日日都係到同老公講想快啲出去飲酒 好想飲酒食花生 所以老公有日星期六就帶左我落樓 話呢度有開可以飲酒 落到嚟發現除咗飲酒，呢到係食串燒嘅地方 播既係Mirror，張敬軒既歌，超有taste 有個大電視播緊足球(but我唔睇波😂） 叫左幾杯酒同一板串燒 個presentation very 打卡able 酒我點左Kirin Ichiban既黑加侖子frozen beer，第一次飲Frozen Beer，上面有啲沙冰超得意，同埋我唔算飲得好有氣嘅啤酒，所以一向都偏向鍾意飲台灣啤酒多啲，今次呢個真係唔算非常之有氣，同埋啲泡都有黑加侖子味，好驚艷 飲得之人可以留意下，似乎仲有得挑機😂 講返佢啲串燒我最鍾意係呢一個白鱔，燒嘅時間啱啱好，保持到佢少少爽脆，亦都保持到肉質嫩滑，個皮仲要燒到脆👍🏻大推 煙肉車厘茄係我去串燒鋪一定會點嘅，真係超鍾意食呢個，咬落去啲車厘茄汁爆出嚟超正 佢個牛油大頭蝦燒到個牛油味好濃厚，啲蝦肉都彈 個XO醬蠔同埋個鮑魚都食得出佢嘅海鮮幾新鮮 甲羅燒係今晚另外一個MVP，味道調得啱啱好 yum 飲完今餐只會令我更加想飲酒，快啲開返酒吧啊

話說好耐無同老公兩個人出街食飯拍下拖，佢帶我黎個時第一個感覺係呢到真係好靚！ 女仔最鍾意呢啲色彩繽紛嘅地方，仲要有咁多鏡，個design真係好似萬花筒咁樣，好fancy 基本上我睇menu淨係睇desserts同埋main course 因為好耐冇食過慢煮牛肉，所以叫咗個。個牛肉嘅份量比想像中少，但係真係幾好食。啲肉好柔嫩，肉汁仲喺度，個source 既味道唔會太搶，食到好香嘅牛味。另外我都幾鍾意佢啲配菜，做得幾出色。簡單嘅烤焗令到佢成為左牛肉最佳嘅配搭。 除咗呢個牛，我哋仲叫咗個辣肉腸意粉，佢個擺碟都係好靚嘅，味道好香蒜味，少少辣唔會太過，都幾惹味。 因為價錢都唔係特別平，所以都唔係叫咗好多，但係靜靜地兩個人傾計呢度真係最佳嘅選擇。服務亦都好好，下次慶祝紀念日都可以再嚟

之前舊舖已經幫襯過一次覺得質素都唔錯，再search嘅時候發現原來轉咗地點。 個湯嘅蕃茄味極度濃郁， 完全做到開胃嘅效果。 因為今日真係好想食薯條，所以叫咗個炸薯條。呢度嘅薯條又幼又長，而且仲炸得好香脆，畀個like你但食完真係feel到自己勁熱氣 主菜叫咗個雞扒年糕。韓式炒年糕用喺西餐上面呢個fusion嘅配搭真係第一次試。佢啲年糕非常之煙韌，雖然咬到個口有少少攰，但係都幾好食嘅。而且個汁食得出唔頹，雞扒亦煎得好香。 呢個朱古力香蕉金寶簡直就係是晚一大亮點！老公狂讚話好食！又叫我之後整。 我都覺得唔錯嘅，平時食嚟食去都係apple crumble，冇乜新意。今次呢個曲奇碎下面全部都係朱古力同埋香蕉，係幾match嘅。不過兩個人食就真係有少少濟。另外如果佢下次個朱古力可以用dark chocolate 就更好啦！

