係呢度嘅沙嗲味冇方榮記咁濃咁飽，超滿足嘅一晚，有興趣嘅記得早啲去排隊，六點後基本上一位難求。 馬仔粉麵  九龍城九龍城市政大廈3樓2號舖