平日 lunch 行來行去終於揀咗呢間食上海菜，叫咗一個二人餐，再加一碟大閘蟹粉蟹蓋賽螃蟹，98蚊有兩個蟹蓋，性價比超高！

有片有真相足料大閘蟹粉蟹蓋賽螃蟹

有少少大閘蟹香味，但唔算好濃，但勝在蛋白夠滿夠滑，有口感。其他菜式例如金銀蛋波菜都有一貫水準。鍋貼好靚仔，煎得好香，又飽滿。紅燒牛肉麵啲牛肉就麻麻地，無乜味，但跟餐無得揀擔擔麵，唯有張就下。雞絲粉皮都好食，陳醋雲耳好開胃。

兩個人食咗五百幾，指定銀行信用卡有折。

初初新開張時 book 位好 Full，因為原來只有 10 個位，好彩 10 月開始平日 lunch 已經可以即日 book 都有位，有時都係即興想食就食，元朗街坊心情！

午餐時間有 HK$420 及 HK$660 兩款菜單，似乎全場都揀咗 HK$660，難得一場來到，爭少少梗係食個好啲架啦！ 有片有真相可以感受一下用餐環境氣氛

有日本師傅主理，海膽熱狗大滿足，鮑魚肝醬都好香，但味道偏鹹，魚刺身方面，略嫌太乾，其他不過不失。綠茶鹽幾有特色，第一次試，幾得意。鴨肉壽喜燒當然唔夠和牛咁正啦！太細塊唔夠喉，下次應該要加錢食和牛先得。

真係估唔到，元朗教育路都有間咁高水準嘅日本料理。星期四約咗幾個舊同學聚會，諗住試下新嘢，近近地行過來，點知有驚喜！

首先一入 Bar 枱就見到兩位師傅正在預備食材，好講究，有片有真相，刀工都唔簡單呀！

即場示範巧手刀工切白蘿蔔絲，要知道，高級日本料理蘿蔔絲應該粗細不一且有光澤。平時食魚生附帶嘅蘿蔔絲都大有學問！看起來不起眼，常被用來清口的蘿蔔絲，因用量頗大，為了應付需求，很多餐廳幾乎都選擇用機器取代手工切蘿蔔絲。但魔鬼藏在細節中，天澗居酒屋嘅師傅就會親手切，因為口感會特別爽脆清甜，所以如果你看到蘿蔔絲大小粗細不一又有光澤，那就是手工的作品。至於機器切的蘿蔔絲，首先它會很長，但口感軟爛，這是因為機器擠壓白蘿蔔導致湯汁大量釋出的結果。

我哋好豪地試咗個鹿兒島A5和牛壽喜燒，本來我哋坐卡位，店員好好，話個位擺壽喜燒會太迫，安排咗我哋入日式包廂房，要除鞋入去坐塌塌咪嗰種，好 VIP 嘅感覺，平時應該要有最低消費先可以坐入去，今次我哋賺咗啦！

有四大塊雪花和牛薄片，店員幫我哋燒，燒完浸蛋漿，入口即溶，好美味！之後有雜菇雜菜，再用啲汁撈飯，超正呀！

元朗愈來愈多日本料理，想食熟海鮮，始終要搵返鐵板燒，今次試下呢間，平時經過都睇唔到嘅板前料理。店子小小，連包箱只有十多個座位，常滿座，walk-in 一定無位，要預早訂座。職員態度十分主動，會為客人設想，提出適當建議，令人感覺親切舒服。

今次我們一行三人，豪一點，要了兩個二人餐。HK$1,280是和牛極尚二人午餐，有宮崎 A4 和牛或伊比利亞黑豚。另一個好抵食的是HK$880龍蝦二人午餐，伊勢海老配秘製海膽忌廉汁，龍蝦頭也不浪費會用來煮味噌湯，特別鮮甜。兩個餐都有北海道特大帆立貝、白飯魚苗薑米燒飯、沙律、紅豆綠茶雪糕等，多道菜色。

另外還影了隔離枱叫的HK$368鮑魚鵝肝極尚一人餐，還有HK$298車海老大蝦一人餐，非常豐富。師傅手勢相當純熟，鐵板燒功架表演，邊吃邊看邊聞，全方位4D享受。食物用料上乘，龍蝦與鮑魚都是活煮的，影片中可以看到還在動，非常新鮮。