食慣左各國美食，都係覺得中菜最多姿多彩。所以間唔中都要食番啲中菜，養下個胃。 一入門就係一個好大嘅魚缸。就咁睇都知呢度有海鮮食。 坐低咗之後就上咗個麻辣花生。第一次食呢個花生，麻味做得幾好，辣味唔算好重。作為餐前小食幾開胃。 傳統中菜廳啲碗碗碟碟真係特別靚。見到個碟上面有隻雀，有啲花，心情都好開朗。 一嚟就叫咗個馳名燒乳鴿。七十幾蚊一隻一啲都唔貴。而且佢燒得好有水準。外脆內軟，油脂平均。除左淮鹽仲有喼汁，無諗過同乳鴿都幾夾。 叫左個好考功夫既蝦籽柚皮。 鮑汁嘅香，柚皮嘅林，配合蝦子嘅爽口感 呢個係店主推介嘅黃金蝦炒飯！真係好有黃金蝦嘅感覺。蛋黃夠碎，落得夠多。最正嘅就係啲蝦唔使自己搣殼，啱曬我呢啲咁懶既人。雖然好好食，不過成兜咁大份都真係有啲漏。 為咗我嗰個好鍾意食牛仔骨嘅老公，叫咗呢一碟牛仔骨炒金菇。牛仔骨好香口嫩滑，炒埋啲金菇同埋少少三色椒都幾match，係鹹咗少少啫。 食完仲有糖水送。番薯糖水同埋紅豆沙兩樣都非常足料！啲番薯好好味，軟硬度適中。紅豆沙好多豆，不過老公就覺得佢有啲太多豆。 呢的個人口味嘅嘢，大家自己品嚐。

西貢呢條巷仔不嬲都出名多泰國食肆。今次嚟呢一間餐廳真係無心插柳，純粹係見到出面啲相好似都幾吸引，所以就入咗嚟食。估唔到又ok喎。 餐廳唔係好大小本經營feel， 同一般嘅泰國餐廳一樣，都係有啲金嘅擺設，同埋有啲佛像。 天氣開始有啲熱，所以要先飲個椰青消消暑。 清甜夠凍，椰肉香滑。 一間泰國餐廳好唔好食，取決於佢嘅冬陰功湯煮得好唔好飲。呢度嘅唔錯。唔算太辣，亦都唔會唔夠酸。 色水幾靚，而且料落得好足！好鍾意食冬陰公湯入面呢隻菇。 蝦唔算太多，但有幾隻都ok啦呢。呢個係細碗，但我地完全估佢唔到佢咁大碗！ 蝦餅炸得好香，好厚身而且好彈牙！ 冇油益嘅感覺，而且剛剛炸上嚟新鮮滾熱辣，值得一讚！好多地方食嘅時候都唔係熱辣辣嘅！ 重頭戲嚟啦！因為我真係勁想食魚，所以就叫咗個爐魚！一向都好喜歡食泰國嘅鱸魚。咁樣用個爐熱住佢，條魚就暖笠笠，食落覺得特別好味！而且唔會越煮越硬！亦都冇好似雞煲烤魚嗰種重口味。泰國嘅煮法係比較清新一啲嘅！佢用嘅調味料無論係蔥蒜，定係粉絲等等，都係同條魚非常之夾既！突出到佢嘅鮮味，唔係重口味嘅感覺，好喜歡。 行番出嚟先發覺佢有另外一個門口， 出面都有啲枱凳，晚市應該會多啲人， 所以要坐出嚟。不過我都係鍾意喺舖頭入面食嘢多啲。

