天平貓貓 等級4 | 關注 留言給此食家 |
排序方法:
日期 笑臉 喊臉
編輯推介 餐廳總分
文章形式 | 地圖形式
2008-12-17
十一月廿六日, 放學後走咗嚟好耐冇幫襯既《君滬鍋貼大王》, 早兩日收工撘巴士, 唔記得土瓜灣好快就到, 瞓著咗遲咗兩個站落車, 但就無意中發現原來呢頭都有間《君滬鍋貼大王》架!! 好掛住呢度既鍋貼同酸辣湯呀~~ 呢度既水準同之前食開既差唔多, 一樣好味兼份量大, 我哋兩個叫咗一個雞翼上海粗炒、酸辣湯、五隻鍋貼同一碟菜芯已經勁飽啦! 正!! 不過呢度既座位就少啲, 但我諗我哋多數都係放學後十點幾先嚟幫襯, 所以對我哋冇乜影響, 最緊要啲嘢衛生、好味同夠份量!! 更詳細資料及圖片請看 : http://hk.myblog.yahoo.com/joycewai616/article?mid=11560 推介美食: 雞翼上海粗炒,酸辣湯,鍋貼
評分: 味道 4 環境 3 服務 3 衛生 3 抵食 5
2008-12-17
十一月廿五日, 今晚收工後返都唔知食乜, 返到屋企樓下, 決定試吓呢間《新園水餃麵》, 買咗個套餐 $23, 外賣加 $1, 有一個水餃麵, 一個酸辣湯, 一個熱豆漿, 以為熱豆漿係甜, 原來係碗上鹹既... 味道比較淡, 水餃啲皮厚咗少少, 湯底味道普通, 啲麵唔知係咪焗咗一陣, 腍咗少少, 至於個酸辣湯, 真係離晒大譜!! 同正常既酸辣湯差九厘咁遠! 啲料比較少, 仲竟然落好多蘿蔔絲, 又唔夠杰, 好似湯咁, 唔知仲以為自己飲緊辣啲既羅宋湯呀!! 唉... 估唔到呢間嘢啲食物質素咁麻麻, 好失望.............. 更詳細資料及圖片請看 : http://hk.myblog.yahoo.com/joycewai616/article?mid=11552
評分: 味道 3 環境 3 服務 4 衛生 4 抵食 3
2008-12-17
十一月廿三日, 由於搬咗過嚟土瓜灣後, 冇得食《譚仔》既麻辣米線, 所以要再周圍搵吓呢頭有咩四川米線食, 今晚同 Winnie 走先嚟呢間試吓, 坐入去, 都算幾多人, 諗住都唔太差啦, 點知... 睇完餐牌知冇酸辣湯底已經好失望, 碗麵嚟到已經少少扣分, 因為啲料好少, 再食落口, 嘩! 個湯底唔得喎! 唔係唔夠辣, 而係個湯底本身冇味呀! 腩肉又多肥膏, 個湯底唔靚, 搞到啲竹笙都唔夠好味... 雖然話食得四川麻辣米線既人都係想食辣, 但未忌係得個辣字冇其他味囉! 越食越覺得同《譚仔》實在差太遠, 我同 Winnie 都話以後唔會再幫襯... 個菜就 OK, 不過個麵既湯底唔掂, 就乜都冇得傾啦! 睇嚟我哋要再努力搵過附近有冇第二間比較得既麻辣米線店!! 更詳細資料及圖片請看 : http://hk.myblog.yahoo.com/joycewai616/article?mid=11547
評分: 味道 2 環境 3 服務 3 衛生 3 抵食 1
2008-12-17
知道 Winnie 鍾意食辣嘢, 呢度實啱佢胃口, 所以特登帶佢嚟試! 佢仲當慶祝搵到新屋, 請咗我食呢餐, 真係多謝晒呀! 記得兩年前, 成日同鎗會班兄弟嚟幫襯既食店《食軒》, 而家已經改名為《聚寶食軒》啦 我哋叫咗好幾個菜, 首先有鑊仔辣酒煮大蜆 ($38), 都幾大鍋喎~ 都叫夠辣夠味, 當然唔及中山石岐佬既咁正, 但已經好食過好多香港食店啦! 跟住係一碗蠔仔肉碎粥 ($25, 窩$45), 都好多蠔仔喎, 又夠味, 呢個真係得呀!! 麻辣手撕雞 ($22), 呢個出奇地好味, 係多咗啲雞皮啫~ 但啲味道調效得幾好。 韮菜辣豬紅 ($20), 啲豬紅都唔錯喎, 唔會太假, 又幾入味, OK~ 蒜蓉炒白菜仔($18), 份量少咗啲, 但都炒得幾香幾好味呀~ 吉列百花蟹鉗 ($18), 呢個都唔錯喎~ 即叫即炸, 唔會話唔夠熱囉! 總括嚟講呢間嘢真係幾得, 我哋都見佢夜晚成十點幾都仲幾多客, 而且好多人都鍾意嚟飲佢煲老火湯, 細煲 $20, 大煲 $30, 下次都試吓先! 不過我哋食吓遇上一隻小小強呀!! 嚇到我哋兩個勁驚囉! 雖然都知食市一定會有小強, 但最緊要係唔好畀我哋見到嘛! 希望呢間嘢係衛生方面搞好啲啦! 如果唔係就浪費咗佢哋既美食喇! 更詳細資料及圖片請看 : http://hk.myblog.yahoo.com/joycewai616/article?mid=11538
評分: 味道 5 環境 3 服務 4 衛生 2 抵食 4
2008-12-16 (屬於相關食評)
十一月七日, 又過嚟《一平安》食晏, 因為呢幾個月嚟銅記可以畀我試既食市都差唔多試晒啦... 不過今次嚟《一平安》, 我哋全部都決定轉一轉口味, 唔食佢個 set lunch, 試吓佢啲散叫既湯麵, 我就叫咗呢個招牌麵"長埼拉麵", 成 $72, 好貴... 不過嚟到後, 就知大鑊, 因為佢真係貴得有道理, 個份量大到係足夠兩個人食架!! 睇吓! 個碗真係大過我個頭呢!! 好采佢呢個麵主要材料係啲菜, 如果大部份都係肉, 我諗我一半都食唔到............. 同埋佢個湯底比起平時食既豬骨湯多咗份海洋既鮮味, 當然仲有啲海鮮如蜆肉墨魚肉等等啦~ 最後我好努力咁食咗三分二, 咁樣睇, 其實兩個人 share 食呢個麵又一啲都唔貴喎! 呢個係同事推介既廣東拉麵 ($55), 佢個湯底有啲似碗仔翅, 杰杰哋既, 試咗一啖, 確係唔錯喎~~ 同埋咪睇佢細碗過長埼拉麵, 其實份量都幾大, 食完會好飽! 仲有呢個香辣拉麵 ($52, 好似係叫呢個名), 賣相有啲似亞媽煮既家常小菜, 初時食以為唔係好辣, 但原來會越食越辣架! 食得辣既同事都話食到尾真係少少頂唔順呢~ 不過呢個我就唔會推介, 因為賣相麻麻之餘, 其實啲料好普通, 又冇乜日式料理 feel... 更詳細資料及圖片請看 : http://hk.myblog.yahoo.com/joycewai616/article?mid=11533 推介美食: 長埼拉麵,廣東拉麵
評分: 味道 5 環境 5 服務 5 衛生 5 抵食 5
|