見到自家浸製的梅酒，也試了一杯，味道清甜，容易入口，配午餐海鮮一流。整體用餐經驗感覺良好，以 Omakase 一半的價錢，享受到板前海鮮料理即席表演，性價比十分高！

元朗有幾間出名嘅 Omakase，不過都係食壽司。個人認為魚係應該燒過先好食，刺身的話，只會食海膽同三文魚子。今次同朋友黎試下呢間，相比之下唔算好出名，起碼無上過咩大傳媒訪問，但係 OpenRice 差不多一致正評嘅鉄板焼きおまかせ。

首先 book 枱要俾 HK$500 留位費，去到餐廳佢會現金俾返你。我哋預早兩個星期 book 咗星期六，店員建議 Omakase 由12點開始，估唔到一食就食到3.30pm都未走，真係好抵！

成個 Teppanyaki 樣樣都好好味，AfterTaste 係剪片，先記得晒自己食過乜。數過總共有17道料理，由於 Omakase 係無餐牌，只係憑記憶列返出來。廚師板前有一邊煮一邊講解，但掛住拍片影相同趁熱食，都無用文字記低細節，所以只可以粗略作返個名留念 (但睇片可以睇到每道料理嘅精彩)：

1. 日式沙律 (係精緻好味嘅)
2. 黑松露BB菇蒸蛋 (係鮮甜香滑嘅)
3. 季節燒一夜干+小口白粥
(煎魚嘅鮮甜味道，香香脆脆，時間拿捏得恰到好處。廚師話要一口魚一口粥咁食，但我忍唔住食咗食晒條魚先！)

4. 海藻三文魚子帶子
(呢個睇片見到都好吸引，紫色花係食得，有啲香草味，三文魚子我至愛，配海藻湯，加帶子，一小口又係鮮甜嘅味道)

5. 鮮活北寄貝鐵板燒
(又係一淡食晒，個汁又帶出鮮味)

6. 嫩蒸BB生蠔
(蒸到啱啱熟，既有生蠔嘅嫩滑口感，又唔會一陣生嘅海水味)

7. 連鱗炸金鯛
(魚鱗嗰邊炸到超級香脆，肉嗰邊又保持嫩滑，成舊都鮮甜美味)

8. 南非鮑魚鐵板燒配鮑魚肝濃醬
(鮑魚有口感有鮮味，最正係個鮑魚肝製嘅汁，廚師話鮑魚肝要另外買啲大嘅肝，專係用來整個汁，綠色傑撻撻，超級濃味。好想將個汁私有化，用來點其他嘢，或者餸飯就正！)

9. 禾稈草煙燻吞拿魚腦天 (絕頂好味)
呢個係我一生人食過最好味嘅一口魚肉，魚油香滑，入口即溶，原來呢個就係大名鼎鼎嘅腦天 (腦天即吞拿魚頭頂的肉，一條吞拿魚只得兩片，口感軟滑，筋少而脂肪多，魚味極濃，用作刺身或壽司皆宜。) 睇片都會領略到嗰種火燒魚油嘅質感，呢一淡認真係回味無窮！

10. 蝦膏蝦汁炒越南大虎蝦
(廚師最拿手嘅，用返蝦膏來做個汁，炒返啲蝦肉，無比細緻，仲 fine 過西餐 fine dining，仲要喺你面前表演，所以呢個價錢真係好值！)

11. 煎鵝肝多士
(係預期中嘅煎鵝肝味道，咁平時都有成日食鵝肝，係好香好好味嘅！)

12. 美國牛肉粒鐵板燒
(廚師問我哋5成熟得唔得，我哋梗係最聽話架啦！但佢煎完出來應該超過5成熟，我幾鍾意，不過朋友話生少少好啲。各人口味唔同啦！)

13. 龍蝦頭鮮甜麵豉湯
(以為係一般嘅麵豉湯，但飲落特別鮮甜，廚師話加咗龍蝦入去，果然樣樣都係好味過平時！)

14. 日本高菜蛋黃沙律醬炒飯
(呢個飯睇片都好精彩，加好多料，好有心機炒到粒粒晶瑩，女士們怕太飽，佢會俾到份量不多，淺嘗美味。高菜同蛋黃沙律醬酸酸地，又唔會太漏，其實幾好味，所以個個都忍唔住食晒自己嗰碗！)