估唔到小街小巷有間咁既酒店仲有間咁高質既餐廳。好彩一早訂左位，我見好多walk-in都摸門釘。到達第一個感覺就係餐廳好用心佈置，lift口放滿唔同草原系既deco，都幾靚幾舒服。 坐底左就發覺唔只係佈置上落功夫，佢D桌椅同凳都好講究。你睇下隻碟幾靚？勁鍾意呢D! Menu既第一頁就係甜品，全部都改左個有趣既名，不過價位都唔平。 我地叫左個大既拼盤。 真心稱讚佢每樣嘢都好高質！德國腸唔只好食仲切得好靚！仲有個雞翼！我第一次揾到比麥當勞脆香雞翼 好食嘅炸雞翼！外面個皮好薄好脆！入面個肉勁juicy! 而且配左個少少辣既粉！好夾好好味！炸芝士條既芝士好香，不過就實左D, 無個種搣開有芝士痴住嘅感覺。而且佢有甜薯加埋薯條，感覺冇咁濟！ 芥末醬個人覺得味道可以再濃一啲，呢個係偏奶嘅感覺嘅。不過都好食，唔會太甜。 另外叫咗個牛油果蟹肉意大利飯。呢個飯既份量完全超出我想像！勁多蟹肉！又勁多飯！(其實係比平時食開既多，但唔會太飽，係一人份！讓人客食得飽係良心企業呀！)D蟹肉好好食！真心有香蟹味！所有嘢都好match！除咗牛油果同埋蟹肉之外，佢仲落咗啲菇去煮，令成件事味道上豐富好多！好鍾意個飯好creamy，而且D意大利飯係熟既。現場仲有米可以買走。 我想講食到尾見到隔離枱既甜品我就明佢點解set呢個價，真係好靚同埋都有3-4人份！好jealous！但今次實在太飽，下次我都要食先得！

其實平時好少行呢到，唔係個fd話幾抵食都發現唔到。不過真係幾抵同幾好食！ 首先因為聖誕節，出面嘅裝飾真係好靚！ 今日我哋食係下午茶 我點知個黑松露豬扒包，我想講呢個包嘅份量完全係out of my expectation！勁大份！ 呢個係晚餐嘅份量囉好唔好？ 黑松露味勁香！然後的豬扒亦都好有肉汁，加埋出面硬脆嘅法包，成件事都好搭！薯條仲要係我鍾意食既粗薯！無得彈！ 個friend叫咗半份葡式炒意粉，呢個份量就正常D, 上面有啲厚切嘅辣肉腸，加上意粉嘅硬度適中，調埋呢個葡式嘅味道，都幾好食！ 我哋一個叫左杯red sangria，一個叫左杯mc，好有食晩餐既感覺！真心抵同好食！ 店內既環境同埋用色都好靚，喺度食嘢好舒服！ 本身諗住個下午茶應該會唔飽，兩個人叫三個應該差唔多，好彩冇叫個甜品！但佢啲甜品都好吸引呀！希望下次可以試到啦！

作為一個鍾意周圍「搵食」嘅人，周不時都會比我發掘到好餐廳！呢排天氣凍左咁多，終於正式踏入冬季，我都可以試多好多唔同嘅火鍋啦！ 今日嚟到九龍城，同男朋友一齊試一間食牛肉好出名嘅火鍋店——牛精皇。 呢間火鍋店除咗最出名嘅牛肉湯底之外，都仲有好多唔同嘅選擇，例如番茄牛尾鍋、泰式冬陰公鍋、松茸豬肚雞鍋、海鮮鍋等，應有盡有。 不過第一次嚟到呢間火鍋店，當然係要試一試招牌湯底牛精鍋先啦！原來呢個湯底已經有唔少嘅牛肉配料，包括牛肚、牛肺、牛尾、牛腩、牛孖筋、牛膀等，而且店員仲會分開送上，係你面前將配料放進火鍋裏面。 拎好所需要嘅醬汁之後，我哋就慢慢期待個鍋滾起！ 每次打邊爐都唔少得一份炸魚皮，湯底啱啱滾起嘅時候就已經可以率先將炸魚皮輕輕燙一燙，食得！香脆又可口一定會爭住食！ 我哋叫咗一份海鮮盛合，總共有六款時令海鮮，有元貝、鮑魚、紐西蘭蟶子皇、大沙白、貴妃蚌同海蝦，好豐富！ 湯底嘅濃郁程度滿分，可以想像熬製時間不短。每一款海鮮都有自己獨特嘅鮮味，配上香濃嘅牛肉湯底，味道都幾夾。其中我就比較鍾意食紐西蘭蟶子皇同埋元貝，口感有嚼勁，但要小心控制火候同埋烹調時間，如果唔係好容易就變硬，浪費左海鮮嘅鮮活度！ 手切肥牛亦都有兩個部位選擇，一係肉眼同肉眼邊，另一款係牛頸脊。我哋揀咗前者，牛肉味重，質感都軟身，而且見到牛肉雪花嘅紋理非常之靚，係睇得出又食得出嘅優質牛肉。 之後仲叫咗一碟牛舌，我個人來講幾鍾意佢嘅少少羶味，好香口。質感就較煙韌，唔錯。 最後終點左一份娃娃菜，烚菜之前，店員細心地幫我地將火鍋邊嘅泡泡同油撇走，令娃娃菜可以吸收晒湯底嘅精華，亦都更健康。 順帶一提，男朋友叫咗一支雪花啤酒，價錢非常之平都係十零蚊，但佢話個味道都唔錯喎，cp值高！ 總括嚟講呢間火鍋店嘅回頭率極高，我都會推介比其他朋友係呢個冬天瘋狂打邊爐食牛肉！

小時候每逢聽到「食齋」就會不禁皺起眉頭，大概很多人也有吃齋菜的童年陰影 (笑) 但時至今日，西式素食與中式的大為不同，沒有了油膩的感覺，賣相更與一般非素食無異，至少讓non vegetarians不會反感，或許更會想有試試新菜式的衝動！ 沿着中環扶手電梯上行，來到蘇豪區，終於找到了Pop Vegan。餐廳位於一樓，走了一層樓梯便到達。 翻看餐牌，看到Pop Vegan的食物種類也相當多元，由前菜、湯、飯、意粉，至到pizza、burger、甜品，應有盡有，總有幾款讓你感興趣。 首先要了一杯開胃mock tail MPL，就是mango, pineapple and lychee。果香濃郁，甜美解渴。 朋友點了一客Tuna Tartar，上枱時被它的賣相surprised了！如果不說，絕對不會聯想到它是素食，皆因「吞拿魚」像真度極高。原來「吞拿魚」是以蒟蒻製作，顏色模仿得十分相似。他他裡的牛油果、芒果及蒟蒻的口感非常相襯，吃起來感覺清新，帶檸檬草香氣，是一道很不錯的前菜。 然後來了一份「吞拿魚」壽司卷物，中間包著的食材與「吞拿魚他他」大同小異，配上微微帶點辣度的mayo，可愛又可口。 最後還吃了Happy Cow的dairy free vegan ice cream，我選了較特別的薑味！雪糕的質感幼滑，薑味非常突出，帶有少許辣勁，刺激味蕾，十分過癮。 離開前也有在店內選購了Vegan products，很適合素食者前來！而不是素食者的朋友，而家終於可以試一試美味又健康的西式素菜了。

上星期去完日本旅行，對日本嘅拉麵一直念念不忘，返到嚟香港仍然好掛住日本嘅拉麵店，所以今日去咗灣仔嘅鳥華亭食拉麵。一入去真係好似係日本食拉麵咁，好有日本嘅風格，我哋坐咗喺bar 枱，可以零距離咁睇住店員煮嘢食好盞鬼，亦可以顯示出日本人對食物嘅自信同認真。 依度嘅老細係日本人，我哋一坐低佢就主動走埋嚟介紹呢度嘅食物。依度主打雞湯拉麵，因為湯底由多種材料用12小時熬製，講到咁吸引一於試試佢。 至激白湯拉麵（必試） 食拉麵湯底最重要，第一啖飲落去有驚喜，唔係講笑，飲得出真係用咗好多材料去煲，湯底有濃厚雞味，好好飲。叉燒好林，肥瘦適中，拉麵爽口彈牙好食 魚介白湯拉麵 我哋仲叫咗另一個拉麵，今次唔係雞湯，係用魚湯，同樣好味，配菜有蓮藕片，香脆好食，溫泉蛋都好好食 明太子雞翼 店舖嘅小食款式唔多，選擇唔多，因為日本人會專注做好一樣食物，雞翼係其中之一。雞翼外皮好脆好香口，入面好juicy ，明太子令雞翼嘅味道更加豐富，好好味 雞軟骨串燒 我哋望住老細幫我地燒，睇住佢好認真咁燒，未食都已經覺得好好味，食完第一串會想食第二串，後悔冇叫多幾串 小店嘅感覺好舒服，好欣賞老細對食物既用心同認真