15. 櫻花蝦炒菜 (呢個就真係無乜特別，正常嘢)
16. 焦糖牛油多士
(睇片都見到有幾特別，廚師話呢個要當係甜品咁食。其實牛油沙糖多士係我哋以前英國 boarding school 嘅美食，估唔到咁多年後嘅 omakase 會見返 ^^，我梗係知好食啦！不過佢煎到咁香脆，再切條狀，砌靚上碟，仲更加好味，所以雖然邪惡但又係個個都食晒無剩！)

17. 開心果雪糕 (呢個綠色雪糕係幾香滑嘅)

成餐 HK$700 +10% 嘆足三個半鐘食啲咁精緻高質嘅食材真係物超所值，所以我好耐無寫 OpenRice 都要重出江湖介紹返！記得睇埋條片，有兩分鐘精華同8分鐘詳細片段，任君選擇。Highly Recommend！

黎開 Yoho 唔想同人迫，通常會過黎呢邊搵食，Stormies 喺商場裡面無入口，要兜出花園先見到，好多人都會 miss 咗呢間好嘢。飲嘢食物質素都唔錯，而且地方坐得舒服。原來 Stormies 係 Cafe Deco 集團，出品有保證。今次試咗幾樣嘢都好好，而且有圖有真相，大家可以參考下！ Appetizer Platter 小食拼盤 chicken wings, calamari, meatballs, chicken quesadillas, soft shell shrimp and fries 雞翼、軟殼蝦、魷魚圈、肉丸、雞肉墨西哥薄餅及薯條 最特別係軟殼蝦，香口野味。雞翼炸得好脆。呢個 platter 餸酒啱晒！ Nachos Platter 墨西哥粟米片拼盤配芝士辣肉牛油果醬 warm nachos with baked chili beef and cheese dip, salsa, sour cream and guacamole 紅色 Nacho 好搶眼，不過食落原來一樣味，點熱辣辣芝士醬，好正！ Cream of Wild Mushroom Soup with Truffle Oil 蘑菇忌廉湯伴黑松露油 個湯一上枱就聞到好香黑松露味，飲落好 rich 蘑菇蓉口感，香滑開胃！ Stormies Wagyu Beef Burger 經典和牛漢堡包 with bacon, sauteed mushroom, onion and cheddar cheese 基本上元朗好少地方可以食到高質素漢堡包，呢個和牛 Burger 真係好頂級，夠 juicy，meat lovers 啱晒！ Chicken Tikka Mac & Cheese 蟹肉芝士蜆殼粉 conchiglie with spicy chicken, okra, eggplant, zucchini and avocado 佢呢個 mac & cheese 係輕盈版，適合香港人口味，似白汁意粉，無傳統英國菜咁 heavy！ BBQ Pork Ribs 烤豬肋骨配燒烤汁或韓式辣醬 with Guinness hickory sauce / Korean spicy sauce 我哋揀咗個韓汁，酸酸辣辣幾得意，個 ribs 都幾多肉，而且唔靭，用刀切開好容易骨肉分離，有肉汁，幾好味！ Stormies Souffle Pancake 梳乎厘班戟配海鹽焦糖牛油 with salted caramel butter, mixed berries and vanilla gelato 試咗呢個原味，海鹽配焦糖好特別，souffle 好軟滑。不過製作需時，溫馨提示要一早叫定，就唔洗等咁耐。 Mango & Coconut Souffle Pancake 芒果椰子梳乎厘班戟伴雲呢拿意大利雪糕 with fresh mango, coconut and vanilla gelato 呢個除咗 souffle 仲有 gelato，原來 Cafe Deco 有香港自家製嘅意大利雪糕，好香牛奶味，配 pancake 一流！ 我哋嗌咗幾杯嘢飲，都調得幾有水準。下次夜晚黎，會試埋佢啲本地手工啤酒 Gwei-lo 鬼佬！ Stormies Favourite Mango Mix, Strawberry Mix, Pineapple Juice Pineapple Delight Pineapple Juice, Coconut Water, Whipped Cream Ocean Breeze Absolut Kurant, Malibu, Cranberry Juice, Pineapple Juice 已經約咗下次 Gathering 再來，真心推介！

大衛同我第一次約會嘅餐廳就係 Outback，銅鑼灣翡翠明珠廣場果間，係我生日，都係佢生日，不過都係佢簽卡埋單，當時，佢緊張到寫咗個數字之後，唔記得簽名，而餐廳職員當時又發現唔到，結果係第二日打電話通知，要返返去間餐廳到簽返個名，大衛否認自己緊張，話係因為太黑，自此之後，我哋都無再去 Outback 啦！ 果年係 2000 年，17年後嘅而家，元朗 Yoho 開間新嘅 Outback，我哋又返返黎，呢個對我哋有特別意義嘅地方，咁就17年，拍返段短片留個紀念。
我個龍蝦好好味 (HK$388)，焗薯都正 (跟主菜)，麵包焗暖 (送)，軟綿綿，自家製，好食。大衛個西冷牛扒麻麻地 (HK$228)，太厚太熟，飲品普通 (Mongo Frost HK$58，Vodka 有酒精 Cocktail，Blueberry Ice Tea HK$38  話可以無限 Refill 但服務員太忙唔會主動 Refill，所以都係無 Refill)。價錢偏貴而人客多，長期排隊，座位密集，服務一般，都無咩特別原因吸引下一次再來！

全香港只有元朗店先有嘅KFC比利時特濃朱古力新地 💩 元朗人表示幸福 嘅 利申：我本來係唔鍾意食軟雪糕嘅！但我鍾意 Dark 朱古力，所以嫌佢唔夠濃味，本身佢係滑嘅，有質感過輕飄飄嘅麥記，唔會太甜，個人覺得可以再重啲朱古力味，但呢個價錢，唔可以同 Godiva 比，所以 overall 都係抵食 拍咗段短片可以睇睇

首日 YOHO Mall 全面開通，好多間餐廳都未 ready，唯獨【穴壽司】充滿自信，還在 Facebook 設立了一個專為元朗分店獨立宣傳的專頁，對元朗人非常重視！
試過幾次銅鑼灣店，都很喜歡，魚生刺身都是優質上乘材料，有我最喜歡的三文魚子飯，而且大集團信心保證，吃得放心！
今次試食，樣樣都試少少，壽司新鮮軟綿綿，沒有令人失望。驚喜的反而是串燒，900度高溫燒烤非常講究，時間配合得精準無誤，外香內軟，又不會 overcook，還保留肉汁鮮味，吃得出日本一貫對食物烹調要求認真製作的風味…
下次會試至愛的大大碗三文魚子飯，這裡套餐的配搭 combination 選擇很多，份量少一點，可以吃多幾款不同種類，很貼心的安排。
價錢屬於中上，與食物質素也成正比，比較適合拍拖二人細細欣賞味道那種，元朗人很喜歡日本菜，後來幾次經過眼見都很滿座，生意不成問題，食物流量高，希望也能特別保持新鮮，吃日本菜我始終不敢試小店，就是沒有安全感！
今次沒有拍照，因為是拍片，想看的要點擊 YouTube 連結，還有 Overall 整個商場的片段。

韓國大型連鎖炸雞店 NeNe Chicken 竟然在元朗開第三家分店，作為 YOHO 常客，點都要試一試。 今次 YaShiJang 推出滋味炸雞與韓式年糕鍋 crossover，自助吧形式，自選喜歡的韓式食物，包括多款特式年糕，如蕃薯年糕、芝士年糕等，還有一些可以即吃的韓式前菜；火鍋溫度不高，很安全的設計，加入不同醬汁，大班朋友拾下拾下都會幾好玩，味道偏清淡，其實吃不到很多；最後加入炒飯混合年糕鍋的精華，已經是好飽的一餐…
不過主角還是炸雞，要開另一個胃去食，【初雪】的芝士粉沒有令我失望，很重手的味粉，甜甜地，香香地，很滿足！可惜吃到雞肉部份，太亁了！可能是韓國口味吧！沒有肉汁的！再試試其他口味，亮點都在於脆皮與炸粉，蒜蜜味與原味，都是很乾身的，未必是香港人最愛的口味。不過算是要體驗一下韓國風味，年青人還是會熱烈追捧。
溫馨提示就是份量很多，吃很飽！飲品也是自助形式，汽水或果汁，都是韓國版罐裝飲品。
今次沒有拍照，因為拍片，還特別模仿了韓國廣告 Running Man 劉在鍚 Oppa 搞笑 Rap，香港人，輕鬆下啦！